ބޮލީވުޑްގެ އެންމެ ކާމިޔާބު ދެ ބަތަލާއިން ކަމަށްވާ ކާޖޮލްއާއި ކްރިތީ ސެނޮން އެކީގައި މަސައްކަތްކުރާ ފުރަތަމަ ފިލްމު "ދޯ ޕައްތީ" އަންނަ މަހުގެ 25 ވަނަ ދުވަހު ނެޓްފްލިކްސްއިން ޕްރީމިއާ ކުރާނެކަން އިއުލާނުކޮށްފިއެވެ.
މި މަހު ފިލްމު ނެޓްފްލިކްސްގައި ޕްރީމިއާ ކުރާނެކަން އިއުލާނުކުރިއިރު ފިލްމުގެ ކުޑަ ޕްރޮމޯއެއް ވެސް ނެޓްފްލިކްސްއިން ވަނީ އާއްމުކޮށްފައެވެ. މި ފިލްމަކީ ބަތަލާ ކްރިތީ ސެނޮންގެ އަމިއްލަ ޕްރޮޑަކްޝަން ހައުސް ބްލޫ ބަޓަފްލައިސްއިން ގެނެސްދޭ ފިލްމެކެވެ.
މި ފިލްމުގެ ސްކްރީންޕްލޭ ތައްޔާރުކޮށްފައިވަނީ ބެލުންތެރިންގެ ބޮޑު މަގުބޫލުކަމެއް ލިބުނު "ދުންކީ" އަދި "ޕިރް އާއީ ހަސީން ދިލްރުބާ"ފަދަ ފިލްމުތަކުގެ ސްކްރީންޕްލޭ ތައްޔާރުކޮށްފައިވާ ކަނީކާ ދިލޮންއެވެ. ކާޖޮލް ފުލުހެއްގެ ރޯލް ކުޅެފައިވާ މި ފިލްމުގެ ޑައިރެކްޓަރަކީ ޝަޝަންކާ ޗަތުރުވެދީއެވެ.
ފިލްމު "ދޯ ޕައްތީ"ގެ ޕްރޮމޯގެ މަންޒަރެއްގައި ކާޖޮލް އަދި ކްރިތީ--ފޮޓޯ/ބޮލީވުޑްހަންގާމާ
މި ފިލްމަކީ ބަތަލާ ކްރިތީ ޕްރޮޑިއުސްކޮށް މުހިއްމު ރޯލެއް ކުޅެފައިވާ ފިލްމެކެވެ. ފިލްމުގެ ޕްރޮމޯއިން ފެންނަ ގޮތުގައި ކްރިތީ "ދޯ ޕައްތީ"ގައި ކުޅެފައިވަނީ ޑަބަލް ރޯލެކެވެ. މިއީ ކްރިތީ ޑަބަލް ރޯލުން ވެސް ފެންނާނެ ފުރަތަމަ ފިލްމެވެ.
ނެޝަނަލް އެވޯޑު ކާމިޔާބުކޮށްފައިވާ ކްރިތީ ބެލުންތެރިންނަށް އެންމެ ފަހުން ބެލުންތެރިންނަށް ފެނިފައިވަނީ މި އަހަރު ރިލީޒްކުރި ފިލްމު "ތޭރީ ބާތޯމެ އޭސަ އުލްޖާ ޖިޔާ" އަދި "ކްރޫ"އިންނެވެ. ކާޖޮލް އެންމެ ފަހުން ބެލުންތެރިންނަށް ފެނިފައިވަނީ މިދިޔަ އަހަރު ނެޓްފްލިކްސްއިން ގެނެސްދިން އެންތޮލޮޖީ ފިލްމު "ލަސްޓް ސްޓޯރީސް"އިންނެވެ.
ފިލްމު "ދޯ ޕައްތީ"އަކީ މި އަހަރު ނެޓްފްލިކްސްއިން ޕްރީމިއާކުރާ އެންމެ ގިނަ ބަޔަކު އިންތިޒާރުކުރާ އެއް ފިލްމެވެ.