މަސްތުވާތަކެތީގެ މައްސަލަ ބޮއްސުންލައިފައިވާ މެކްސިކޯގައި، ސިޓީއެއްގެ މޭޔަރަކު، މަގާމާ ހަވާލުވެވަޑައިގެންނެވިތާ ހަފުތާއެއް ނުވަނީސް މަރާލައިފިއެވެ.
އަލެޖެންޑްރޯ އާކޯސް މަރުވެފައި އޮއްވާ ފެނުނީ ހުކުރު ދުވަހު، ހުޅަނގު ދެކުނުގެ ގުއެރެރޯ ސްޓޭޓްގެ ގާތްގަނޑަކަށް 280،000 މީހުން ދިރިއުޅޭ ޗިލްޕަންސިންގޯ ސިޓީގައެވެ. އޭނާ މޭޔަރުކަމާ ހަވާލުވެވަޑައިގެންފަހުން އަދި ހޭދަވީ ހަ ދުވަހެވެ.
އެ ހާދިސާއާ ގުޅިގެން އެ ސްޓޭޓްގެ ގަވަރުނަރު އެވްލީން ސަލްގާޑޯ ވިދާޅުވީ މޭޔަރު މަރުވުމުން އާންމު ރައްޔިތުން ތިބީ ވަރަށް ބޮޑު ހިތާމައެއްގައި ކަމަށެވެ. އާކޯސް މަރާލާފައި ވަނީ ސިޓީ ސަރުކާރުގެ އާ ސެކްރެޓަރީ ފްރާންސިސްކޯ ޓަޕިއާ ބަޑިޖަހައި މަރާލިތާ ތިން ދުވަސް ފަހުންނެވެ.
ތަހުގީގުގެ ތަފްސީލެއް، ނުވަތަ ޝައްކު ކުރެވޭ މީހުންގެ ތަފްސީލެއް ވެސް ކަމާބެހޭ ފަރާތްތަކުން މިހާތަނަށް ހާމަކޮށްފައެއް ނުވެއެވެ. ނަމަވެސް ގުއެރެރޯ އަކީ މަސްތުވާތަކެތީގެ މައްސަލަތަކުގައި އެންމެ ބޮޑަށް އަސަރުކުރާ އެއް ސްޓޭޓް ކަމަށާއި މަސްތުވާތަކެތި ބޭނުންކުރާ ގްރޫޕްތަކުން އެ ގައުމުގެ ސިޔާސީ ގިނަ ބަޔަކު މަރާލާފައި ކަމަށް ރޮއިޓާސް އިން ރިޕޯޓުކުރެއެވެ.
އާކޯސްގެ ސޯޝަލް މީޑިއާ ޕޯސްޓްތަކުން ފެނުނު ގޮތުގައި އެ ދުވަހު އޭނާ އޮފީހުގައި ހޭދަކުރީ މިދިޔަ މަހު ކުރިމަތިވި ތޫފާން ޖޯން އަށް ފަހު ބޮޑު ދިމާވި ފެންބޮޑުވުމުގެ ހާދިސާއާ ގުޅިގެން ޑިޒާސްޓާ ރިލީފް މަސައްކަތްތައް ސުޕަވައިޒް ކުރުމުގައެވެ.
އޭނާ މަރާލުމުގެ އެއް ގަޑިއިރު ކުރިން ވެސް ވަނީ ރިލީފް ވޯކަރުންނާއި ރައްޔިތުންނާއެކު ބޭއްވި ބައްދަލުވުންތަކުގެ ފޮޓޯތައް ފޭސްބުކް އެކައުންޓުގައި އާންމުކޮށްފައެވެ.
އާކޯސް މަރާލުމާ ގުޅިގެން އޭނާގެ އިންސްޓިޓިއުޝަނަލް ރިވޮލިއުޝަނަރީ ޕާޓީން ވަނީ އިންސާފު ހޯދައިދިނުމަށް ގޮވާލައިފައެވެ.
ގުއެރެރޯ އަކީ ޕެސިފިކް ކަނޑުގެ އައްސޭރިފަށުގެ ސްމަގްލިން ރޫޓުތަކުގެ ސަބަބުން އެންމެ ބޮޑަށް އަސަރުކުރާ އެއް ސްޓޭޓް ކަމަށާއި ޗިލްޕަންސިންގޯ އަކީ ގިނަ ދުވަސްތަކެއް ވަންދެން މަސްތުވާތަކެތީގެ ދެ ގޭންގު ކަމަށްވާ އާޑިލޯސް އާއި ޓްލާކޯސް އާއި ދެމެދު ހަމަނުޖެހުން ހިނގަމުން އަންނަ ސްޓޭޓެކެވެ.
ޖޫން މަހުގެ ދެވަނަ ދުވަހު މެކްސިކޯގައި ބޭއްވި އިންތިޚާބުގެ ކުރިން އެ ސްޓޭޓުގައި އާންމު މަގާމުތަކަށް ކުރިމަތިލީ ގާތްގަޑަކަށް ހަ ކެންޑިޑޭޓުން މަރާލާފައިވެއެވެ.
ދެހާސް ހަވަނަ އަހަރު މަސްތުވާތަކެތީގެ ވިޔަފާރިއާ ދެކޮޅަށް ސިފައިން ހަރަކާތްތެރިވާން ފެށި ފަހުން މުޅި މެކްސިކޯގައި 450،000 އަށް ވުރެ ގިނަ މީހުން މަރާލާފައިވާއިރު، އެތައް ބަޔަކު ވަނީ ވީނުވީއެއް ނޭގި ގެއްލިފައެވެ.