ގައުމީ އެއާލައިން މޯލްޑިވިއަންއަށް އެމްޑީޕީން ނުދައްކައި އޮތް 5.6 މިލިއަން ރުފިޔާ ހޯދުމަށް ޓަކައި ދެ ފަރާތުން އެއްބަސްވުމެއް ހަދައި، ސިވިލް ކޯޓަށް ހުށަހަޅާފައިވާ މައްސަލަ އަނބުރާ ނަގައިފިއެވެ.
އެމްޑީޕީން މޯލްޑިވިއަންއަށް ނުދައްކައި އޮތް 5.6 މިލިއަން ރުފިޔާ ހޯދުމަށް ޓަކައި ސިވިލް ކޯޓަށް މައްސަލަ ހުށަހެޅީ މޯލްޑިވިއަންގެ ފަރާތުންނެވެ.
އެއީ ގައުމީ އެއާލައިން މޯލްޑިވިއަންގެ ޗާޓާ ފްލައިޓް އަދި ޝެޑިއުލް ފްލައިޓްތަކުން ކްރެޑިޓް އުސޫލުންނަގާފައިވާ ޓިކެޓްތަކަށް ނުދައްކައިވާ 5،629،861 ރުފިޔާ އެއްބަސްވެފައިވާ ގޮތަށް މިހާތަނަށް ވެސް ފައިސާ ދައްކާފައިނުވާތީ، އެ ކުންފުންޏަށް ލިބުނު ގެއްލުމަށް އަދުލުވެރި ބަދަލެއް ނަގައިދިނުމަށް އެދި، ހަތް ދުވަސް ތެރޭގައި އެ ފައިސާ ހޯދުމަށް އެދި ކޮށްފައިވާ ދައުވާއެކެވެ.
ކޯޓުން ބުނީ އެމްޑީޕީން އެ ފައިސާ ދެއްކުމަށް، މިދިޔަ ޖޫން 13ގައި އެ ޕާޓީއާއި މޯލްޑިވިއަނާ ދެމެދު ހެދުނު އެއްބަސްވުމުގެ ދަށުން އިންސްޓޯލްމަންޓުގެ ގޮތުގައި ދައްކަންޖެހޭ 1،000،000 ރުފިޔާ، އެއްބަސްވުން ހެދި ދުވަހު ދެއްކި ކަމަށެވެ.
މޯލްޑިވިއަނުން އެދިފައިވަނީ އެ އެއްބަސްވުމާ އެއްގޮތަށް އެމްޑީޕީން ފައިސާ ނުދައްކައިފި ނަމަ، އަލުން މި މައްސަލަ ކޯޓަށް ހުށަހެޅޭނެހެން މައްސަލަ ނިންމައިދިނުމަށެވެ.
އެހެންކަމުން، ސިވިލް ކޯޓުން ހުކުމް ކުރީ މޯލްޑިވިއަނުން އެދިފައިވާ ގޮތަށް، އެއްބަސްވުމާ އެއްގޮތަށް އެމްޑީޕީން ފައިސާ ނުދައްކައިފިނަމަ، މައްސަލަ އަލުން ކޯޓަށް ހުށަހެޅުމުގެ ފުރުސަތު އޮންނާނެހެން ދައުވާ ފޯމު ބާތިލް ކުރުމަށެވެ.
މޯލްޑިވިއަންނާއި އެމްޑީޕީއިން އެއްބަސްވެފައިވާނީ ޚިދުމަތް ހޯދާތާ 48 ގަޑިއިރު ތެރޭގައި ފައިސާ ދައްކާގޮތަށް ކަމަށާއި ނަމަވެސް އެކި ފަހަރު މަތިން ސިޓީ ފޮނުވައިގެން ވެސް އެ ފައިސާ ދައްކާފައި ނުވާ ކަމަށް އެ ކުންފުނިން މީގެ ކުރިން ބުންޏެވެ. އަދި އެ ފައިސާ ނުދައްކައިގެން ކޯޓަށް މައްސަލަ ވައްދާނޭ ކަމުގެ އިންޒާރު ވެސް ދިނެވެ.
މޯލްޑިވިއަންއިން ފައިސާ ނުދައްކައިގެން އުޅެނީ މިދިޔަ ރިޔާސީ އިންތިޚާބުގެ ކެމްޕެއިންގައި އެމްޑީޕީން ކުރި ދަތުރުތަކަށެވެ.