ހުޅުމާލޭ ސެންޓްރަލް ޕާކު ސަރަހައްދުގައި ހިނގި އެކްސިޑެންޓުގައި މީހަކު މަރުވި މައްސަލައިގައި، ކާރު ދުއްވަން އިން ޒުވާނާ ޝަރީއަތް ނިމެންދެން ބަންދުކުރި މައްސަލަ ހައިކޯޓުގައި އިސްތިއުނާފު ކުރުމުން އެ މައްސަލައިގެ ޝަރީއަތް މިއަދު ފަށައިފިއެވެ.
ސްޕޯޓްސް ކާރަކާއި ސައިކަލެއްޖެހި ހުޅުމާލޭ ސެންޓްރަލް ޕާކު ސަރަހައްދުގައި މިދިޔަ މަހުގެ ފަސްވަނަ ދުވަހު ހިނގި އެކްސިޑެންޓުގައި މަރުވީ ސައިކަލު ދުއްވަން އިން ހަސަން ސަމާހުއެވެ. އޭނާއަކީ ކަރެކްޝަންސްގެ އޮފިސަރެކެވެ.
މި މައްސަލައިގައި ޝަރީއަތް ނިމެންދެން ބަންދުކުރަން ހުޅުމާލޭ މެޖިސްޓްރޭޓް ކޯޓުން އަމުރުކުރީ ކާރު ދުއްވަން އިން މުޙައްމަދު ވިސާމް ސިދުގީއެވެ. ޝަރީއަތް ނިމެންދެން ވިސާމް ބަންދުކުރުމަށް ކޮށްފައިވާ އަމުރު އިސްތުނާފުކުރަން ހުށަހަޅާފައި ވަނީ އޭނާގެ ފަރާތުންނެވެ.
މިއަދު ބޭއްވި އަޑުއެހުމުގައި ވިސާމްގެ ވަކީލު ނޫރުއްސަލާމް ވަނީ ވިސާމް ކާރު ދުއްވީ ބާރު ސްޕީޑުގައި ނޫން ކަމަށް ވިދާޅުވެފައެވެ. އަދި އެ އެކްސިޑެންޓު ހިނގަން މެދުވެރިވީ ވަންވޭއާ ދެކޮޅަށް ސައިކަލު ދުއްވުމުން ކަމަށް އޭނާ ވިދާޅުފައިވެއެވެ. އެކަމާ ދެކޮޅަށް ފުލުހުން ހެކި ދިން ނަމަވެސް ފަހުން އާންމުވި މައުލޫމާތުތަކުން އެކަމަށް ބާރު ލިބިފައި ވާކަމަށާއި ވިސާމް ބަންދުކުރީ އޭރު ފުލުހުން ދިން މައުލޫމާތައް ކަމަށް ނޫރުއްސަލާމް ވިދާޅުފައިވެއެވެ.
މީގެ އިތުރުން އޭނާ ވިދާޅުވީ، ހުޅުމާލެ މެޖިސްޓްރޭޓް ކޯޓުން ނެރެފައިވާ އަމުރަކީ އެ ކޯޓުގެ އިހުތިޞާސް ނެތި ނެރެފައިވަ އަމުރެއްކަމަށެވެ. އެގޮތުން، ވިސާމަށް ކުރަނީ މަރުގެ ތުހުމަތެއް ކަމަށާއި މެޖިސްޓްރޭޓް ކޯޓުތަކަށް މަރުގެ މައްސަލަތައް ބެލުމަށް ނުވަތަ ބަންދު މުއްދަތު ޖެހުމަށް އިހުތިޞާސް ނޯންނާނެ ކަމަށް ނޫރުއްސަލާމް ވިދާޅުވެފައިވެއެވެ.
ނަމަވެސް، މިކަމާ ގުޅިގެން ދައުލަތުން ބުނީ ގާނޫނުގައި އޮންނަ ގޮތުން ބަންދާމެދު ގޮތެއް ނިންމަން ހާޒިރުކުރަން ޖެހޭނީ އޭމީހަކު ހައްޔަރުކުރި ރަށެއްގައި ހުންނަ ކޯޓަކަށް ކަމަށެވެ.
އަދި ވިސާމް ޝަރީއަތް ނިމެންދެން ބަންދުކުރަން ހުޅުމާލޭ ކޯޓުން ނިންމުމުން އެކަމަށް ބަދަލެއް ގެންނަންޖެހޭ ސަބަބެއް ނެތް ކަން ދައުލަތުން ފާހަގަކޮށްފައި ވެއެވެ.
ހައިކޯޓުން މި މައްސަލަ ބަލަނީ ފަނޑިޔާރު ހަސަން ޝަފީއު އާއި ފަނޑިޔާރު ފާތިމަތު ފަރުހީޒާ އާއި ފަނޑިޔާރު އަބްދުލްމާނިއު ހުސައިނެވެ. އަދި މި ބެންޗުގެ ރިޔާސަތު ބަލަހައްޓަވަނީ ފަނޑިޔާރު ޝަފީއުއެވެ.