ސްޓެލްކޯއިން ތަރައްގީކުރާ އިލެކްޓްރިކް ވެހިކަލް ޗާޖިން ސްޓޭޝަން (އީވީ ސްޓޭޝަން)އަކީ ތިމާވެއްޓާ ރައްޓެހި މުޖުތައުއެއް ބިނާކުރުމުގައި މުހިންމު ދައުރެއް އަދާކުރާނެ ވަސީލަތެއް ކަމަށް އެ ކުންފުނީގެ މެނޭޖިން ޑިރެކްޓަރު ޙުސައިން ފަހުމީ މިއަދު ވިދާޅުވެއްޖެއެވެ.
އިލެކްޓްރިކް ވެހިކަލްތައް ޗާޖު ކުރެވޭ ސްޓޭޝަނެއް މާލޭގައި ތަރައްގީ ކުރުމުގެ މަސައްކަތް ސްޓެލްކޯއިން ފެށީ ރައީސް ޑރ. މުޙައްމަދު މުއިއްޒު ގެންގުޅުއްވާ ތިމާވެށީގެ ހަރުދަނާ ސިޔާސަތުގެ ދަށުންނެވެ.
މި ސްޓޭޝަނުގެ މަސައްކަތް ކުރިޔަށްދާ ގޮތް ހާމަ ކުރައްވައި، މިއަދު އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ އެ މަސައްކަތް އަލުވިކަމާއެކު ކުރިޔަށްދާ ކަމަށެވެ.
މި މަޝްރޫޢަކީ ދެމެހެއްޓެނިވި ގޮތެއްގައި ދަތުރުފަތުރު ކުރިއެރުވުމަށާއި ރާއްޖޭގައި ކާބަން ދޫކުރާ މިންވަރު މަދުކުރުމަށް ރައީސް މުޢިއްޒުވެ ވަޑައިގެންފައިވާ ވައުދުފުޅާ އެއްގޮތަށް ކުރިޔަށްދާ މަސައްކަތެއް ކަމަށް ފަހުމީ ވިދާޅުވިއެވެ.
އޭނާ ވިދާޅުވި ގޮތުގައި ރާއްޖޭގައި އިލެކްޓްރިކް ވެހިކަލް ބޭނުންކުރާ ފަރާތްތަކަށް ސާފު ހަކަތަ ފަސޭހައިން ލިބޭނެ ގޮތް ފަހިކޮށްދެވޭނެ މި ޗާޖިން ސްޓޭޝަނަކީ، ރާއްޖެ ތިމާވެއްޓާ ރައްޓެހި މުޖުތަމައެއް ބިނާކުރުމުގައި މުހިންމު ދައުރެއް އަދާކުރާނެ ވަސީލަތެކެވެ.
އޭނާ ވިދާޅުވީ ރައީސް މުޢިއްޒުގެ ތަސައްވުރާ އެއްގޮތަށް ސްޓެލްކޯއިން ދަނީ ތިމާވެއްޓާ ރައްޓެހި، އަދި ދެމެހެއްޓެނިވި މުސްތަގުބަލެއް ހޯދުމަށްޓަކައި މަސައްކަތް ކުރަމުން ކަމަށެވެ.
އިލެކްޓްރިކް ވެހިކަލް ޗާޖުކުރާ ސްޓޭޝަނެއް ސްޓެލްކޯއިން ތަރައްގީކުރުމަށް ނިންމާފައިވާކަން ފަހުމީ ހާމަ ކުރެއްވީ މިދިޔަ އޮގަސްޓުމަހުގެ 25ވަނަ ދުވަހުގައެވެ.
އޭނާ ވިދާޅުވި ގޮތުގައި ގައުމާއި ދުނިޔެއަށް އަންނަ ކުރިއެރުންތަކާއެކު ތިމާވެއްޓާ ރައްޓެހި އުޅަނދުތަކަށް އޮންނަ ޑިމާންޑު ވަނީ ބޮޑުވެފައެވެ. މި ސްޓޭޝަންގެ ބޭނުމަކީ އެފަދަ އުޅަނދުތައް ގެންގުޅޭ ފަރާތްތަކަށް ލުއި ފަސޭހަތައް ހޯދައިދިނުމާއެކު އިލެކްޓްރިކް ވެހިކަލް ގެންގުޅުމަށް ހިތްވަރު ދިނުމެވެ.