ކެންޔާގެ ނައިބު ރައީސް ރިގަތީ ގަޗައުގުއާ މަގާމުން ދުރު ކުރުމަށް ސެނެޓުން ވޯޓު ދީފިއެވެ. ވޯޓު ދިންއިރު ގަޗައުގުއާ އޮންނެވީ އާލާސްކަންފުޅަކަށް ފަރުވާ ހޯއްދެވުމަށް ހޮސްޕިޓަލްގައި ކަމަށާއި، ޝަރީއަތުގައި ހެކިބަސް ދެއްވުމަށް ވެސް ފުރުސަތު ނުދޭ ކަމަށް އޭނާގެ ވަކީލުން ވަނީ ބުނެފައެވެ.
ސެނެޓުން އެގޮތަށް ވޯޓު ދީފައިވަނީ ގަޗައުގުއާގެ މައްޗަށް ކޮށްފައިވާ 11 ދައުވާއަށް އިންކާރުކޮށްފައިވަނިކޮށެވެ.
ސެނެޓަށް ހާޒިރުވުމަށް ގަޗައުގުއާއަށް އަންގާފައި އޮތް ނަމަވެސް ބަލިވެގެން ހޮސްޕިޓަލަށް ގެންދިއުމުން ޝަރީއަތް ލަސްކޮށްދިނުމަށް ވަކީލުން އެދުނެވެ. ނަމަވެސް، ސެނެޓުން ނިންމީ އޭނާގެ ޣައިރު ހާޒިރުގައި ވޯޓުލުން ކުރިއަށް ގެންދިއުމަށެވެ.
ގާނޫނު ހަދާ މަޖިލީހުގެ ތިރިގެ ކަމަށްވާ، ގައުމީ މަޖިލީހުގެ މެންބަރުންގެ ބޮޑު އަޣުލަބިއްޔަތަކުން ގަޗައުގުއާ މަގާމުން ވަކިކުރުމަށް މިދިޔަ ހަފުތާގައި ވަނީ ވޯޓު ދީފައެވެ.
ބުރާސްފަތި ދުވަހު 67 ސެނެޓް މެންބަރުންގެ ތެރެއިން ތިންބައިކުޅަށް ދެބައި މެންބަރުން ވަނީ ނަސްލީ ބައިބައިވުމަށް ބާރުއެޅުމާއި އަދި އޭނާގެ ހުވައާ ޚިލާފުވުން ހިމެނޭހެން އޭނާގެ މައްޗަށްކޮށްފައިވާ ފަސް ދައުވާއަކަށް ތާއީދުކޮށްފައެވެ.
ކޮރަޕްޝަނާއި މަނީ ލޯންޑަރިން ފަދަ ހަ ދައުވާއެއް އޭނާގެ މައްޗަށް ސާބިތުވެފައެއްނުވެއެވެ.
ގަޗަގޫއާއަށް ކޮށްފައިވާ ދައުވާތަކުގެ ތެރޭގައި ކޮރަޕްޝަންގެ ތުހުމަތުތަކާއި ނަސްލީ ބައިބައިވުންތަކަށް ބާރުއެޅުމާއި، ސަރުކާރާ ދެކޮޅަށް އާންމުން އެއްވެ ކުރި މުޒާހަރާއަށް ތާއީދުކުރުން ހިމެނެއެވެ.
ޝަރީއަތް ފެށުނުއިރު ގަޗަގުއާގެ ވަކީލުންގެ ތެރެއިން އެލިޝާ އޮންގޯޔާ ވިދާޅުވީ، އެ ހުރިހާ ތުހުމަތަކީ ދޮގު ތުހުމަތުތަކެއް ކަމަށެވެ.
ކެންޔާގެ ރައީސް ވިލިއަމް ރޫޓޯއާ ދެކޮޅަށް ވެސް މިދިޔަ ހަފުތާގައި ވަނީ އެފަދަ ހުށަހެޅުމެއް ހުށަހަޅައި، ގައުމީ މަޖިލީހުގެ ބޮޑު އަޣުލަބިއްޔަތަކުން ފާސްކޮށްފައެވެ.