މިދިޔަ އާދިއްތަ ދުވަހު ރާއްޖެ އައި ސޯނަމް ކަޕޫރުގެ ފަހަތުން އޭގެ އެއް ދުވަސް ފަހުން ސޯނަމްގެ ކޮއްކޮ ރިއާ ކަޕޫރުގެ ދެމަފިރިން ވެސް ރާއްޖެ އަތުވެއްޖެއެވެ.
ރިއާ ކަޕޫރު ސޯޝަލް މީޑިއާގައި ކޮށްފައިވާ ޕޯސްޓުތަކުން ދޭހަވާ ގޮތުގައި މި ދަތުރަކީ ރިއާގެ ފިރިމީހާ ކަރަން ބޫލާނީގެ އުފަންދުވަސް ފާހަގަކުރުމުގެ ބޭނުމުގައި ކުރި ދަތުރެކެވެ. ރިއާއާއި ފިރިމީހާ ކަރަން ބޫލާނީ ވެސް ޗުއްޓީ ހޭދަކުރަމުން އަންނަނީ ސޯނަމްގެ ދެމަފިރިންނާއި ކުޑަކުޑަ ދަރިފުޅު ޗުއްޓީ ހޭދަކުރަމުން އަންނަ ވަން އެންޑް އޮންލީ ރީތި ރަށް ރިސޯޓުގައެވެ.
ރިއާ ކަޕޫރު ފިރިމީހާ ކަރަންއާ އެކު--ފޮޓޯ/ކޮއިމޮއި
މިއީ މި އަހަރު ރިއާ ރާއްޖެއަށް ކުރި ދެވަނަ ދަތުރެވެ. ރިއާ ވަނީ ފިރިމީހާ ކަރަންއާ އެކު ދެމީހުންގެ ކައިވެންޏަށް ތިން އަހަރު ފުރުން ފާހަގަކުރުމަށް ރާއްޖެއަށް އައިސްފައެވެ. މިދިޔަ އޮގަސްޓް މަހު ދެމަފިރިން ކުރި ދަތުރުގައި ޗުއްޓީ ހޭދަކޮށްފައިވަނީ ރާއްޖޭގެ ރިސޯޓެއް ކަމަށްވާ ސިކްސް ސެންސެސް ކަނުހުރާގައެވެ.
ރިއާގެ އިތުރުން ކަރަން ބޫލާނީއަކީ ވެސް ފިލްމު ޕްރޮޑިއުސަރެކެވެ. ކަރަންގެ ފިލްމު ޑައިރެކްޝަނަށް ތައާރަފުވުމަށް އަލަށް ޑައިރެކްޓްކުރި ފިލްމު "ތޭންކް ޔޫ ފޯ ކަމިންގް"އަށް ވަނީ މި އަހަރުގެ ޑެބިއު ޑައިރެކްޓަ ކެޓަގަރީގެ އެވޯޑު ލިބިފައެވެ.