އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އިން ހިންގަމުންދާ "މޯލްޑިވިއަން ސީޕްލޭން" ވިޔަފާރި ޒަމާނީކުރުމަށް މޯލްޑިވްސް އެއާޕޯޓްސް ކޮނެޕެނީ ލިމިޓެޑް (އެމްއޭސީއެލް)އާއެކު ޖޮއިންޓް ވެންޗާ ކުންފުންޏެއް އުފައްދަން ރައީސް ޑރ. މުޙައްމަދު މުއިއްޒު ނިންމަވައިފިއެވެ.
ރައީސް އޮފީހުން ބުނީ، ރައީސް މިފަދައިން ނިންމެވީ އިއްޔެގެ ވަޒީރުންގައި ފިނޭންސް މިނިސްޓްރީގެ ހުށަހެޅުމަކަށް މަޖިލީހުގެ ބައްދަލުވުމުގައި މަޝްވަރާ ކުރެއްވުމަށް ފަހު ކަމަށެވެ. އެގޮތުން، އެ ކުންފުނި އުފެއްދުމަށް ރައީސް ނިންމެވީ އެމްއޭސިއެލާއެކު ސްޓެރެޓެޖިކް ޕާޓްނާޝިޕެއް ގާއިމުކޮށްގެންނެވެ.
މީގެއިތުރުން، އެ ކުންފުނި އެފެއްދެވުމަށް އެމަނިކުފާނު ނިންމެވީ އައިލެންޑް އޭވިއޭޝަންގެ ފުރިހަމަ ކޮންޓްރޯލް އޮންނަ ގޮތަށް ކަމަށާއި ޖޮއިންޓް ވެންޗާ ކުންފުންޏެއް އުފެއްދުމުގެ ކަންކަން އަންނަ އަހަރުގެ އެޕްރީލް 30ވަނަ ދުވަހަށް ނިންމުމަށް ކަނޑައަޅުއްވަފައިވާ ކަމަށް އެ އޮފީހުން ބުނެއެވެ.
ސީޕްލޭން ޓާމިނަލް: ސީޕްލޭން ވިޔަފާރި ޒަމާނީ ކުރަން އެމްއޭސީއެލްއާއެކު ޖޮއިންޓް ވެންޗާ ކުންފުންޏެއް އުފައްދަނީ -- ފޮޓޯ/ މޯލްޑިވިއަން
ކުންފުނި އުފެއްދުމަށްޓަކައި ނިންމަން ޖެހޭ ކަންކަން އިކޮނޮމިކް ކައުންސިލަށް ހުށަހަޅައިގެން ކުރިއަށް ގެންދާނެ ކަމަށް ރައީސް އޮފީހުން ބުނެފައިވެއެވެ.
އިއްޔެގެ ވަޒީރުންގެ މަޖިލީހުގައި ރައީސް އިތުރު ނިންމެވުންތަކެއް ނިންމާފައިވާ ކަމަށް އެ އޮފީހުން ބުނެފައިވެއެވެ. އޭގެތެރޭގައި، އިގްތިޞާދު ސިންދަފާތުކޮށް، ކަނޑުގެ ވަޞީލަތްތަކުން ލިބޭ ނަފާ އިތުރުކުރުމުގެ ގޮތުން ކުރިއަށް ގެންދާނެ ކަންތައްތަކެއް ވެސް ނިންމާފައިވެއެވެ.
މިކަންތައްތައް ނިންމަވާފައި ވަނީ ފިޝަރީސް މިނިސްޓްރީން ހުށަހެޅި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށް ފަހުގައެވެ.
ވަޒީރުންގެ މަޖިލީހުގެ އިތުރު ނިންމުންތައް:
- ރާއްޖޭގައި މެރިކަލްޗާގެ ވިޔަފާރިތައް ގާއިމުކުރުމަށް ހެޗަރީތައް ބިނާކުރުން
- ހެޗަރީގައި އުފައްދާ ބާވަތްތައް މޫދުގެ މާޙައުލުގައި ބޮޑުކުރުމަށް ފޮރިން އިންވެސްޓްމަންޓްތައް ހިމެނޭގޮތަށް އާންމުކޮށް ހުޅުވާލައިގެން، ވަކި ޒޯނުތަކެއް މެރިކަލްޗާ ތަރައްޤީކުރާ ޒޯންތަކެއްގެ ގޮތުގައި ކަނޑައެޅުން
- މާލެއަތޮޅު ދެކުނުން، ވާދޫ ކަނޑުއޮޅިން ފެށިގެން ގާތްގަނޑަކަށް ހަތް ކިލޯމީޓަރު ދެކުނުން އޮތް ޖުމްލަ 73 ހެކްޓަރުގެ ފަރުގެ ސަރަޙައްދަކީ ކޮމާޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ޚާއްސަކުރެވޭ މޫދުކޮށީގެ ސަރަޙައްދެއްގެ ގޮތުގައި ކަނޑައެޅުން
- މެރިކަލްޗާ ކުރުމަށް ކަނޑައަޅާ ޒޯނުތައް ކުއްޔަށް ދިނުމުގައި ޢަމަލުކުރާނެ އުސޫލުތަކެއް ކަނޑައެޅުން