ޓެލްއަވީވު (30 ސެޕްޓެމްބަރު 2024): ޣައްޒާއާއި ލުބްނާނުގެ އާންމުންނާ ދެކޮޅަށް އިސްރާއީލުން ހިންގާ ގަތުލުއާންމުތަކާއި ހަނގުރާމައިގެ ޖަރީމާތައް ދިފާއު ކުރުމަށް ޓަކައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ތަވްރާތު ދަލީލާއި ހުއްޖަތް ދައްކައިފިއެވެ.
ޓެލްއަވީވުގައި ބޭއްވި ނޫސްވެރިންގެ ބައްދަލުވުމެއްގައި ނަތަންޔާހޫ ބުނީ އިސްރާއީލަށް ކުރިމަތިވާ ކޮންމެ ނުރައްކަލެއް ނައްތާލަން އަމަލުކުރަމުން މިގެންދަނީ ޔަހޫދީންގެ މުގައްދަސް ފޮތްކަމަށްވާ ތަވްރާތުގައި ވާގޮތަށް ކަމަށެވެ.
ނަތަންޔާހޫ ބުނިގޮތުގައި ތަވްރާތު އޮންނަގޮތް ދޫކޮށް ޔަހޫދީން ބައިނަލްއަގްވާމީ ގާނޫނަކަށް އދ. ގެ ގަރާރަކަށް ތަބާވާކަށް އަދި ބަލާކަށް ވެސް ނުޖެހެއެވެ. ޔަހޫދީން ތަބާވާން ޖެހޭނީ ތަވްރާތަށާއި ތަލްމޫދަށެވެ. އޭނާ ބުނިގޮތުގައި އޭނާގެ ސަރުކާރުން އިސްރާއީލުގެ ދުޝްމަނުންނާ މެދު އަމަލުކުރަމުން ގެންދަނީ ތަވްރާތަށާއި ތަލްމޫދުގައި ވާ ގޮތަށެވެ.
ނަތަންޔާހޫ މިހެން ވާހަކަ ދައްކާފައިވާއިރު އޭނާއަކީ އަމިއްލަ ދިރިއުޅުމާއި ޝަޚްސީ ގޮތަށް ބަލާއިރު ތަވްރާތަށް ނުބަލައި އޭގައިވާ ގޮތަށް އަމަލުނުކުރާ ހުޅަނގުގެ ލެބަރަލް ފިކުރުގެ (ލާދީނީ ފިކުރުގެ) މީހެކެވެ. ނަމަވެސް އިސްރާއީލާ ޖެހުނީމާ އޭނާ ދައްކާފައިމިވަނީ ތަވްރާތާއި ތަލްމޫދުގެ ވާހަކައެވެ.
ޒަޔަނިސްޓް ފިކުރުގެ ޔަހޫދީން ބުނާގޮތުން ފަލަސްތީނުގެ ބިމަކީ މާތް ﷲ ޔަހޫދީންނަށް ދިނުމަށް ވައުދު ކުރައްވާފައިވާ ބިމެކެވެ. ވައުދު ކުރައްވާފައިވާ ބިމުގައި ފަލަސްތީނުގެ އިތުރުން އިރާގުގެ ފުރާތު ކޯރާއި މިސްރުގެ ނީލަ ކޯރާ ދެމެދުގައިވާ ހުރިހާ ބިމެއް ހިމެނެއެވެ. އެއީ އިރާގާއި މިސްރުގެ ބަޔަކާ އުރުދުން ސޫރިޔާ އަދި ލުބްނާނާއި ސައޫދީ އަރަބިޔާގެ ބޮޑުބައެކެވެ.
"ޔަހޫދީންގެ ވަޒަނަކީ ނީލަ ކޯރުން ފުރާތު ކޯރަށް" މިހެން ލިޔެފައިވާ ލިޔުމެއް އިސްރާއީލުގެ ޕާލަމެންޓް (ކެނީސެތް) ގައި 1948 ގައި ފަލަސްތީނުގެ ބިމުގައި އިސްރާއީލު އުފެދުނީއްސުރެ ލިޔެ ހަރުކޮށްފައިވެއެވެ.
ނަމަވެސް މިކަން ގަބޫލުނުކުރާ މަދުއަދަދެއްގެ ޔަހޫދީންވެސް އުޅެއެވެ. މިކަން ގަބޫލުކުރާ ޔަހޫދީންގެ ތެރޭގައި ގިނައީ ޒަޔަނިސްޓް ފިކުރަށް ނިސްބަތްވާ ޔަހޫދީންނެވެ.
މިކަން ގަބޫލުނުކުރައްވާ ޔަހޫދީ މުފައްކިރެއް އަދި ތާރީޚީ އިލްމުވެރިއެއް ކަމަށްވާ އިލަން ޕަޕޭ ވިދާޅުވެފައިވާ ގޮތުގައި ފަލަސްތީނުގެ ބިމަކީ މާތް ﷲ ޔަހޫދީންނަށް ދިނުމަށް ވައުދު ކުރައްވާފައިވާ ބިމެއްކަމަށް ގަބޫލުކުރާ ޒަޔަނިސްޓް ޔަހޫދީންނަކީ ހަގީގަތުގައި މާތްﷲ ވޮޑިގެންވާކަމަށް ގަބޫލު ނުކުރާ އިލްމާނީ ލެބަރަލް ފިކުރުގެ މީހުންނެވެ.
މިފަދަ ޔަހޫދީން މާތްﷲ ވޮޑިގެންވާކަމަށް ގަބޫލު ނުކުރިނަމަވެސް، ޔަހޫދީންނަކީ މާތްﷲ ޚާއްސަކުރައްވައި އިޚްތިޔާރު ކުރައްވާފައިވާ ޚާއްސަ ބައެއް (ގޯޑް ޗޭސެން ޕީޕަލް) ކަމަށް މިފަދަ ލާދީނީ ޒަޔަނިސްޓް ޔަހޫދީން ގަބޫލުކުރާ ކަމަށާ އެހެންކަމުން މިފަދަ ޔަހޫދީންނަކީ އަޖައިބު ކުރަނިވި ވިސްނުން ގެންގުޅޭ ބައެއްކަން އޭނާ ފާހަގަ ކުރައްވައެވެ.
އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތައް
އިސްލާމީ މުފައްކިރެއްކަމަށްވާ ވިޟާޙު ޚަންފަރު ވިދާޅުވާ ގޮތުގައި ދެވަނަ ބޮޑު ހަނގުރާމައިގާ ނާޒީ ޖަރުމަނު ގެ އަތްދަށުން ޔަހޫދީންނަށް ލިބުނުކަމަށް ބުނާ އަނިޔާތައް (ހޮލޮކޯސްޓް) އެއީ ޒަޔަނިސްޓުން އެމީހުން ބޭނުންވާ ޖަރީމާތަކެއް ހިންގުމަށް ލިބުނު ލައިސަންސެއްކަމަށްވަނީ ހަދާފައެވެ.
ހޮލޮކޯސްޓަށްފަހު ޖަރުމަނުގެ ރައްޔިތުންގެ ފިކުރުވަނީ މުޅިން ޔަހޫދީން އެދޭގޮތަށް ޔަހޫދީންނަކީ މުގައްދަސް ބައެއްކަމަށް ދެކޭ ދެކުމަށް ބަދަލުކޮށްލާފައެވެ. އޭނާ ވިދާޅުވިގޮތުގައި ހޮލޮކޯސްޓް ބޭނުންކޮށްގެން ކުރުމަށް ޒަޔަނިސްޓުން ވަނީ ތިން ކަމެއް ކަނޑައަޅާފައެވެ.
ފުރަތަމަ ކަމަކީ ހޮލޮކޯސްޓުގައި ޔަހޫދީންނަށް ހިޓްލަރުގެ އަތްދަށުން ލިބުނު އަނިޔާތައް ލިބުމަށްފަހު ދެން ޔަހޫދީންނަށް އެމީހުންގެ ދިފާއުގައި ކުރުން މަނާވާނެ އެއްވެސް ކަމެއް އޮވެގެން ނުވާނެކަމެވެ. ދެވަނަ ކަމަކީ ހޮލޮކޯސްޓަށް ވުރެ ބޮޑު އަނިޔާއެއް ނެތްކަމާއި ނުވެސް އޮންނާނެ ކަމުގައެވެ.
މީހުން މަރައި ގަތުލުއާންމު ހިންގައި ނަސްލު ނައްތާލުމަކީ އަދި ނިއުކްލިޔާ ބޮން އަޅައިގެން މީހުން މެރުން ފަދަ ޖަރީމާތައް ވެސް ވާނީ ހޮލޮކޯސްޓަށް ވުރެ ކުޑަ އަނިޔާއަކަށެވެ. އިންސާނީ ތާރީޚު ދުށް އެންމެ ބޮޑު އަނިޔާވެރި އަމަލަކީ ހިޓްލަރުގެ ޒަޢާމަތުގައި ނާޒީ ޖަރުމަނުން ޔަހޫދީންނާ ދެކޮޅަށް ހިންގި ގަތުލުއާންމު ނުވަތަ ހޮލޮކޯސްޓެވެ.
ތިންވަނަ ކަމަކީ ހޮލޮކޯސްޓަށްފަހު ޔަހޫދީން ގައުމަކަށް ނޫނީ ބަޔަކަށް އަނިޔާކޮށްގެން ޔަހޫދީންނަށް ފާޑުކިޔައިގެން ނުވާނެކަމެވެ. އެއީ ހޮލޮކޯސްޓަކީ އެހެން ޔަހޫދީން ބޭނުންވާ ކޮންމެ ފަރާތްތަކާ ދެކޮޅަށް ބޭނުންކަމެއް ކުރުމަށް ޔަހޫދީން ނަށް ލިބިފައިވާ ކްރެޑިޓެއްކަމެވެ.
ޒަޔަނިސްޓުންވަނީ މިފިކުރު އެމެރިކާއާއި ޔޫރަޕްގައި ވަރަށް ބޮޑަށް ފަތުރާފައެވެ. އިސްރާއީލުން ގެންދަނީ ފަލަސްތީނުގެ ބިމަށް ވެރިވެގަނެ ފަލަސްތީނު އިސްތިއުމާރުކޮށްފައެވެ. މިއާއެކު ޔަހޫދީންގެ އިސްތިއުމާރާ ދެކޮޅަށް މިނިވަންކަމަށް ޓަކައި ފަލަސްތީނު މީހުން ކުރާ ޖިހާދަކީ ޓެރަރިޒަމް ކަމަށް އިސްރާއީލާއި އިސްރާއީލަށް ވާގިވެރިވާ ގައުމުތަކުން ގެންދަނީ ސިފަކުރަމުންނެވެ.
އިސްރާއީލުގެ އިސްތިއުމާރު ފަލަސްތީނުގައި ދެމެހެއްޓުމަށްޓަކައި އިސްރާއީލުން ހިންގާ ޓެރަރިޒަމް ގެ އަމަލުތަކަކީ އަމިއްލަ ނަފްސުގެ ދިފާއުގައި ކުރާކަމެއްގެ ގޮތުގައި އިސްރާއިލާއި އިސްރާއީލުގެ ޒަޔަނިސްޓް ފަލްސަފާ ގަބޫލުކުރާ ގައުމުތަކުން ސިފަކުރަނީ މިފިކުރު އެގައުމުތަކުގައި ޔަހޫދީން ފަތުރާފައިވާތީއެވެ.
އިސްރާއީލު ގެންދަނީ ފަލަސްތީނުގައިވާ އިސްރާއީލުގެ އިސްތިއުމާރު ދިފާއު ކުރުމަށްޓަކައި ޣައްޒާއާ ދެކޮޅަށް ގަތުލުއާންމާއި ނަސްލު ނައްތާލުމުގެ ބޮޑެތި ޖަރީމާތަކެއް ހިންގަމުންނެވެ. މިޖަރީމާތަކުގައި އިސްރާއީލުވަނީ ޣައްޒާގެ ހޮސްޕިޓަލްތަކާއި ސްކޫލްތަކާއި އާންމުންގެ ގެދޮރު އެއްކޮށް ހަލާކުކޮށްލައި އާންމުންގެ 41 ހާހަށް ވުރެ ގިނަ މީހުން މަރާލާފައެވެ. އަދި މިހާރު އިސްރާއީލު ގެންދަނީ ލުބްނާނަށް ވެސް ޣައްޒާއަށް ހެދިގޮތް ހެދުމަށް ލުބްނާނަށް ވައިގެ މަގުން ވަރުގަދަ ހަމަލާތަކެއް ދެމުންނެވެ.
މި ހަމަލާތަކުގައި އިސްރާއީލުވަނީ ލުބްނާނުގެ އެތަށް ހާސް ބަޔަކު މަރާލައިފައެވެ. އަދި އިސްރާއީލުވަނީ އެއްގަމު މަގުން ލުބްނާނަށް އަރައިގަންނާނެކަމުގެ އިންޒާރު ވެސް ދީފައެވެ.