ކޯޓަށް ހާޒިރުކުރަން ބޭނުންވެ، މިހާތަނަށް ހާޒިރުކުރެވިފައިނުވާ ދެ މީހަކު ހޯދަން ފުލުހުން މިއަދު އިއުލާނުކޮށްފިއެވެ.
އޭގެ ތެރެއިން އެކަކަކީ ޑައިމޯފިން ޓްރެފިކްކުރުމުގެ ކުށުގެ ތުހުމަތުގައި، ބަންދުގައި ބަހައްޓައިގެން ކޯޓަށް ހާޒިރުކުރަން ފުލުހުންގެ މައްޗަށް އަމުރު ނެރެފައިވާ މީހެކެވެ. މި އަމުރާ ގުޅިގެން ހޯދަމުންދަނީ އުމުރުން 41 އަހަރުގެ މުޙައްމަދު ނަޢީމް، ވ. ސެޓެލައިޓް، މާލެއެވެ.
ފުލުހުން މިއަދު ކުރި އިއުލާނުގައި ބުނީ މުޙައްމަދު ނަޢީމް ހޯދަމުންދަނީ އޭނާގެ މައްޗަށް ހުށަހެޅިފައިވާ ޑައިމޯފިން ޓްރެފިކްކުރުމުގެ ކުށުގެ މައްސަލައާ ގުޅިގެން ކްރިމިނަލް ކޯޓަށް ހާޒިރުކުރުމަށް ބޭނުންވެ، ހާޒިރުކުރެވިފައި ނުވާތީ ކަމަށެވެ. އެގޮތުން، ބަންދުގައި ބަހައްޓައިގެން އަންނަ އަންގާރަ ދުވަހުގެ 13:00 އަށް ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކްރިމިނަލް ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ.
މުޙައްމަދު ނަޢީމް އާ ބެހޭ އެއްވެސް މައުލޫމާތެއް ލިބިފައިވާ މީހަކު ވާނަމަ ފުލުހުންގެ ކަސްޓޯޑިއަލް ނަންބަރު 9991442 އަށް ގުޅައި ހިއްސާކުރުމަށް ފުލުހުން ވަނީ އެދިފައެވެ.
ދެން ހޯދަމުންދަނީ ކޯޓަށް ހުށަހަޅާފައިވާ މައްސަލައަކާ ގުޅިގެން ކޯޓަށް ހާޒިރުކުރަން ބޭނުންވެ، ހާޒިރުކުރެވިފައިނުވާ ގދ. ވާދޫ، ޞަބާހީމަންޒިލް، އުމުރުން 25 އަހަރުގެ އިޒާމް ޒާހިރެވެ.
ދައުވާއަކާ ގުޅިގެން ކޯޓުގައި ކުރިއަށް ގެންދާ އަޑުއެހުންތަކަށް ކޯޓަށް ހާޒިރުކުރުމަށްޓަކައި ހޯދަމުންދާ އިޒާމް ޒާހިރު -- ފޮޓޯ/ ފުލުހުން
އިޒާމް ޒާހިރު ހޯދަނީ އޭނާގެ މައްޗަށް އުފުލާފައިވާ ދައުވާއަކާ ގުޅިގެން ކޯޓުގައި ކުރިއަށް ގެންދާ އަޑުއެހުންތަކަށް ކޯޓަށް ހާޒިރުކުރުމަށްޓަކައި ކަމަށް ފުލުހުން ބުންޏެވެ.
އެގޮތުން، އޭނާއާ ބެހޭ އެއްވެސް މައުލޫމާތެއް ލިބިފައިވާ މީހަކު ވާނަމަ ގދ. ވާދޫ ޕޮލިސް ސްޓޭޝަންގެ ނަންބަރު 9960159 އަށް ގުޅައި ހިއްސާކުރަން ފުލުހުން ވަނީ އެދިފައެވެ.
މިފަދަ ކަންކަމުގައި ރައްޔިތުންގެ ފަރާތުން ފުލުހުންނަށް ލިބޭ އެއްބާރުލުމަށްވަނީ ޝުކުރު އަދާކޮށްފައެވެ.