ދިވެހިރާއްޖޭގައި ފުރަތަމަ ފަހަރަށް ޖަނަވާރުންގެ ދުވަސް ފާހަގަކުރަން ނިންމައި، ގިނަ ހަރަކާތްތަކެއް ކުރިއަށް ގެންދަން ދިރޭތަކެއްޗާ ބެހޭ ވުޒާރާއިން ނިންމައިފިއެވެ.
"ސަން"އަށް މައުލޫމާތު ދެމުން އެ ވުޒާރާގެ ޑެޕިއުޓީ މިނިސްޓަރު ފާތިމަތު ޒުހުރާ ވިދާޅުވީ، މިއީ ރާއްޖޭގައި ޖަނަވާރުންގެ ދުވަސް ފާހަގަކުރާ ފުރަތަމަ ފަހަރު ކަމަށާއި ދުވަސް ފާހަގަކުރުމަށް ގިނަ ހަރަކާތްތަކެއް ކުރިއަށް ގެންދަން ނިންމާފައިވާ ކަމަށެވެ.
އޭނާ ވިދާޅުވީ، ފެށުމުގެ ގޮތުން މިއަދުގެ ހަވީރު 16:00 އިން ފެށިގެން 18:00 އަށް އަދި 20:00 އިން 23:00 އަށް ފުލްޑޭ ފެއާއެއް މާލޭގެ އާޓިފިޝަލް ބީޗުގައި ބޭއްވުމަށް ނިންމާފައިވާ ކަމަށެވެ. އެގޮތުން، ހަވީރު ގަޑީގައި ކުޑަކުދީންނަށް ޚާއްސަ އިވެންޓުތަކާއި ރޭގަނޑު ހަބޭސް ގްރޫޕުގެ ބޮޑުބެރު އޮންނާނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މި ފެއާ ބާއްވަނީ އެންޖީއޯތަކާ ގުޅިގެން ކަމަށާއި ފެއާގައި ބޮޑަށް އޮންނާނީ ފަންޑްރައިޒްކުރުން ކަމަށެވެ. އަދި، ފަންޑްރައިޒްކޮށްގެން އެ އެންޖީއޯއަކުން ހިންގާ ސްޓޯލްކުން ލިބޭ ފައިސާ އެ އެންޖީއޯއަކަށް ދޭ ގޮތަށް ނިންމާފައިވާ ކަމަށް ވެސް ޒުހުރާ ވަނީ ވިދާޅުވެފައެވެ.
މިއީ އެއްވެސް ފީއެއް ނުނަގާ މިނިސްޓްރީއާއި އެންޖީއޯތަކާ ގުޅިގެން އިންތިޒާމުކުރާ ފެއާއެކެވެ. މި ފެއާގައި މިނިސްޓްރީގެ ފަރާތުން މިނިސްޓްރީގައި ކުރަމުން އަންނަ މަސައްކަތްތަކުގެ މައުލޫމާތު ވެސް ލިބެން ހުންނާނެއެވެ.
"އެންޖީއޯތަކުން ފޯރުކޮށްދޭނެ ޕެޓެއް ގެންގުޅޭނަމަ އެ ޕެޓަށް ކެއާކުރަންވީ ގޮތާއި ދެން އަޅުގަނޑުމެންގެ ޑޮކްޓާސް ތިބޭނެ އެ ތަނުގައި ކުޑަކުއްޖަކު ވެސް ބޮޑު މީހަކު ވެސް ޖަނަވާރަކާ ގުޅޭގޮތުން ސުވާލެއް ކުރަން ބޭނުންވާނަ އެ ބޭފުޅުން އެސިސްޓުކޮށްދޭނެ،" ޑެޕިއުޓީ މިނިސްޓާރު ޒުހުރާ ވިދާޅުވިއެެވެ.
ޒުހުރާ ވިދާޅުވީ، މި ފެއާގައި ދިރޭތަކެއްޗާ މެދު ރަހުމުކުރުމާ ބެހޭ ގޮތުން ދީނީ މައުލޫމާތު ދިނުމަށް ވެސް މީހުން ތިބޭނެ ކަމަށެވެ. އަދި، ފެއާ ނިމުމަށް ފަހު ލަކީޑްރޯ އެއް ނެގޭނެ ކަމަށާއި ލަކީޑްރޯއިން އެއްވަނަ، ދެވަނަ އަދި ތިންވަނައަށްވެސް އަގުހުރި އިނާމުތަކެއް ލިބޭނެ ކަމަށް އޭނާ ވިދާޅުވިއެވެ.
ޒުހުރާ ވަނީ މި ހަރަކާތްތައް އެއް ހަފުތާގެ މުއްދަތައް ކުރިއަށްދާނެ ކަމަށް ވިދާޅުވެފައެވެ. އެގޮތުން، އިސްލާމިކް ޔުނިވާސިޓީ، އައިޔޫއެމްއާ އެކު ފޯރަމެއް ވެސް ކުރިއަށް ގެންދަން ނިންމާފައިވާ ކަމަށް އޭނާ ވިދާޅުވިއެވެ.
އަދި، އުރީދޫއާ ގުޅިގެން ފޮޓޯ ވިތު މައި ޕެޓްސްގެ ނަމުގައި ޚާއްސަ ހަރަކާތެއް ކުރިއަށް ގެންދަން ނިންމާފައިވާ ކަމަށާއި މިނިސްޓްރީގެ ސޯޝަލްމީޑިއާ ޕްލެޓްފޯމްތަކުން އޭގެ މައުލޫމާތު ލިބެން ހުންނާނެ ކަމަށާއި މި ހަރަކާތުގެ ނަތީޖާ ފާޅުކުރުން އޮންނާނީ މި މަހުގެ 10 ވަނަ ދުވަހުގެ ރޭ ކަމަށް އޭނާ ވިދާޅުވިއެވެ.
އޭނާ ވިދާޅުވީ، މި ކަންތައްތަކަށް ވަރަށް އަގުހުރި އިނާމުތައް ހުށަހެޅިފައި އެބަހުރި ކަމަށެވެ. އޭގެ ތެރޭގައި، ސިޔާމް ވޯލްޑް ރިސޯޓުން ދެ މީހަކަށް ދެ ދުވަހުގެ ދަތުރެއް ވެސް ހިމެނެއެވެ.