ދިވެހިރާއްޖެއަށް ދިމާވެފައިވާ ދަރަނީގެ މައްސަލައިން އަރައިގަންނަން މާލީ ލަފައާއި ފަންނީ އެހީތެރިކަން ހޯދަން ސަރުކާރުން އެމެރިކާގެ ފާމެއް ކަމަށްވާ ސެންޓަވިއު އައްޔަންކޮށްފިއެވެ.
ދަރަނީގެ މައްސަލަ ބޮޑުވެ، 2026 ވަނަ އަހަރު ރާއްޖެއިން ދައްކަންޖެހޭ ސްކޫކަކަށް ފައިސާ ދޫނުކުރެވިދާނެކަމުގެ ބިރު އޮތީ ބޮޑުވެފައެވެ. މާލީ ހާލަތު ގޯސްވެ، ބައިނަލްއަގުވާމީ ކްރެޑިޓް ރޭޓިން އެޖެންސީތަކުން ވެސް ވަނީ ރާއްޖޭގެ ރޭޓިން ދަށްކޮށްފައެވެ.
އިންވެސްޓްމަންޓާއި މާލީ ލަފާދޭ ސެންޓަވިއު ޕާޓްނާސްއަކީ 2006 ވަނަ އަހަރު އުފައްދާފައިވާ ކުންފުންޏެކެވެ.
ރާއްޖެއިން ދަރަނީގެ ކަންކަމުގައި ލަފާ ހޯދަން އެ ކުންފުނި އައްޔަންކޮށްފައިވާ ކަމަށް 'ރެއުޓާސް'ގައި ވަނީ ރިޕޯޓުކޮށްފައެވެ. އެކަމަކު، މި ކަމާ ގުޅިގެން ސަރުކާރުގެ އިސް ތަރުޖަމާނު ހީނާ ވަލީދުއާ 'ސަން'އިން ސުވާލުކުރުމުން މިހާތަނަށް ޖަވާބެއް ދެއްވާފައެއް ނުވެއެވެ.
ވޯލްޑް ބޭންކްގެ ތަފާސްހިސާބުތައް ދައްކާ ގޮތުން ރާއްޖޭގެ ދަރަނި ވަނީ 8.2 ބިލިއަން ޑޮލަރަށް ވުރެ މަތިވެފައެވެ. އެއީ، ޖީޑީޕީގެ 116 އިންސައްތައެވެ.
ރާއްޖެއިން އެންމެ ބޮޑަށް ދަރާފައިވަނީ އަވައްޓެރި އިންޑިއާއާއި ޗައިނާއަށެވެ.
އޭގެ ފަހުން ވެސް، އިންޑިއާއިން ވަނީ ރާއްޖެއިން ދައްކަން އޮތް 50 މިލިއަން ޑޮލަރުގެ ދެ ޓްރެޝަރީ ބިލަކަށް ފައިސާ ދެއްކުން ފަސްކޮށްދީފައެވެ.
ރާއްޖޭގެ މާލީ ހާލަތު ގޯސްވެ، ބައިނަލްއަގުވާމީ އެންމެ ބޮޑު ދެ ރޭޓިން އެޖެންސީން ވަނީ ރާއްޖޭގެ ކްރެޑިޓް ރޭޓިން ދަށްކޮށްފައެވެ. އެ ގޮތުން، މޫޑީސްއިން ވަނީ ރާއްޖޭގެ ރޭޓިން 'ސީއޭއޭ2'އަށް ދަށްކޮށްފައެވެ. އޭގެ ކުރިން މިދިޔަ އޮގަސްޓު މަހުގެ 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ'އަށް ދަށްކޮށްފައެވެ.
ބޭރު ފައިސާގެ ރިޒާވް ވެސް ވަނީ 443.9 މިލިއަން ޑޮލަރަށް ވެއްޓިފައެވެ. އެއީ، މަހެއްހާ ދުވަހުގެ އިމްޕޯޓަށް ބޭނުންވާ ވަރުގެ އަދަަދެކެވެ. ބޭރުގެ ދަރަނި އަދާކުރަން މިދިޔަ ޕީޕީއެމްގެ ސަރުކާރުގައި އުފެއްދި ސޮވެރިން ޑިވޮލޮޕްމަންޓް ފަންޑުގައި ވެސް ހުރީ 65 މިލިއަން ޑޮލަރެވެ. އެއީ، އެކަށޭނަ އަދަދެއް ނޫން ކަމަށް ވޯލްޑް ބޭންކްގެ ރިޕޯޓުގައި ވަނީ ބުނެފައެވެ.
މާލީ ހާލަތާ ގުޅިގެން ކަންބޮޑުވުން ބޮޑުވި ނަމަވެސް، ސަރުކާރުން ވަނީ މި ހާލަތުން އަރައިގަނެވޭނެކަމުގެ ޔަގީންކަން ދީފައެވެ.