ހިންދީ ސިނަމާގެ ކުރީގެ ބަތަލާ ޖަޔާ ބައްޗަން ވަރަށް ގިނަ ދުވަސްތަކަކަށްފަހު ފިލްމަކަށް ސޮއިކޮށްފައިވާ ކަމަށް ރިޕޯޓުތައް ބުނެފިއެވެ.
ފިލްމީ ޚަބަރުތައް ބުނާގޮތުން ޖަޔާ ސޮއިކޮށްފައި ވަނީ ވިކާސް ބަލް ޑައިރެކްޓްކުރާ ސުޕަނެޗުރަލް ސައިންސް ފިކްޝަން ޖޯންރާގެ ފިލްމަކަށެވެ. ވިކާސް އަކީ ބޮޑު ކާމިޔާބީއެއް ހޯދި ބޮލީވުޑް ފިލްމު "ކުއީން"ގެ ޑައިރެކްޓަރެވެ.
ޖަޔާގެ އިތުރުން ފިލްމުން ފެންނާނެ މުހިއްމު ތަރިންގެތެރޭ ބަތަލާ ވަމީޤާ ގައްބީ އަދި އެކްޓަރު ސިންދާންތު ޗަތުރުވެދީ ހިމެނެއެވެ. ޕީޕިންގް މޫންގައި ބުނެފައިވާ ގޮތުން ސިދާންތު ފިލްމުގައި ކުޅެން ހަމަޖެހިފައި ވަނީ ލީޑް ރޯލެވެ.
ޖަޔާ ބައްޗަން ފިލްމު "ރޮކީ އޯރު ރާނީކީ ޕްރޭމް ކަހާނީ"ގެ މަންޒަރެއްގައި--ފޮޓޯ/ޕިންކްވިލާ
ޖަޔާ މި ފަހަކަށް އައިސް ބޮޑަށް ކުޅެފައި ވަނީ އާއިލީ ޑްރާމް ފިލްމުތައް ކަމަށް ވެފައި މި ފިލްމުގައި ވެސް އެ ރަހަތައް އެކުލެވޭނެ ކަމަށް ރިޕޯޓުތައް ބުނެއެވެ.
ރިޕޯޓުތައް ބުނާގޮތުން މި ފިލްމުގެ ވަރަށް ބޮޑު ބައެއް ޝޫޓުކުރަން ނިންމާފައި ވަނީ އިންޑިއާގެ ޓޫރިސްޓު މަންޒިލެއް ކަމަށްވާ ގޯއާގައެވެ.
ނަން އަދި ހާމަނުކުރާ މި ފިލްމުގެ މަސައްކަތް މި އަހަރުގެ ފަހުކޮޅު ފަށަން ތައްޔާރުވަމުން އަންނަ ކަމަށް ރިޕޯޓުތައް ބުނެއެވެ.
ފިލްމު "ކަބީ ޚުޝީ ކަބީ ޣަމް" އަދި "ކަލް ހޯނަ ހޯ"ފަދަ ފިލްމުތަކުން ފެނިފައިވާ ބަތަލާ އެންމެ ފަހުން ބެލުންތެރިންނަށް ފެނިފައި ވަނީ މިދިޔަ އަހަރު ރިލީޒްވި ދަރުމާ ކުންފުނީގެ ފިލްމު "ރޮކީ އޯރް ރާނީކީ ޕްރޭމް ކަހާނީ"އިންނެވެ. މި ފިލްމުގައި ޖަޔާ ކުޅެފައި ވަނީ ވަރަށް ޒީލަގަދަ މައިދައިތައެއްގެ ރޯލެވެ.