މި ދައުރުގައި ފަސް މިލިއަން ގަސް އިންދުމަށް ރައީސް ޑރ. މުޙައްމަދު މުއިއްޒު ކަނޑައަޅުއްވާފައިވާ އަމާޒު ހާސިލުކުރުމަށް ކުރިއަށްގެންދާ މަޝްރޫއުގެ ދަށުން 3.1 މިލިއަން ގަސް އިންދުމަށް އެކި ފަރާތްތަކުން މިހާތަނަށް ހަވާލުވެފައިވާ ކަމަށް އެންވަޔަރަމަންޓް މިނިސްޓަރު ތާރިގް އިބްރާހިމް މިއަދު ވިދާޅުވެއްޖެއެވެ.
ތާރިގް އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ދުނިޔޭގެ ތިމާވެށީގެ ދުވަހު ފައްޓަވާފައިވާ ފަސް މިލިއަން ގަސް އިންދުމުގެ މަޝްރޫޢުގެ ދަށުން ޕޯޓްސް ލިމިޓެޑް (އެމްޕީއެލް) ގަސް އިންދުމުގެ ޕްރޮގްރާމެއް ފަށައިފައިވާ ކަމަށެވެ.
އޭނާ ވިދާޅުވީ އެމްޕީއެލްއިން މި މަޝްރޫޢުގެ ދަށުން އެއް މިލިއަން ގަސް އިންދުމަށް އިސްނަގައިފައިވާ ކަމަށާއި އެހެންވެ، މިހާރު ޖުމްލަކޮށް އެކި ފަރާތްތަކުން އިންދަން އެއްބަސްވެފައިވާ ގަހުގެ އަދަދު 3.1 މިލިއަނަށް އަރާ ކަމަށެވެ.
މި މަޝްރޫޢުގެ ދަށުން މިހާރު 400،000 އަށްވުރެ ގިނަ ގަސް އިންދައިފައި ވާކަންވެސް ތާރިގް ވަނީ ފާހަގަކޮށަފައެވެ. އަދި ކުރިއަށް އޮތް އަހަރުތަކުގައި ރައީސްގެ އަމާޒު ޙާޞިލުކުރުމަށް އެންމެން އެކުގައި މަސައްކަތް ކުރުމަކީ ވަރަށް ބޮޑު އެދުމެއް ކަމަށް އޭނާގެ ޕޯސްޓުގައި ވަނީ ވިދާޅުވެފައެވެ.
ފަސް އަހަރުގެ ދައުރުގައި ފަސް މިލިއަން ގަސް އިންދުމަކީ ރައީސްގެ ރިޔާސީ ވައުދުފުޅެކެވެ. އޭގެ ބޭނުމަކީ ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމާއި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް މަސައްކަތް ކުރުން ކަމަށް ސަރުކާރުން ބުނެފައިވެއެވެ.