މި މަސް ނިމުމުގެ ކުރިން މާލޭގައި އެންމެ ފެން ބޮޑުވާ ސަރަހައްދުތަކުގައި ގާއިމުކުރާ ވަގުތީ ފެން ހިންދާ ނިޒާމުތައް ގާއިމުކުރުމުގެ މަސައްކަތް ނިންމޭނެކަމަށް ލަފާކުރެވޭ ކަމަށް ކޮންސްޓްރަކްޝަން އެންޑް އިންފްރާންސްޓަކްޗާ މިނިސްޓްރީން ރޭ ބުނެފިއެވެ.
މާލޭގައި އެންމެ ފެން ބޮޑުވާ ތިން ސަރަހައްދެއްގައި މިހާރު ވަނީ ވަގުތީ ފެން ހިންދާ ނިޒާމުތައް ގާއިމުކޮށް، ބޭނުން ކުރަން ފަށައިފައެވެ. އޭގެ ތެރޭގައި، ވެސްޓް ޕާކް ސަރަހައްދާއި ވިލިމާލެ ފެރީ ޓަމިނަލްގެ އިތުރުން އައިޖީއެމްއެޗް ސަރަހައްދު ހިމެނެއެވެ.
ޕީއެސްއެމްގެ 'ރާއްޖެ މިއަދު' ޕްރޮގްރާމުގައި ކޮންސްޓްރަކްޝަން އެންޑް އިންފްރާންސްޓަކްޗާ މިނިސްޓްރީގެ ސްޓޭޓް މިނިސްޓަރު އިބްރާހިމް ނަޒީމް ވިދާޅުވީ، މާލޭގައި އެންމެ ފެންބޮޑުވާ ހަ ސަރަހައްދެއްގައި ފެން ބޮޑުވާ ނިޒާމުތައް ގާއިމުކުރާނެ ކަމަށެވެ.
އެ ނިޒާމުތަކުގެ ތެރެއިން ތިން ނިޒާމެއް ނިމި ބޭނުންކުރަން ފަށާފައިވާއިރު، ބާކީ ތިން ސަރަހައްދުގެ މަސައްކަތް، ފެށޭނެ ކަމަށް އޭނާ ވިދާޅުވެފައިވެއެވެ.
ވަގުތީ ފެން ހިންދާ ނިޒާމުތައް ގާއިމުކުރަނީ: މި މަސް ނިމުމުގެ ކުރިން ވަގުތީ ފެން ހިންދާ ނިޒާމުތައް ނިންމަން މަސައްކަތް ކުރަނީ --- ފޮޓޯ/ މިނިސްޓަރު މުއްތޮލިބް
އެގޮތުން، މޫސުން ތަންދޭނަމަ، ރަސްފަންނު ސަރަހައްދުގައި މިރޭ ފެން ހިންދާ ނިޒާމު ގާއިމުކުރުމުގެ މަސައްކަތް ފަށާނެ ކަމަށާއި އެ މަސައްކަތް ފަށާތާ ހަފްތާއެއް ތެރޭ ނިންމާލެވޭނެ ކަމަށް ނަޒީމް ވިދާޅުވިއެވެ.
އެ ސަރަހައްދަށް ފަހު، އާޓިފިޝަލް ބީޗު ސަރަހައްދާއި ޕީއެސްއެމް ބިލްޑިން ހުންނަ ސަރަހައްދުގައި އެ މަސައްކަތް ފަށާނެ ކަން ނަޒީމް ވަނީ ފާހަގަކުރައްވާފައެވެ.
މީގެއިތުރުން، އޭނާ ވަނީ އެ ނިޒާމުތަކުގެ މަސައްކަތް މި މަހުގެ ފަހުކޮޅުގެ ކުރިން ނިންމާލެވޭ ކަމަށް ލަފާކުރައްވާފައެވެ.
އަޅުގަނޑުމެން ލަފާކުރަނީ ގާތްގަނޑަކަށް މި މަހުގެ ފަހުކޮޅާ ހަމައަށް ދާންވާއިރަށް އިރާދަކުރެއްވިއްޔާ މިހުރިހާ ޓްރެންޗްތަކުގެ ނިމިގެންދާނެ ކަމަށް. ދެން ހަމައެއާ އެއްކޮށް، ފެން ހިންދާ މާލޭގައި ވަށައިގެން ހުންނާނެ 14 ޕަންޕު. އެ 14 ޕަންޕު އަބްގްރޭޑު ކުރުމުގެ މަސައްކަތް ވެސް ދަނީ ކުރެވެމުން
ނަޒީމް ވިދާޅުވި ގޮތުގައި، މާލޭ މަގުތަކުގައި ހުރި ކާނުތައް ބެދިފައި ހުރި ކަމަށާއި އެ ކާނުތައް ބެދިފައި ހުރީ ކޮންކްރީޓް ކުނި އެޅުމުގެ ސަބަބުން ކަމަށެވެ. އަދި، އެ ތަންތަން ސާފުކޮށް މެއިންޓެއިން ކުުރުމުގައި އިހުމާލުތަކެއް ހުރި ކަން ފާހަގަކުރައްވާފައިވެއެވެ.
މާލެއަށް މޫސުން ގޯސްވެ، ބޯކޮށް ވާރޭވެހޭ ދުވަސްވަރަށް މަގުތަކުގައި ފެން ވަރަށް ބޮޑަށް ފެންބޮޑުވެއެވެ. އެ ކަމުގެ ސަބަބުން ރައްޔިތުންނަށް ގިނަ ދަތިތަކާ ކުރިމަތިލާން ޖެހެއެވެ.
ވިއްސާރަ ދުވަސްވަރުގައި މާލޭގައި ދިމާވާ ފެންބޮޑުވުމުގެ މައްސަލަ ވަގުތީ ގޮތުން ހައްލު ކުރުމަށް މަޝްރޫއެއް މިދިޔަ މެއި މަހުގެ ތެރޭގައި ވަނީ ފަށާފައެވެ. ސަރުކާރުން ބުނި ގޮތުގައި މި މަޝްރޫއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތީން ފެށި މަޝްރޫއެކެވެ.