ކ. ގުރައިދޫގައި ހުންނަ ނުކުޅެދުންތެރިކަން ހުންނަ މީހުންގެ މަރުކަޒު ވެސް ބަލަހައްޓާ ޖެންޑާ މިނިސްޓްރީގެ އެ ޑިޕާޓްމަންޓުގެ ޑިރެކްޓަރު އާއިޝަތު ޝޫޒާ މަގާމުން ވަކިވާން މަޖުބޫރުކުރުވާ ކަމަށް އޭނާ ތުހުމަތުކޮށްފިއެވެ.
އޭނާ ޖެންޑާ މިނިސްޓްރީގައި މަސައްކަތް ކުރައްވާތާ 17 އަހަރު ވެއްޖެއެވެ.
މީސްމީޑިއާގައި ދައުރުވާ ވީޑިއޯއެއްގައި ފެންނަނީ މިނިސްޓްރީގެ އިސް މުއައްޒަފުންނާ އެކު ބޭއްވި ބައްދަލުވުމެއްގައި މުއައްޒަފަކު ވާހަކަދައްވާ މަންޒަރެވެ. ޝޫޒާ ވަނީ އެއީ ވަރަށް ތާރީޚީ ދުވަހެއް ކަމަށާއި މިނިސްޓްރީއަށް ވެސް ވަރަށް ތާރީޚީ ދުވަހަކަށް ވެގެންދާނެ ކަމަށް ބުނެފައެވެ.
ދަތިތަކާ އެކު ވެސް މިނިސްޓްރީގައި މަސައްކަތްކޮށްފައިވާނީ ވަރަށް ކުރާހިތުން ކަމަށާއި ކުރެވެނީ އަމިއްލަ މަސައްކަތެއް ކަމުގައި ދެކިގެން އެއް ދުވަހަށް ވުރެ އަނެއް ދުވަހު މިނިސްޓްރީން ދޭ ޚިދުމަތުގެ ފެންވަރު ރަނގަޅުކުރަން މަސައްކަތްކޮށްފައިވާނެ ކަމަށް އޭނާ ބުނެއެވެ.
އޭނާ ބުނީ، އެ މަސައްކަތް މިހާ ދުވަހު ކުރެވުނީ އޭނާގެ ފަހަތުގައި ވަރަށް ބޮޑު ޓީމެއް އޮވެގެން ކަމަށެވެ. އަދި، 2007 ވަނަ އަހަރުން ފެށިގެން އޭނާ އެކު މަސައްކަތްކުރި ޓީމަށް އޭނާ ވަނީ ވަރަށް ޚާއްސަ ޝުކުރެއް އަދާކޮށްފައެވެ.
ނަމަވެސް، މިދިޔަ އަހަރުގެ ޑިސެމްބަރު މަހާ ހަމައަށް އެއްވެސް މަގުބޫލު އުޒުރެއް ނެތި މިނިސްޓްރީގައި ކުރަމުންއައި ހުރިހާ މަސައްކަތެއް އަތުލައި، ކޮމިޓީތަކުން ބޭރުކޮށް، މިނިސްޓްރީގެ އިސްވެރިންގެ ބައްދަލުވުންތަކަށް ވަނުން ވެސް މަނާކޮށްފައިވާ ކަމަށް އެ ވީޑިއޯގައި އޭނާ ބުނެއެވެ.
މަގާމުގެ ހުރިހާ މަސްއޫލިއްޔަތެއް އަތުލާ އެއްވެސް އުޒުރެއް ނެތި އެއްވެސް ސަބަބެއް ނުދައްކާ، އޭނާ އާދައިގެ މުވައްޒަފަކަށް ބަދަލުކޮށްފައިވާ ކަމަށް ވީޑިއޯގައި ބުނެއެވެ. އެ ކަންކަން ސާފުކުރަން މިނިސްޓްރީގެ އިސް ބޭފުޅުންނާ ބައްދަލުކުރަން އެދުމުން އެކަން ވެސް ނުވި ކަމަށް އޭނާ ތުހުމަތުކުރެއެވެ.
އޭނާ ވަނީ އަންހެނުންނާއި ކުޑަކުދިންނާއި އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންގެ ހައްގުތައް ހޯދައިދިނުމަށް އުފެއްދި މިނިސްޓްރީއަކުން އަންހެނެއްގެ ހައްގު ނިގުޅައިގެންފައިވާ ކަމަށް ތުހުމަތުކޮށްފައެވެ.
މިއީ ހަމައެކަނި ޝޫޒާއަށް ދިމާވި ކަމެއް ނޫން ކަމަށް ވެސް އޭނާ ތުހުމަތުކުރިއެވެ.
މި ތުހުމަތުތަކާ ގުޅިގެން މިހާތަނަށް ޖެންޑާ މިނިސްޓްރީގެ ބަހެއް ލިބިފައެއް ނުވެއެވެ.