ހުޅުމާލޭ ދެވަނަ ފިޔަވަހީގެ ކޭބަލްތަކެއް ވަގަށް ނަގާފައިވާ ކަމަށާއި އެސަރަހައްދުގެ މަގުތައް ރޭގަނޑު އަލިނުކުރެވެނީ އެކަމުގެ ސަބަބުން ކަމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ފަޒުލް ރަޝީދު މިއަދު ވިދާޅުވެއްޖެއެވެ.
އެމްޑީ ފަޒުލް އެފަދައިން ވިދާޅުވެފައި ވަނީ ހުޅުމާލޭ ދެވަނަ ފިޔަވަހީގެ މަގުތައް އަނދިރިކޮށް އޮންނާތީ ހުޅުމާލެ އުތުރު ދާއިރާގެ މެންބަރު ހުސެން ޝަރީފް ހިތްހަމަނުޖެހުން ފާޅުކުރައްވާފައި ވަނިކޮށެވެ.
އެގޮތުން، މެންބަރު ޝަރީފް ވަނީ ހުޅުމާލޭ ދެވަނަ ފިޔަވަހީގެ މަގުތައް އަނިދިރިކޮށް އޮންނާތީ އެކަމާ ކަންބޮޑުވުން ފާޅުކޮށް މީހަކު އޭނާއަށް ފޮނުވި ސްކީންޝޮޓެއް ފޭސްބުކްގައި އާންމުކޮށްފައެވެ. އެ މެސެޖުގައި ވަނީ ހުޅުމާލޭ ފޭސް ދޭއްގެ މަގުތައް އަލިކުރުމަށް އެޗްޑީސީން ކުރަމުން އަންނަ މަސައްކަތްތައް ސާފުކޮށްދޭން އެދިފައެވެ.
މެސެޖާއި ގުޅުވައި މެންބަރު ހުސެން ޝަރީފް ވަނީ 'މަތިބަރު' އެޗްޑީސީއަށް ކޮށްދެވުނީ ކޮން ޚިދުމަތެއްތޯ ސުވާލު އުފައްދަފާއެވެ.
އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު: ހުޅުމާލެ ދެވަނަ ފިޔަވަހީގެ ކޭބަލްތަކެއް ވަގަށް ނަގައިފި ---- ސަން ފޮޓޯ/ އަމަން ލަތީފް
މެންބަރު އެފަދައިން ސުވާލު އުފައްދަވާފައިވަނިކޮށް ފަޒުލް ވިދާޅުވީ، މަގުބައްތިތައް ދިއްލުމަށް ބޭނުންވާ ކަރަންޓު ވިއުގަ އޮގަސްޓު މަހުގެ ނިޔަލަށް ނިމިފައިވާ ކަމަށެވެ. ނަމަވެސް، މަގު ބައްތިތަކަށް އަޅާފައިވާ ކޭބަތައް ގެއްލިފައިވާ ކަމަށާއި ވިނަރެސް އޭރިއާގެ މަގު ބައްތިތައް ދިއްލުމަށް ބޭނުންވާ ތަކެތި ހޯދަން އޯޑަރު ދީފައިވާ ކަމަށް ފަޒުލް ވިދާޅުވިއެވެ.
އޭގެއިތުރުން، ހުޅުމާލޭގެ ޑިވެލޮޕްމަންޓު ހުއްޓުމެެއްނެތި ކުރިއަށްދާ ކަމަށާއި ކުރަން ހުރި މަސައްކަތްތާއި ނުކުރެވި ހުރި މަސައްކަތްތައް ހުންނާނެ ކަން ގަބޫލު ކުރަންވާނެ ކަމަށް ދެކޭ ކަމަށް ފަޒުލް ވިދާޅުވެފައިވެއެވެ.