މެކްސިކޯގެ އުތުރުގެ ކޯހުއިލާ ސްޓޭޓްގެ ޓޮރިއޯންގައި ހުންނަ ސެކަންޑަރީ ސްކޫލް ނަންބަރު 13 އަށް ދިން ނުރައްކާތެރި ހަމަލާއަކާ ގުޅިގެން، އަނިޔާވެރިކަމާއި ކުށްވެރި އަމަލުތަކަށް ހިތްވަރުދޭ މައުލޫމާތާއި ކޮންޓެންޓް ސޯޝަލް މީޑިއާ މެދުވެރިކޮށް ފެތުރުން ހުއްޓުވުމަށް ގާނޫނީ ބިލެއް ހުށަހެޅުމަށް މެކްސިކޯ ސަރުކާރުން ނިންމައިފިއެވެ.
މެކްސިކޯގެ ރައީސް ކްލޯޑިއާ ޝެއިންބޯމް ބޭއްވެވި ނޫސްވެރިންގެ ބައްދަލުވުމެއްގައި ވިދާޅުވީ، އަންނަ ހަފުތާގައި މަޖިލީހަށް ހުށަހެޅުމަށް ތައްޔާރުވާ މި ބިލުގެ މައިގަނޑު މަގުސަދަކީ އަނިޔާވެރި އަމަލުތައް މީޑިއާތަކުގައި އިޝްތިހާރުކުރުމާއި ފެތުރުން ހުއްޓުވުމަށްޓަކައި ޑިޖިޓަލް ޕްލެޓްފޯމްތަކުން ވެސް ޒިންމާ ނަގަންޖެހޭ ގޮތް ހެދުމެވެ. އަދި ކުޑަކުދިންނާއި ޒުވާނުން އަނިޔާވެރިކަމަށް ހުށަހެޅުމުން ރައްކާތެރިކުރުމަށްޓަކައި ހަދާ މި ގާނޫނަށް އަމަލުކުރުން ސޯޝަލް މީޑިއާ ޕްލެޓްފޯމްތަކަށް ލާޒިމުވާނެ ކަމަށާއި، މިކަމުގައި ޕްލެޓްފޯމްތަކާއެކު މަޝްވަރާކުރުމުގެ ފުރުސަތު ވެސް ހުޅުވާލެވިފައިވާ ކަމަށް ރައީސް ވިދާޅުވިއެވެ.
މި ފިޔަވަޅު އަޅަން ނިންމާފައިވަނީ ޓޮރިއޯންގެ ސެކަންޑަރީ ސްކޫލަށް ދެވުނު ހަމަލާގައި އެ ސްކޫލުގެ ޑެޕިއުޓީ ޕްރިންސިޕަލް ނިޔާވެ، އިތުރު މީހުންނަށް އަނިޔާވުމާ ގުޅިގެންނެވެ. މި ހަމަލާ ދީފައިވަނީ އެ ސްކޫލުގެ ކުރީގެ ދެ ދަރިވަރުން ކަމަށްވާ 18 އަހަރުގެ ދެބެއިން ކަމަށްވާ އިރު، އެ މީހުން ވަނީ ހަމަލާ ދިން ސަރަހައްދުން ފުލުހުންގެ ބެލުމުގެ ދަށަށް ގެންގޮސްފައެވެ. ސިއްހީ އަދި ތަހުގީގީ އިދާރާތަކުން މަޢުލޫމާތު ދޭ ގޮތުގައި މި ހަމަލާގައި ޑެޕިއުޓީ ޕްރިންސިޕަލްގެ އިތުރުން ހަތަރު މީހަކަށް އަނިޔާވެފައިވެއެވެ.
ދުނިޔޭގެ އެކި ގައުމުތަކުގައި ސޯޝަލް މީޑިއާގެ އަނިޔާވެރި ކޮންޓެންޓް ކޮންޓްރޯލްކުރުމަށް ފިޔަވަޅުތައް އަޅަމުންދާއިރު، އޮސްޓްރޭލިއާ، ޔުނައިޓެޑް ކިންގްޑަމް އަދި ޔޫރަޕިއަން ޔޫނިއަންގައި ވެސް ވަނީ މިފަދަ ކޮންޓެންޓްތައް ނެގުމަށް ޕްލެޓްފޯމްތަކަށް ލާޒިމުކުރާ ގާނޫނުތައް ފާސްކޮށްފައެވެ. އަދި ލެޓިން އެމެރިކާގެ ގައުމުތަކުގެ ތެރެއިން ބްރެޒިލްގެ ސުޕްރީމް ކޯޓުން 2025 ވަނަ އަހަރު ވަނީ އަނިޔާވެރިކަމަށް ހިތްވަރުދޭ ކޮންޓެންޓްތައް ނެގުމަށް ސޯޝަލް މީޑިއާ ކުންފުނިތަކުގެ މައްޗަށް އަމުރުކޮށްފައެވެ.
މީގެއިތުރުން އާޖެންޓީނާ، ޗިލީ އަދި ކޮސްޓާ ރިކާ ފަދަ ގައުމުތަކުގައި ވެސް ކުޑަކުދިން ސޯޝަލް މީޑިއާ ބޭނުންކުރުމުން ރައްކާތެރިކުރުމަށާއި، ބެލެނިވެރިންނާއި ކުޑަކުދިންނަށް އަމާޒުކޮށް ފަތުރާ ޖިންސީ އަދި އަނިޔާވެރި މައުލޫމާތުތައް ބްލޮކްކުރުމަށް ގާނޫނުތައް އެކުލަވާލުމުގެ މަސައްކަތް ދަނީ ކުރަމުންނެވެ.