އިންޑިއާގެ އެހީގައި އުތުރުތިލަފަޅުގައި ތަރައްގީކުރަމުން އަންނަ ސިފައިންގެ ބަނދަރާއި ޑޮކްޔާޑުގެ މަސައްކަތް ތާވަލާ އެއްގޮތަށް ނިންމަން އެ ގައުމާ އެކު ދިވެހި ސަރުކާރުން އެއްބަސްވެއްޖެއެވެ.
އެ މަޝްރޫއަކީ ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި ފެށި މަޝްރޫއެކެވެ. އޭރު އެ މަޝްރޫއު ފެއްޓުމުން ޕީޕީއެމް/ޕީއެންސީގެ ބައެއް ބޭފުޅުން ވަރަށް ބޮޑަށް ނުރުހުން ފާޅުކުރިއެވެ. އަދި، އެއީ އެ ތަނުގައި އިންޑިއާގެ އަސްކަރީ މަރުކަޒެއް ގާއިމުކުރަން ކުރަމުންދާ ކަމެއްގެ ގޮތުގައި ސިފަކުރިއެވެ.
ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން އެ ގައުމުގެ ބޮޑުވަޒީރު ނަރެންދުރަ މޯދީއާ އެކު މިދިޔަ ހޯމަ ދުވަހު ވަނީ ބައްދަލުކުރައްވާފައެވެ. އެ ބައްދަލުވުމުގައި މަޝްވަރާކުރެއްވި ކަންތައްތަކުގެ ތަފުސީލުތައް ރައީސް އޮފީހުން ވަނީ ހާމަކޮށްފައެވެ.
އޭގެ ތެރޭގައި އުތުރުތިލަފަޅުގައި އިންޑިއާގެ އެހީގައި ތަރައްގީކުރަމުން އަންނަ ބަނދަރު ވެސް ހިމެނެއެވެ.
އެ ގޮތުން، އެ ތަނުގައި ތަރައްގީކުރަމުން އަންނަ ސިފައިންގެ ބަނދަރު 'އެކަތަ'އިގެ ސަބަބުން ސިފައިންގެ އޮޕަރޭޝަނަލް ގާބިލިއްޔަތުކަން ވަރަށް ބޮޑަށް އިތުރުކުރެވޭނެ ކަމަށާއި ދެ ގައުމުން ގުޅިގެން ވަގުތަށް އެ މަސައްކަތް ނިންމަން އެއްބަސްވެފައިވާ ކަމަށް ރައީސް އޮފީހުން ބުންޏެވެ.
މީގެ އިތުރުން ވެސް، އިންޑިއާގެ އެހީގައި ސިފައިންގެ ސާވޭލަންސް އަދި މޮނިޓަރިންގެ ފެންވަރު ރަނގަޅުކުރުމުގެ ގޮތުން އިތުރު ރާޑަރު ސިސްޓަމްތަކެއް ގާއިމުކުރަން ވަނީ އެއްބަސްވެފައެވެ.
އިންޑިއާގެ މާލީ އެހީގައި އުތުރުތިލަފަޅުގައި ތަރައްގީކުރާ ބަނދަރުގެ މަސައްކަތް ހަވާލުކުރީ އިންޑިއާގެ އާރުވީއެންއެލް ކުންފުންޏާއެވެ. އެއީ، 2.9 ބިލިއަން ރުފިޔާގެ މަޝްރޫއެކެވެ.
ފާހަގަކޮށްލެވޭ ގޮތުގައި އުތުރުތިލަފަޅުގައި ޗައިނާއާ ގުޅިގެން ދަނޑުވެރިކަމުގެ މަޝްރޫއެއް ހިންގަން ވެސް މި ސަރުކާރުން އެއްބަސްވުމެއް ހަދާފައިވެއެވެ.
ރައީސްގެ އިންޑިއާ ދަތުރުފުޅާ ގުޅިގެން އިދިކޮޅު ފަރާތްތަކުން އަންނަނީ ވަރަށް ބޮޑަށް ފާޑުކިޔަމުންނެވެ. ޚާއްސަކޮށް، އެ މަނިކުފާނު ނިސްބަތްވާ ޕީއެންސީގެ ބޭބޭފުޅުން ކުރިން ކުރައްވާފައިވާ ތުހުމަތުތައް އަންނަނީ މީސްމީޑިއާގައި ދައުރުކުރަމުންނެވެ.
އެކަމަކު، ރައީސް މުއިއްޒު ވަނީ އިންޑިއާ ދަތުރުފުޅުގައި މިނިވަންކަން ގެއްލުންވާނެ އެއްވެސް ކަމެއް ނުކުރައްވާ ކަމަށް ވިދާޅުވެފައެވެ.
ކ. ތިލަފުށިން އުތުރުތިލަފަޅަށް ގިރާވަރު މެދުވެރިކޮށް ބްރިޖެއް އެޅުމަށް ފީސިބިލިޓީ ދިރާސާ ހަދަން އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ)ގެ އިސްވެރިންނާ އެކު އިންފްރާސްޓްރަކްޗާ މިނިސްޓްރީން މީގެ ކުރިން މަޝްވަރާކޮށްފައި ވެސް ވެއެވެ.