ހިމާޔަތްކޮށްފައިވާ ސަރަހައްދުތަކުގެ ތެރެއިން ބެލެހެއްޓެނީ އެންމެ ފަސް ސަރަހައްދު: ޠާރިގް

ރާއްޖޭގައި ހިމާޔަތް ކޮށްފައިވާ ސަރަހައްދުތަކުގެ ތެރެއިން ބެލެހެއްޓެނީ އެންމެ ފަސް ސަރަހައްދެއް ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިގް އިބްރާހީމް ވިދާޅުވެއްޖެއެވެ.

މިއަދުގެ މަޖިލީހަށް ވަޒީރު ހާޒިރުކޮށް ސުވާލުކުރުމުން އޭނާ ވިދާޅުވީ ރާއްޖޭގައި މިހާރު ހިމާޔަތް ދީފައިވާ 93 ސަރަހައްދެއް އެބަ އޮތް ކަމަށާއި ނަމަވެސް ރަނގަޅު ގޮތުގައި ބެލެހެއްޓެނީ އެންމެ ފަސް ސަރަހައްދު ކަމަށެވެ.

ވަޒީރު ވިދާޅުވީ މި ސަރުކާރުގެ އަމާޒަކީ ވީހާވެސް ގިނަ ސަރަހައްދެއް ހިމާޔަތްކޮށް މެނޭޖްމެންޓް ޕްލޭން ހަދާ އެ ތަންތަނކީ ބެލެހެއްޓޭނެ ތަންތަނަށް ހެދުން ކަމަށެވެ.

"މިހާރު މިއޮތް ފަސްތަނުގެ އިތުރަށް އަޅުގަނޑުމެން މިދަނީ ވީހާ ވެސް ގިނަ ތަންތަނެއް ބަލާ އެ ތަންތަން މެނޭޖް ކުރެވޭނެ ގޮތްތައް ބެލުމުގައި،" ވަޒީރު ތާރިގް އިބްރާހީީމް ވިދާޅުވިއެވެ.

އަދި މި ކަންކަން ކުރަން ބޭނުންވާ ޓްރެއިނިންތަކާއި މިކަމަށް ބޭނުންވާ ފައިސާ ހޯދުމުގެ މަސައްކަތްތައް އެ ވުޒާރާއިން މިހާރު ވެސް ކުރާކަމަށް ވިދާޅުވެ ވަޒީރު ވަނީ އެ ފައިސާ ލިބެމުން ދާކަން ވެސް ފާހަގަކުރައްވައިފައެވެ.

މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވެސް ވަޒީރު ވަނީ ކޮންމެ އަތޮޅެއްގައި ވެސް ނޭޗާޕާކެއް ހެދުމަށް ހުޅުވާލި ފުރުސަތުގައި ގިނަ ޕްރޮޕޯސަލްތަކެއް ލިބިފައިވާކަމަށާއި ނޭޗާޕާކްތައް ހެދުމުގެ މަސައްކަތް އަންނަ އަހަރު ފަށާނެ ކަމަށް ވިދާޅުވެފައެވެ.