ރާއްޖޭގެ ކަނޑުގެ ސަރަހައްދު ބެލެހެއްޓުމަށް ތުރުކީން ގެނައި ތިން ޑްރޯންގެ ބޭނުން ހިފަމުން ދޭތޯ ބެލުމަށް ޑިފެންސް މިނިސްޓަރު ޣައްސާން މައުމޫން މަޖިލީހަށް ހާޒިރު ކުރުމަށް ހުށަހަޅައިފިއެވެ.
ޑްރޯންތައް ބޭނުން ކުރޭތޯ ބެލުމަށް މިނިސްޓަރު މަޖިލީހަށް ހާޒިރުކުރުމަށް އެދި ހުށަހަޅާފައި ވަނީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
އެ ސުވާލުގައި ވަނީ ސިފައިންގެ ޚިދުމަތުން ބޭނުން ކުރުމަށް 570 މިލިއަން ރުފިޔާއާ ޚަރަދުކޮށްގެން ގެނެސްފައިވާ ޑްރޯންތަކުގެ ބޭނުން ކުރަން ފަށާފައިވޭތޯއާއި އެ ޑްރޯންތައް ބޭނުން ކޮށްފައިވާ ބޭނުންތައް ސާފުކޮށްދެއްވުމަށް މީކައީލް ވަނީ ސުވާލު ކުރައްވައިފައެވެ.
އެ ޑްރޯންތައް އިފްތިތާހުކޮށްފައި މިދިޔަ މާޗް މަހުގެ 15ގައި ކަމަށްވާއިރު، ޑްރޯންތަކުގެ ދިގުމިނުގައި ހަ މީޓަރު، ފިޔަގަނޑުގައި 12 މީޓަރު ހުންނަ ގާތްގަނޑަކަށް 700 ކިލޯގެ މި ޑްރޯންތަކުގައި މުވާސަލާތީ ހިދުމަތްތަކުގެ ރޭންޖު 300 ކިލޯމީޓަރާ ހަމައަށް ހުރެއެވެ. އަދި، 150 ކިލޯގެ ޕޭލޯޑް ކެޕޭސިޓީއެއް ލިބިގެންވެއެވެ.
އެންމެ ޒަމާނީ އާލާތްތަކާ އެކު އުދުއްސޭ މި ޑްރޯންތައް 70 އާއި 120 ނޮޓުގެ ސްޕީޑުގައި 27 ގަޑިއިރަށް ވުރެ ގިނައިރު ދުއްވޭނެއެވެ. އަދި، 25،000 ފޫޓަށްވުރެ މަތިން ދުއްވުމުގެ ގާބިލުކަން ވެސް މި ޑްރޯންތަކުގައި ހުރެއެވެ.