ހުޅުމާލެއިން ޕޮކެޓް ޕާކިން ޒޯންތަކުން ޖާގަ ކުއްޔަށް ހިފަން އެދި ހުށަހަޅަން ހުޅުވާލި މުއްދަތު ހައުސުން ޑިވޮލޮޕްމެންޓް ކޯޕަރޭޝަން (އެޗްޑީސީ)ން އިތުރުކޮށްދީފިއެވެ.
އެޗްޑީސީން ކުރި އިއުލާނެއްގައި ބުނީ، ހުޅުމާލޭ "ޕޮކެޓް ޕާކިން" ޒޯންތަކުން ޕާކުކުރާނެ ޖާގަ ކުއްޔަށް ހިފުމަށް އެދި ފޯމު ހުށަހަޅަން ދީފައިވާ މުއްދަތު އަންނަ ހަފުތާގެ ބުރާސްފަތި ދުވަހުގެ 14:00ގެ ނިޔަލަށް އިތުރު ކޮށްދީފައިވާ ކަމަށެވެ.
ޕޮކެޓް ޕާކިންއަށް އެދި ފޯމު ހުށަހެޅުމާ ގުޅޭ އިތުރު މައުލޫމާތު، އެޗްޑީސީގެ ވެބްސައިޓުން ލިބޭނެ ކަމަށް ވެސް އިއުލާނުގައި ވަނީ ބުނެފައެވެ. އަދި، އިތުރު މައުލޫމާތު ސާފުކުރެއްވުމަށް އެ ކޯޕަރޭޝަނުގެ ނަންބަރު 1516 އަށް ގުޅަން ވަނީ އެދިފައެވެ.
ހުޅުމާލެއިން ޕޮކެޓް ޕާކިންގެ ގޮތުގައި 1،300 ޖާގަ ކުއްޔަށް ދޫކުރަން އެޗްޑީސީން ހުޅުވައިލީ މިދިޔަ ސެޕްޓެމްބަރު މަހުގެ 17 ވަނަ ދުވަހުއެވެ. މި ޕާކިން ޖާގަތައް އެއް އަހަރަށް ކުއްޔަށްދޭއިރު، މަހު ކުލީގެ ގޮތުގައި 2،000 ރުފިޔާ ދައްކަން ޖެހޭނެއެވެ.
ޕޮކެޓް ޕާކިންއަށް އެދި ހުށަހަޅާ ފަރާތްތަކުގެ ތެރެއިން ޖާގަ ލިބޭ ފަރާތްތައް ކަނޑައަޅާނީ ފޯމު ހުށަހަޅާ ފަރާތްތަކުގެ މެދުގައި ކުރިއަށްގެންދާ ގުރުއަތަކުން ކަމަށް އެޗްޑީސީން ވަނީ ބުނެފައެވެ.