އެއްވެސް ގައުމަކުން ހަމަލާ ދިފިނަމަ، ނިއުކްލިއާ ހަތިޔާރު ބޭނުންކުރެވިދާނެ ކަމަށް ވިދާޅުވެ، ރަޝިއާގެ ރައީސް ވްލަމީޑިއާ ޕުޓިން ވަރުގަދަ އިންޒާރެއް ހުޅަނގަށް ދެއްވައިފިއެވެ.
ޕުޓިން އެގޮތަށް ވިދާޅުވީ ރަޝިޔާގެ ސަލާމަތީ މަޖިލީހުގެ ބައްދަލުވުމެއް ފައްޓަވައިދެއްވަމުންނެވެ.
ރަޝިއާއިން ވަނީ ޔޫކްރޭނުން ހުޅަނގުގެ އާންމު މިސައިލްތައް ރަޝިޔާއަށް ފޮނުވާލުމުގެ ހުއްދަ ދިނުމާއި ނުދިނުމާ ބެހޭ ގޮތުން އެމެރިކާއާއި އިނގިރޭސިވިލާތުގައި ކުރެވުނު މަޝްވަރާތަކަށް ޖަވާބު ދިނުމުގެ ގޮތުން ރަޝިއާގެ ނިއުކްލިއާ ޑޮކްޓްރިންއަށް ބަދަލު ގެނެސްފައެވެ.
"އެއްވެސް ގައުމަކުން ނިއުކްލިއާ ދައުލަތެއްގެ ބައިވެރިވުން ނުވަތަ ތާއީދާ އެކު ރަޝިއާއާ ދެކޮޅަށް އުދުވާނީ ހަމަލާއެއް ދިނުމަކީ ހުޅަނގުގެ ގައުމުތަކުން ބައިވެރިވެގެންދޭ ހަމަލާއެއް ކަމުގައި ބަލާނަން،" ޕޫޓިން ވިދާޅުވިއެވެ.
ރަޝިއާއަށް ނުވަތަ އެކުވެރި ބެލަރޫސްއަށް ވެސް އުދުވާނީ ހަތިޔާރު ބޭނުން ކުރުމުގެ ހައްގު ލިބިގެންވާ ކަމަށާއި އޭގެ ތެރޭގައި އާންމު ހަތިޔާރު ވެސް ހިމެނޭ ކަމަށް ޕޫޓިން ވިދާޅުވިއެވެ.
ރަޝިޔާއިން މިހާރު ޝާއިއުކޮށްފައިވާ ނިއުކްލިއާ ޑޮކްޓްރިންއަކީ 2020 ވަނަ އަހަރު ޕޫޓިން ނެރުއްވި އަމުރެއްގެ ދަށުން ނެރެފައިވާ އެއްޗެކެވެ. އޭގައި ބުނާ ގޮތުން ރަޝިއާއަށް ނިއުކްލިއާ ހަމަލާއެއް ދެވޭނީ ހަމައެކަނި ދުޝްމަނު ގައުމަކުން ހަމަލާދީފިނަމަ ނުވަތަ ރަޝިއާ ނައްތާލަން ހަމަލާއެއް ދީފިނަމައެވެ.
ސެންޓްރަލް އިންޓެލިޖެންސް އެޖެންސީގެ ޑިރެކްޓަރު ބިލް ބާންސް ވިދާޅުވި ގޮތުގައި ރަޝިއާއަށް ނިއުކްލިއާ ހަތިޔާރު ބޭނުންކުރުމުގެ ފުރުސަތު އޮތުމާ ގުޅިގެން އެކަމުގެ ނުރައްކާތެރިކަމާ މެދު އެމެރިކާއިން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ.
މިހާރު ދެ އަހަރާއި ބައި ވެފައިވާ ރަޝިއާ ޔޫކްރެއިން ހަނގުރާމައަކީ 1962 ވަނަ އަހަރު ހިނގި ކިއުބާގެ މިސައިލް ކްރައިސިސްއަށް މިހާތަނަށް ރަޝިއާއާއި ހުޅަނގާއި ކުރިމަތިވެފައިވާ އެންމެ ބޮޑު ހަމަނުޖެހުމެވެ.