ކެލިފޯނިއާގެ ކޮޗެލާގައި އެމެރިކާގެ އިދކޮޅު ލީޑަރު އަދި ކުރީގެ ރައީސް ޑޮނަލްޑް ޓްރަމްޕް ކެލިފޯނިއާގެ ކޮޗެލާގައި އިއްޔެ ބޭއްވި ކެމްޕޭނު ރެލީއެއް ކައިރިން ގަވާއިދާ ޚިލާފަށް ދެ ބަޑި ގެންގުޅުނު މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
އުމުރުން 49 އަހަރުގެ ވެމް މިލާ ހައްޔަރުކުރީ ކަޅު ކުލައިގެ އެސްޔޫވީއެއް ދުއްވަމުން ދަނިކޮށް ސެކިއުރިޓީ ޗެކްޕޮއިންޓަކުން ހުއްޓުވައިގެންނެވެ.
ސީކްރެޓް ސާވިސް އިން ބުނީ އެކަމުގެ ސަބަބުން ޓްރަމްޕަށް އެއްވެސް ނުރައްކަލެއް ނެތް ކަމަށާއި، މި ހާދިސާގެ ސަބަބުން ޓްރަމްޕްގެ ސެކިއުރިޓީއަށް ވެސް އެއްވެސް އަސަރެއް ނުކުރާ ކަމަށެވެ.
ކެލިފޯނިއާގެ ރިވާސައިޑް ކައުންޓީގެ އޮފިސާ ޗޭޑް ބިއަންކޯ ވިދާޅުވި ގޮތުގައި ހައްޔަރުކުރި މީހާގެ އަސްލު މަގްސަދު ހޯދުމަކީ އުނދަގޫ ކަމެކެވެ. ނަމަވެސް ޓްރަމްޕަށް ތިންވަނަ ފަހަރަށް ދޭން އުޅުނު ހަމަލާ އޭނާގެ އޮފިސަރުން ދިފާއުކޮށްފައިވާ ކަމަށް ވަރަށް ބޮޑަށް ގަބޫލުކުރައްވާ ކަމަށް ބިއަންކޯ ވިދާޅުވިއެވެ.
ފެޑެރަލް ލޯ އެންފޯސްމަންޓް އޮފިޝަލަކު ސީބީއެސް ނިއުސްއަށް ވިދާޅުވީ މި ހާދިސާއާ ގުޅިގެން ޓްރަމްޕް އަވަހާރަކޮށްލަން އުޅުނު ކަމުގެ އެއްވެސް އިޝާރާތެއް ނެތް ކަމަށެވެ. ކަމާބެހޭ ފަރާތްތަކުން އަންނަނީ އެ ހާދިސާ ތަހުގީގު ކުރަމުންނެވެ.
މިލާގެ މައްޗަށް އުފުލާފައިވަނީ ގަވާއިފާ ޚިލާފަށް ހަތިޔާރު ގެންގުޅުމުގެ ދެ ދައުވާއެއް ކަމަށާއި އޭނާ ދޫކޮށްލާފައިވަނީ 5،000 ޑޮލަރުގެ ކަފާލާތެއްގެ ދަށުން ކަމަށް ބީބިސީން ރިޕޯޓުކޮށްފައިވެއެވެ.
ހައްޔަރުކުރިއިރު، އެކި ނަންތަކުގައި ހުރި ގިނަ އަދަދެއްގެ ޕާސްޕޯޓާއި ޑްރައިވިން ލައިސަންސްތަކެއް ހުރި ކަމަށް ވެސް މިހާތަނަށް ބެލި ބެލުމުން އެނގިފައިވާ ކަމަށް ބިއަންކޯ ވިދާޅުވިއެވެ.
ޓްރަމްޕް އަވަހާރަކޮށްލުމަށް މީގެކުރިން ވެސް ވަނީ ދެ ހަމަލާއެއް ދީފައެވެ. އެހެންވެ، އޭނާގެ ސެކިއުރިޓީ ވެސް ވަނީ ވަރުގަދަކޮށްފައެވެ. އެމެރިކާގެ އަސްކަރީ ބޯޓުތަކުގެ ހިމާޔަތަށް ވެސް ޓްރަމްޕް ވަނީ އެދިވަޑައިގެންފައެވެ.
މިދިޔަ ސެޕްޓެމްބަރު މަހު ވެސްޓް ޕާމް ބީޗުގައި ހުންނަ ޓްރަމްޕް އިންޓަނޭޝަނަލް ގޯލްފް ކްލަބު ކައިރިން ޓްރަމްޕް އަވަހާރަކޮށްލަން އުޅުނު ކަމުގެ ތުހުމަތުގައި ހައްޔަރުކުރި މީހާ މިހާރު ހުރީ ޖަލުގައެވެ. އެ މީހާ ފެނިފައިވަނީ ގޯލްފް ކޯސް ކައިރީގައި ހުރި ގަސްތަކެއް ކައިރީ ފިލާ އޮއްވައެވެ.