އުރީދޫއިން އެޕަލްގެ އެންމެ ފަހުގެ އައިފޯން ޕްރީއޯޑަރު ކުރި ފަރާތްތަކާ ފޯނު ހަވާލުކޮށްފިއެވެ.
މިދިޔަ ހުކުރު ދުވަހު ޕްރީއޯޑަރަށް ހުޅުވާލުމަށް ފަހު، އުރީދޫއިން ކަސްޓަމަރުންނާ ފޯނުތައް ހަވާލުކުރީ ރޭ 12 ޖެހިއިރު އެ ކުންފުނީގެ މައި އޮފީހުގައެވެ.
އުރީދޫއިން އައިފޯން 16 ޕްރޯ ޕްރީއޯޑާ ކުރަން ފެށޭ އަގަކީ 24،899 ރުފިޔާ ކަމަށްވާއިރު، ޕްރޯ މެކްސްގެ ފެށޭ އަގަކީ 27،199 ރުފިޔާއެވެ.
އުރީދޫއިން އައިފޯން 16 ޕްރީއޯޑާ ކުރި ފަރާތްތަކަށް ފޯނު ހަވާލުކުރުން -- ފޮޓޯ/ އުރީދޫ
އާޓިފިޝަލް އިންޓެލިޖެންސް (އޭއައި)ގެ ގާބިލުކަމަށް ޚާއްސަކޮށް ފަރުމާކޮށްފައިވާ، އެޕަލް ކުންފުނީގެ އެންމެ ފަހުގެ ސްމާޓްފޯންތައް ތައާރަފުކޮށްފައި ވަނީ މިމަހުގެ ނުވައެއްގައެވެ.
އައިފޯން 16 ޕްރޯގެ ކުލަތަކުގެ ތެރޭގައި ހިމެނެނީ ބްލެކް ޓައިޓޭނިއަމް، ޑެޒާޓް ޓައިޓޭނިއަމް، ނެޗުރަލް ޓައިޓޭނިއަމް އަދި ވައިޓް ޓައިޓޭނިއަމް އެވެ. އައިފޯން 16 ޕްރޯ މެކްސް ވެސް ލިބެން ހުންނާނީ އެ ކުލަތަކުންނެވެ.
އާ އައިފޯންތަކުން ފާހަގަކޮށްލެވޭ ފީޗާތަކުގެ ތެރޭގައި، ޕަވާ ބަޓަންގެ ތިރީގައި ހުންނަ 'ކެމެރާ ކޮންޓްރޯލް' ބަޓަން އާއި ކުރީގެ ފޯނުތަކަށް ވުރެ އެތައް ގުނައެއް ހަލުވިކޮށްދޭ ޕްރޮސެސަރު ހިމެނެއެވެ.