މި އަހަރު ރިލީޒްކުރުމަށް ތާވަލުކުރެވިފައިވާ ފިލްމުތަކުގެ ތެރެއިން އެންމެ ގިނަ ބަޔަކު އިންތިޒާރުކުރާ ފިލްމު "ސިންގްހަމް އަގެއިން"ގެ ޓްރެއިލާ ދައްކާލައިފިއެވެ.
ފިލްމުގެ ޓްރެއިލާ ރިލީޒްކޮށްފައި ވަނީ އިންޑިއާގެ މުމްބާއީގައި ވަރަށް ކުލަގަދަކޮށް ބޭއްވި ހާއްސަ ހަފުލާއެއްގައެވެ. ފިލްމުން ފެންނަ ވަރަށް ގިނަ ކާސްޓުން ބައިވެރިވި މި ހަފްލާގައި, ލީޑް ތަރިން ކަމަށްވާ އަޖޭ ދޭވްގަން، ކަރީނާ ކަޕޫރު އަދި އަރުޖުން ކަޕޫރު ވެސް ވަނީ ބައިވެރިވެފައެވެ.
އަންނަ މަހުގެ އެއް ވަނަ ދުވަހު ސިނަމާތަކަށް ގެންނަން ނިންމާފައިވާ "ސިންގްހަމް އަގެއިން" އަކީ ޑައިރެކްޓަރު ރޯހިތު ޝެޓީގެ ފިލްމު ކުންފުނި ކޮޕް ޔުނިވާސްއިން ގެނެސްދެމުން އަންނަ މަޝްހޫރު ފްރެންޗައިސް "ސިންގްހަމް"ގެ ތިން ވަނަ ބައެވެ.
'ސިންގްހަމް އަގެއިން'ގެ ޓްރެއިލާ ރިލީޒްކުރި ހަފްލާގައި ފިލްމުގެ ބައެއް ކާސްޓުން އަދި ޑައިރެކްޓަރު ރޯހިތު ޝެޓީ--ފޮޓޯ/ފިލްމުފެއަ
މި ފިލްމުގެ ޓްރެއިލާ ރިލީޒްކުރާ ހަފްލާއިން ބަތަލާ ދީޕިކާ ޕަދުކޯން ފެންނާނެ ކަމަށް ގިނަ ބަޔަކު އުއްމީދުކުރި ނަމަވެސް ދީޕިކާގެ ބަދަލުގައި ފެނުނީ ރަންވިރު ސިންގްއެވެ. ފިލްމު "ސިންގްހަމް އަގެއިން"އިން ރޯހިތުގެ ކޮޕް ޔުނިވާސްގެ ފިލްމުތަކުގައި ފުލުހުންގެ ރޯލް ކުޅެފައިވާ ކެރެކްޓާތަކުގެ މަންޒަރުތައް ވަނީ ހިމަނާފައެވެ.
ފިލްމުގެ ޓްރެއިލާ ރިލީޒްވުމާ އެކު ގިނަ ބަޔަކު ބުނެފައި ވަނީ މިއީ ވައިއާރް އެފްގެ ސްޕްއި ޔުނިވާސްއިން ގެނެސްދިން ރެކޯޑު މުގުރާލި ފިލްމު "ޕަތާން"އަށް ދޫކުރާވަރުގެ ފިލްމެއް ނޫންކަމަށެވެ.
އަކްޝޭ ކުމާރު، ރަންވީރު ސިންގް، ޓައިގާ ޝްރޮފް އަދި ޖެކީ ޝްރޮފް މުހިއްމު ރޯލްތަކުން ފެންނާނެ މި ފިލްމު ކުރީގެ ދެ ފިލްމަށްވުރެ މާ ވަރުގަދަވެފައި ފިލްމުގައި ފެންނަ އެކްޝަން ސީންތައް މާ ވަރުގަދަވާނެ ކަމަށް ބެލުންތެރިން ވަނީ ބުނެފައެވެ.