ޓްރެފިކިން މިންގަނޑަށް އަރާވަރަށް ރާއްޖެއަށް މަސްތުވާތަކެތި އެތެރެކުރި މެލޭޝިއާ ދެމީހުން، ރާއްޖެއަށް މަސްތުވާތަކެތި އެތެރެކުރުމާއި، ޓްރެފިކް ކުރިކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފިއެވެ.
ރާއްޖެއަށް މަސްތުވާތަކެތި އެތެރެކުރުމާއި، ޓްރެފިކް ކުރިކަމުގެ ތުހުމަތުގައި ކްރިމިނަލް ކޯޓުން ބަންދުކޮށްފައި ވަނީ، އުމުރުން 41 އަހަރާއި 44 އަހަރުގެ ދެ ފިރިހެނުންނެވެ.
ކޯޓު އަމުރުގައި ވާގޮތުން، މިދެމީހުންގެ ލަގެޖުން ވަނީ މަސްތުވާތަކެތިކަމަށް ޝައްކުކުރެވޭ އެއްޗެއް ފެނިފައެވެ. އަދި މިއީ ނެޓްވޯކެއްގެ މެދުގައި ވާހަކަ ދެކެވި މަޝްވަރާ ކޮށްގެން ހިންގާފައިވާ އމަަލެއްކަމަށާއި މިމީހުން އެތެރެކުރި ތަކެތީގެ ފޮޓޯއާއި މައުލޫމާތު ނެޓްވޯކާ ހިއްސާކޮށްފައި ވާކަމަށް މޯބައިލް ފޮރެންސިކް ރިޕޯޓާ ހަވަލާދީ ކޯޓު އަމުރުގައި ވެއެވެ.
ކޯޓު އަމުރުގައި ވަނީ، މިމީހުން އެތެރެކުރިކަމަށް ތުހުމަތުކުރާ މަސްތުވާތަކެތީގެ ތަހުލީލީ ރިޕޯޓު ހެކީގެ ގޮތުގައި ހުށަހަޅާފައި ވާކަމަށެވެ. އަދި ޓްރެފިކިން މިންގަނޑަށް އަރާވަރަށް މިމީހުންގެ އަތުން މަސްތުވަތަކެތި ފެނިފައިވާކަމަށް ވެސް ކޯޓު އަމުރުގައި ވެއެވެ.