ރައީސް ޑރ. މުހައްމަދު މުއިއްޒު އަވަހާރަކޮށްލާނެކަމުގެ އިންޒާރު ދިން މީހާ ރޭގެ ވަގުތެއްގައި ރާއްޖެ އައުމާ އެކު ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
އެ މައްސަލައިގައި ހައްޔަރުކޮށްފައިވަނީ ގ. ސަންސަންގެއާގެ، އަބްދުﷲ މިޔާދު (40އ)އެވެ.
އޭނާ ވަނީ މީސްމީޑިއާގައި ރައީސް މުއިއްޒު އަވަހާރަކޮށްލާނެ ކަމަށް ބުނެ އިންޒާރު ދީފައެވެ. އޭގެ އިތުރުން ވެސް ސިޔާސީ ބައެއް ބޭފުޅުންނަށް އޭނާ އިންޒާރު ދީފައިވާއިރު އެއް ޖިންސުން ގުޅުން ހިންގަން ހިތްވަރުދީ ވެސް އޭނާ މީސްމީޑިއާގައި ޕޯސްޓްކުރާ ކަމަށް ތުހުމަތުކުރެވެއެވެ.
ފުލުހުން މިއަދު ބުނީ، އޭނާ ރާއްޖެއިން ބޭރުގައި ހުރެފައި ރޭގެ ވަގުތެއްގައި ރާއްޖެ އައުމާ އެކު ހައްޔަރުކޮށްފައިވާ ކަމަށެވެ.
ފުލުހުން އޭނާގެ މައްޗަށް ސީރިއަސް ތުހުމަތުތަކެއް ކުރެއެވެ. އެ ގޮތުން، ރައީސް މުއިއްޒާއި ދައުލަތުގެ އެކި ފެންވަރުގެ ވެރިން އަވަހާރަކޮށްލަން ޖެހޭ ކަމަށް ބުނެ، މީސްމީޑިއާގައި ޕޯސްޓްކުރާ ކަމަށް ތުހުމަތުކުރެއެވެ.
މިޔާދު ގެންގުޅޭ ކަމަށް ތުހުމަތުކުރެވޭ ފޭސްބުކް އެކައުންޓުން މީހުންނަށް އެކި ކަހަލަ އިންޒާރު ދީ، ހަޑިހުތުރު ބަހުން މުއާމަލާތްކޮށް، އެއް ޖިންސުން ގުޅުން ހިންގަން ހިތްވަރު ދީފައިވާ ކަމަށް ފުލުހުން ބުންޏެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ.