ޒުވާނުންގެ ޒިންމާތައް ހަނދާންކޮށްދީ، އެ ޒިންމާތައް ޔޫތު މިނިސްޓަރު އިބްރާހީމް ވަހީދު (އަސްވާޑު) ވިދާޅުވެދެއްވައިފިއެވެ.
މިއަދު ފާހަގަކުރާ ޒުވާނުންގެ ދުވަހުގެ މުނާސަބަތުގައި ދެއްވި ޚިތާބުގައި މިނިސްޓަރު ވިދާޅުވީ ކޮންމެ އުއްމީދެއްގެ ފަހަތުގައި ވެސް މަސައްކަތްތަކެއް އޮންނާނެ ކަމަށާއި، އަދި ކޮންމެ ހާސިލުވުމަކަށް ވެސް ޒިންމާއެއް އޮންނަ ކަމަށެވެ. އެ ގޮތުން ޒުވާނުންގެ ކަންކަމާ ގުޅުވައި ވެސް އެ ފަދަ ބޮޑު ޒިންމާއެއް އޮންނާނެކަން ފާހަގަ ކުރައްވައި އޭނާ ވިދާޅުވީ، މިއަދަކީ ޒުވާނުން އެ ޒިންމާ ހަނދާން ކުރަންޖެހޭ ދުވަސް ކަމަށެވެ.
މިއަދާ ގުޅިގެން ހަނދާންކުރަންޖެހޭ އެންމެ ބޮޑު ޒިންމާއަކީ ސަރުކާރުން ތަންފީޒުކުރާ ސިޔާސަތުން މަންފާ ލިބިގަނެވޭ ބަޔަކަށް ޒުވާނުންވުން ކަމަށް އެ ޚިތާބުގައިވެއެވެ.
ޒުވާނުންގެ ޒިންމާތަކުގެ ތެރޭގައި ހަށިހެޔޮކަމާއި ނަފުސާނީ ދުޅަހެޔޮކަމާއި، ޝައުގުވެރިކަމާއި ޒިންމާދާރުކަމާއި، މުރާލިކަމާއި ހުނަރުވެރިކަން ހިމެނޭކަމަށް އެ ޚިތާބުގައިވަނީ ފާހަގަކޮށްފައެވެ.
މިނިސްޓަރު ވިދާޅުވެފައިވަނީ ކުރިމަގުގެ މަންފާ ލިބިގަތުމަށް ޒުވާނުންގެ ވިސްނުން އެ ދިމާއަށް މިސްރާބު ކުރުވުމަކީ މުހިންމު ކަމެއް ކަމަށެވެ.
އެ ގޮތުން މަދާމައަށް ދަތުރު ކުރުމަށްޓަކައި ރާއްޖޭގެ އިސްލާމީ ޝަޚުސިއްޔަތަކީ ޒުވާނުންގެ ދިރިއުޅުމުގެ އެއްބައިކަމުގައި ހަދަންޖެހޭ ކަމަށެވެ. އަދުގެ މައްސަލަތަކާއި އޭގެ ހައްލުތަކަށް ރިއާޔަތްކޮށް ފުންކޮށް ވިސްނައި ގޮތް ޚިޔާރުކުރާ ބަޔަކަށް ޒުވާނުން ވާންޖެހޭ ކަމަށެވެ. އިގްތިސާދީ ކުރިއެރުމަށް ފަހިވާ ގޮތަށް އުފެއްދުންތެރި ބަޔަކަށް ވާންޖެހޭ ކަމަށެވެ. އަދި ގައުމުގެ ސިޔާދަތާއި އިސްތިގުލާލު ރައްކާތެރިކޮށް މުސްތަގުބަލުގައި ދަމަހައްޓައިދޭނެ ތޫނު ވިސްނުމާއި މޮޅު ހިކުމަތުގެ އަހުލުވެރި ބަޔަކަށް ޒުވާނުން ވާންޖެހޭ ކަމަށް ވެސް މިނިސްޓަރު ވިދާޅުވެފައިވެއެވެ.
"ގައުމުގެ ޒުުވާނުންނޭވެ! މިއީ ތިޔަ ބޭފުޅުންގެ ގައުމެވެ. މި ގައުމުގެ ހުރިހައިކަމެއް މާދަމާ އޮންނާނީ ތިޔަ ބޭފުޅުންގެ އަތްޕުޅުމަތީގައެވެ. މާދަމާގެ ދިވެހި ގައުމު އޮންނާނީ ތިޔަބޭފުޅުންގެ ކިބައިގައި މިއަދު ހަރުލާ ސިފަތަކުގެ ސޫރައިގައެވެ. އެހެން ކަމުން ދިވެހީންގެ ގައުމު ދިވެހިގޮތުގައި މުސްތަގުބަލުގެ ދުނިޔެއާ ފައިހަމަކުރަން އަޅުގަނޑު އިލްތިމާސް ކުރަމެވެ." އެ ޚިތާބުގައިވެއެވެ.
އެ ޚިތާބުގައިވަނީ ސަރުކާރުގެ ސިޔާސަތުތައް އެކުލަވާލާފައިވަނީ މި ހުރިހައި ކަމަކާއި އެއާ ގުޅިފައިވާ ކަންކަން ޒުވާނުންނަށް ހާސިލުކޮށްދިނުމަށް ކަމަށެވެ. އަދި ހަގީގީ މާނައިގައި ޒުވާނުންގެ ދައުރު ޒުވާނުންނަށް ލިބިދިނުމަށް ކަމަށެވެ. ގައުމީ އަމާނާތާ މާދަމާ ހަވާލުވެވޭނޭ ނުހަނު ގާބިލް ޒިވާނުން އުފެއްދުމަށް ސަރުކާރުން އިސްކަންދޭކަން ފާހަގަ ކުރައްވައި މިނިސްޓަރު ވިދާޅުވީ އެ ކަމުގެ ނަތީޖާ ނުކުންނާނީ ޒުވާނުން އެ ކަންކަމަށް އިޖާބަދޭ ގޮތެއްގެ މައްޗަށް ކަމަށާއި، އެ ކަން އޮތީ ޒުވާނުންގެ އަތްމަތީގައި ކަމަށެވެ.
މިނިސްޓަރުގެ ޚިތާބު ނިންމަވައިލައްވާފައިވަނީ ރައީސް ޑރ. މުހައްމަދު މުއިއްޒު ކުރެއްވި އިލްތިމާސަށް އިޖާބަ ދިނުމަށް ގޮވައިލައްވަމުންނެވެ.