އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ އެމެރިކާގެ ރައީސްކަން ފުރަތަމަ ފަހަރު ކުރެއްވިއިރު، ޑައިޓް ކޯކް އޯޑަރު ކުރެއްވުމަށް ފިއްތަން ހަމަޖައްސާފައިވާ ބަޓަނެއް ހުރި ކަމަށް އެމަނިކުފާނުގެ ފަރިއްކޮޅުތައް ތައްޔާރު ކުރެއްވުމަށް އުޅުއްވި ޝެފަކު ބުނެފިއެވެ.
ޓްރަމްޕް ފަރިއްކުޅުވާ ކާނާއަށް ފާޑުކިޔުން އަމާޒުވި ނަމަވެސް، ޝެފް އަންދްރޭ ރަޝް ބުނި ގޮތުގައި ޓްރަމްޕް މަސައްކަތް ކުރެއްވީ ދުޅަހެޔޮ ކާނާ ކޭންބެއްލެވުމަށެވެ.
ޕޮލިޓިކޯއާ ނޫހަށް ދިން އިންޓަވިއުއެއްގައި ރަޝް ބުނީ ޓްރަމްޕަކީ ކެއުން ބަދަލުކުރުމަށް ބޭނުންފުޅުވާ ބޭފުޅެއް ނޫން ކަމަށެވެ.
ޓްރަމްޕްގެ ކެއުމުގައި ސިއްޚަތަށް ފައިދާހުރި ކާނާގެ ބާވަތްތައް ހިމަނަން އަބަދުވެސް މަސައްކަތް ކުރާ ކަމަށާއި ނަމަވެސް އެމަނިކުފާނަކީ ކެއުމަށްފަހު ފެން ބައްލަވާ ބޭފުޅެއް ނޫން ކަމަށް ރަޝް ބުންޏެވެ. އަދި އަބަދުވެސް ބައްލަވަނީ ސޮޑާ ކަމަށް ބުންޏެވެ. އަދި ޓްރަމްޕް, ބާގާ ތަންކޮޅެއް ސިއްޚަތަށް ފައިދާހުރި ގޮތްތަކަށް ތައްޔާރުކުރެވޭތޯ ބައްލަވާ ކަމަށްވެސް ރަޝް ބުންޏެވެ.
ޓްރަމްޕަކީ އެއްވެސް ވަރަކަށް ލުއި ކާނާ ބައްލަވާ ބޭފުޅެއް ނޫން ކަމަށްވެސް ރަޝް ބުނެފައިވެއެވެ.
ރަޝް ވަނީ އެމެރިކާގެ ކުރީގެ ރައީސް ބިލް ކްލިންޓަން، ޖޯޖް ޑަބްލިއު ބުޝް، އަދި ބަރާކް އޮބާމާގެ ޝެފެއްގެ ގޮތުގައި ވެސް މަސައްކަތް ކޮށްފައެވެ. އޭގެތެރެއިންވެސް ކާނާ ތައްޔާރުކުރެއްވުމަށް އެންމެ އުދަނގޫ ބޭފުޅަކީ ޓްރަމްޕް ކަމަށާއި އެންމެ ފަސޭހަވީ އޮބާމާގެ ކާނާ ތައްޔާރުކުރުމަށް ކަމަށް ރަޝް ބުންޏެވެ.
ނޮވެމްބަރު މަހުގެ ފަސް ވަނަ ދުވަހު ބޭއްވި އެމެރިކާގެ ރިޔާސީ އިންތިޚާބު ޓްރަމްޕް ވަނީ ބޮޑު ތަފާތަކުން ކާމިޔާބުކުރައްވާފައެވެ.
އާ ރައީސްގެ ގޮތުގައި ޓްރަމްޕް ހުވާ ކުރައްވާނީ އަންނަ ޖެނުއަރީ 20 ވަނަ ދުވަހުއެވެ.