ފިހާރައިގެ ކައުންޓަރު މަތިން ފޯނެއް ވަގަށް ނެގުމުން ނުވަ މަހަށް ޖަލަށް

ފިހާރައެއްގެ ކައުންޓަރު މަތީގައި އޮތް ފޯނެއް ވަގަށް ނެގި މީހަކު ނުވަ މަހަށް ޖަލަށްލާން ކްރިމިނަލް ކޯޓުން ހުކުމް ކޮށްފިއެވެ.

މި މައްސަލައިގެ ހުކުމް އިއްވާފައިވަނީ މާލޭ ގ. ކަނދުމާގެއާގޭ ސަމާހް އަލީގެ މައްޗަށެވެ.

ސަމާހްގެ މައްޗަށް ކޮށްފައިވާ ދައުވާގައިވަނީ 2022ވަނަ އަހަރު ފުލުހުން މާލެތެރެ ޕެޓްރޯލް ކުރަމުންދަނިކޮށް، އަމީނީމަގުގައި ހުންނަ ރެހެންދި ފްލެޓު ކައިރިން ފުލުހުންނަށް އޭނާ ފެނުނު ވަގުތު، ބިރުގަނެ ފިލަން މަސައްކަތް ކުރުމުން ފުލުހުންގެ ބެލުމުގެ ދަށަށް އޭނާ ގެންދިޔަ ކަމަށެވެ. އަދި އޭނާ ބަލައިފާސްކުރިއިރު، ސެމްސަންގް ބްރޭންޑުގެ އެސް10 ފޯނެއް އޭނާގެ އަތުން ފެނިފައިވާ ކަމަށެވެ. އެއީ ގާކޮށި މާޓު ނަމަކަށް ކިޔާ ފިހާރައިން ބޭނުންކުރާ ފޯނެއް ކަމަށް ހުކުމުގައި ވެއެވެ.

މި މައްސަލައިގައި ފުލުހުން ބުނި ގޮތުގައި ސަމާހް ބަލައިފާސްކުރުމުގެ ތެރެއިން އޭނާގެ އަތުން އެސް10އާއި އަދި އިތުރު ފޯނެއް ވެސް ވަނީ ފެނިފައެވެ.

އެ ފިހާރައިގައި މަސައްކަތްކުރާ މީހަކު ހެކިބަސް ދެމުން ބުނީ ސަމާހް ފިހާރައަށް އައީ ސުޕާރީ ގަންނަން ކަމަށާއި، ކައުންޓަރު މަތީގައި އޮތް ފޯނު ވަގަށް ނެގިކަން އެނގުނީ، އޭނާއާ އެކު ފުލުހުން އެ ފޯނު ހިފައިގެން ފިހާރައަށް އައުމުން ކަމަށެވެ.

މި މައްސަލައިގައި ސަމާހްގެ މައްޗަށް ކޮށްފައިވަނީ މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.

މި މައްސަލައިގައި ސަމާހްވަނީ އޭނާގެ މައްޗަށްކޮށްފައިވާ ދައުވާއަށް ކޯޓުގައި އިންކާރުކޮށްފައެވެ. އެހެން ނަމަވެސް މައްސަލައިގައި އޭނާއަށް ދިން ފުރުސަތުގައި އެއްވެސް ހެއްކެއް ހުށަހަޅާފައެއް ނުވެއެވެ.

އޭނާ ވަގަށް ނެގި ފޯނުގެ އަގު 5،000 ރުފިޔާއަށްވުރެ މަތިކަން އެނގޭ ކަމަށް ކޯޓުން ބުނެފައިވެއެވެ.

މި މައްސަލައިގައި ސަމާހްގެ މައްޗަށް ކޮށްފައިވާ ދައުވާ، ޝައްކެއް ނެތް މިންވަރަށް ސާބިތުވެފައިވާ ކަމަށް ކަނޑައަޅައި، ކޯޓުން އޭނާގެ މައްޗަށް ހުކުމް ކުރީ ނުވަ މަހާއި ދެ ދުވަހުގެ ޖަލު އަދަބެއް ތަންފީޒުކުރުމަށެވެ.