މޯލްޑިވްސް ކަރެކްޝަނަކް ސާވިސްގެ ސިވިލް މުވައްޒަފުންނަށް ހައުސިން އެލަވެންސް ނުލިބި ގިނަ ދުވަސްވާތީ އެ މައްސަލަ ހައްލުކުށްދިނުމަށް ރައީސް އޮފީހަށް ޕެޓިޝަނެއް ހުށަހަޅައިފިއެވެ.
ކަރެކްޝަންސްގައި މަސައްކަތް ކުރާ ސިވިލް މުއައްޒަފުންގެ އަދަދު 80އަށް އަރާއިރު ހައުސިން އެލަވެންސް ނުލިބޭތީ ހުށަހެޅި އެ ޕެޓިޝަން ކަރެކްޝަންސްއިން ހުށަހަޅާފައި ވަނީ އެ ޚިދުމަތުގެ 44 ސިވިލް މުއައްޒަފުންގެ ސޮޔާ އެކުގައެވެ.
އެ ޚިދުމަތުން މި ޕެޓިޝަން ހުށަހަޅާފައިވާ ތަންތަނުގެ ތެރޭގައި ރައީސުލް ޖުމްހޫރިއްޔާގެ އޮފީހާއި ދާޚިލީ ވުޒާރާއާއި ރައްޔިތުންގެ މަޖިލީހުގެ އިތުރުން މާލީ ވުޒާރާ ހިމެނެއެވެ.
ހައުސިން އެލަވެންސަކީ ރާއްޖޭގެ ޖަލުތަކާއި ޕެރޯލްގެ ގާނޫނުގެ ދަށުން އެކުލެވިފައިވާ މޯލްޑިވްސް ކަރެކްޝަންލް ސާވިސްގެ ވަޒީފާއާ ބެހޭ ގަވާއިދުގެ 49 މާއްދާގެ ދަށުން ޖަލު އޮފިސަރުންނާއި މުއައްޒަފުންނަށްދޭ އެލަވެންސަތަކުގައި ހިމަނާފައިވާ އެއްޗެކެވެ.
އެ ގަވާއިދުގައި ވާގޮތުން ހައުސިން އެލަވެންސަކީ އެ އިދާރަގެ މުއައްޒަފުންގެ ތެރެއިން ނިދުމުގެ އިންތިޒާމު ހަމަޖައްސައިދީފައިވާ ފަރާތްތައް ފިޔަވައި، އެހެން މުވައްޒަފުންނަށް ދޭ އެލަވެންސެކެވެ. މި އެލަވެންސް ދޭނީ އެ ސާވިސްގެ ބަޖެޓް ލިބިފައިވާ މިންވަރަށް ބެލުމަށްފަހު ކަނޑައަޅާފައިވާ އުސޫލާ އެއްގޮތަށް މަހަކު އެއްފަހަރެވެ.
ނަމަވެސް އެ ޕެޓިޝަނުގައި ވަނީ ވަޒީފާއާ ބެހޭ ގަވާއިދާއި މުސާރަ އޮނިގަނޑަށް ނުވަ އަހަރު ފުރި 10 އަހަރު ވާން ކައިރިވެފައިވާއިރު އެ ސާވިސްގެ އެއްވެސް ސިވިލް މުވައްޒަފަކަށް އެ އެލަވެންސް ލިބިފައި ނުވާކަން ފާހަގަކޮށްފައެވެ.
އަދި ބަޖެޓް ނެތީ ނޫންކަމަށާއި ފާއިތުވި އަހަރުތަކުގައި ކަރެކްޝަންސްގެ ފަރާތުން މާލީ ވުޒާރާއާއި ދާޚިލީ ވުޒާރާއަށް ފޮނުވާފައިވާ ލިޔެކިޔުންތަކުން އެނގޭގޮތުގައި ކޮންމެ އަހަރަކު ނުވަ މިލިއަނާއި 10 މިލިއަނެއްހާ ރުފިޔާ އެ ޚިދުމަތުން ބާކީ ވާކަމަށް ޕެޓިޝަނުގައި ވަނީ ފާހަގަކޮށްފައެެވެ.
އެހެން ނަމަވެސް އެ ފައިސާއިން ހައުސިން އެލަވެންސް ހަމަޖައްސައިދިނުމަށް މާލީ ވުޒާރާއިން ދެކޮޅުހަދާކަށްމަށް ވެސް އެ ޕެޓިޝަނުގައި ވަނީ ފާހަގަކޮށްފައެވެ.