ބޮލީވުޑްގެ މަޝްހޫރު ބަތަލާ ސޯނަމް ކަޕޫރު ޗުއްޓީއަށް ރާއްޖެ އަތުވެއްޖެއެވެ.
އިއްޔެގެ ވަގުތެއްގައި ރާއްޖެ އައުމަށް ފަހު ސޯނަމް ވަނީ ރާއްޖޭގައި ހުރިކަން ސޯޝަލް މީޑިއާގައި ހާމަކޮށްފައެވެ. ސޯނަމް ޗުއްޓީ ހޭދަކުރަމުން އަންނަނީ މާލެ އަތޮޅު ރިސޯޓެއް ކަމަށްވާ ވަން އެންޑް އޮންލީ ރީތި ރަށް ރިސޯޓުގައެވެ. ރިސޯޓުގައި ނަގާފައިވާ ސެލްފީއެއް ޕޯސްޓުކޮށްލަމުން ސޯނަމް ބުނެފައިވަނީ 'ހެލޯ ފްރޮމް މޯލްޑިވްސް'އެވެ.
އެއްވެސް ކަހަލަ މޭކަޕަކައިނުލާ ނަގާފައިވާ ފިލްޓަ ފްރީ މި ފޮޓޯގައި ބަތަލާ ހުންނަނީ މޫދު ހެދުމެއްގައި ޖެކެޓެއް ލައިގެންނެވެ. ސޯނަމް ސޯޝަލް މީޑިއާއަށް ދޫކޮށްލި ބައެއް ފޮޓޯތަކުގައި ފިރިމީހާ އާނަންދު އަހޫޖާ މަތިން ވަރަށް ހަނދާންވާ ކަމަށް ބުނެފައިވެއެވެ.
ސޯނަމްއާއި ފިރިމީހާ އާނަންދު އަހޫޖާ ރާއްޖޭގައި -- ފޮޓޯ/ޕިންކްވިލާ
އާނަންދު އަންނާނެ އިރަކަށް އިންތިޒާރުކުރާ ކަމަށް ބުނުމަށް ފަހު ރޭގެ ވަގުތެއްގައި ސޯނަމް ވަނީ އާނަންދު ބަތަލާގެ ދަތުރުގައި ބައިވެރިވިކަން ދައްކާލަން، އެކުގައި ނަގާފައިވާ ވީޑިއޯތައް ސޯޝަލް މީޑިއާގައި ހިއްސާކޮށްފައެވެ.
ސޯނަމް ވަނީ މީގެ ކުރިން ވެސް ވަރަށް ގިނަ ފަހަރު މަތިން ޗުއްޓީއަށް ރާއްޖެ އައިސްފައެވެ. ކައިވެންޏަށް ފަހު އަލަތު ދަރިފުޅު ލިބުމާ ގުޅިގެން ސޯނަމް ވަނީ ފިލްމީ މަސައްކަތްތަކުން ކޮންމެ ވެސް ވަރަކަށް ދުރުހެލިވެފައެވެ.
ނަމަވެސް، ބައެއް ބްރޭންޑްތަކުގެ އިޝްތިހާރުތަކުންނާއި ފިލްމީ އިވެންޓްތަކުގައި ސޯނަމް ބައިވެރިވެއެވެ.
މަޝްހޫރު ބޮލީވުޑް އެކްޓަރު އަނިލް ކަޕޫރުގެ ދޮށީ ދަރިފުޅު ސޯނަމް ރާއްޖެއަށް ޗުއްޓީ ހޭދަކުރުމަށް އައިސްފައިވާއިރު ސޯނަމްގެ ކޮއްކޮ ރެއާ ކަޕޫރުގެ ދެމަފިރިން ވެސް ވަނީ މިދިޔަ މަހު ކުރީކޮޅު ރާއްޖެއަށް އައިސްފައެވެ.