ސޫދާންގެ ވެރިރަށް ޚަރްތޫމްގައި ހުންނަވާ ޔޫއޭއީގެ ސަފީރުގެ ގެކޮޅަށް ދިން ނުރައްކާތެރި ހަމަލާ, ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ފޮރިން މިނިސްޓްރީން ނެރުނު ބަޔާނުގައި ބުނީ ޑިޕްލޮމެޓިކް ފެސިލިޓީތަކަށް ހަމަލާ އަމާޒުކުރުމަކީ ޑިޕްލޮމެޓިކް ގުޅުންތަކާ ބެހޭ ވިއެނާ މުއާހަދާ އާއި ޑިޕްލޮމެޓިކް އިމިއުނިޓީއާ ބެހޭ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު ކަމެއް ކަމަށެވެ.
އަދި ދިވެހި ސަރުކާރުން ވަނީ ޑިޕްލޮމެޓިކް ގުޅުންތަކާ ބެހޭ ބައިނަލްއަގްވާމީ މުއާހަދާތަކާ އެއްގޮތްވާ ގޮތުގެ މަތިން އެފަދަ ތަންތަނުގެ ރައްކާތެރިކަން ދަމަހައްޓަން ގޮވައިލާފައެވެ.
އަދި މި ދަނޑިވަޅުގައި ދިވެހި ސަރުކާރާއި ރައްޔިތުން ތިބީ ޔޫއޭއީގެ ސަރުކާރާއި ރައްޔިތުންނާ އެކުގައި ކަމަށް އެ ބަޔާނުގައި ބުނެފައިވެއެވެ.
ރޮއިޓާސް ނޫހުން ޔޫއޭއީއާ ހަވާލާދީ ބުނެފައި ވަނީ، ޚަރްތޫމްގައި ހުންނަ އެ ގައުމުގެ ސަފީރުގެ ގެކޮޅަށް ސޫދާނުގެ އަސްކަރީ މަތިންދާބޯޓަކުން ހަމަލާދީފައިވާ ކަމަށެވެ.
ނަމަވެސް ސޫދާނުގެ ޚާރިޖީ ވުޒާރާއިން ވަނީ އެއީ އަސްކަރިއްޔާއިން ދިން ހަމަލާއެއް ނޫން ކަމަށާއި އެއީ ހަތިޔާރު އެޅި ރެޕިޑް ސަޕޯޓް ފޯސެސް (އާރުއެސްއެފް)ގެ ހަމަލާއެއް ކަމަށް އެ ވުޒާރާއިން ވަނީ ބުނެފައެވެ.
ސޫދާނުގެ ބައެއް ސަރަހައްދުތައް އާރުއެސްއެފްގެ ބާރުގެ ދަށަށް ގެންގޮސްފައިވާއިރު، އެ ބިންތައް ހޯދަން އެ ޖަމާއަތާއި އަސްކަރިއްޔާއާ ދެމެދު ދަނީ ހަނގުރާމަކުރަމުންނެވެ.
މީގެ ކުރިން ސޫދާނުގެ އަސްކަރިއްޔާއިން ވަނީ ޔޫއޭއީން އާރުއެސްއެފްއަށް ހަތިޔާރު ފޯރުކޮށްދޭ ކަމަށް ތުހުމަތުކޮށްފައެވެ.