މި ފަހުން ބައެއް ގެތަކުގެ ކަރަންޓު ބިލު އިންތިހާއަށް ބޮޑުވި މައްސަލައިގައި ސްޓެލްކޯއިން ހަދަމުންދާ އޮޑިޓުން މިހާތަނަށް އެނގުނީ، އެއީ އޭސީ ބޭނުންކުރާ ގޮތުން ދިމާވާ މައްސަލައެއްކަން ކަމަށް އެ ކުންފުނިން މިއަދު ބުނެފިއެވެ.
މާލެ އާއި ހުޅުމާލެއިން ކަރަންޓު ބިލު އިންތިހާއަށް ބޮޑު ގެތަކެއް ފާހަގަކުރެވިފައިވާތީ އެ ގެތަކަށް ގޮސް، ހަކަތައިގެ އޮޑިޓެއް ހަދަން ނިންމައިފައިވާ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ މިދިޔަ މަހުގެ ތިނެއްގައެވެ.
އެ އޮޑިޓާ ގުޅޭ ގޮތުން "ސަން"އަށް މައުލޫމާތު ދެމުން އެ ކުންފުނިން ބުނީ ގެތަކަށް ގޮސް ހުރިހާ މީޓަރުތަކެއް ޓެސްޓުކުރިއިރު އެކިއުރެސީގެ މައްސަލައެއް ފާހަގަކުރެވިފައި ނުވާ ކަމަށެވެ.
އަދި މިހާތަނަށް ކަރަންޓު ބިލު ބޮޑުވާ ކަމަށް އޮޑިޓަށް ފާހަގަކުރެވުނީ، އޭސީ ބޭނުންކުރާ ގޮތުން ކަމަށް އެ ކުންފުނިން ބުންޏެވެ. އެގޮތުން އޮޑިޓަށް ފާހަގަކުރެވިފައިވާ މައްސަލަތަކަކީ:
- އޭސީތަކުގެ ޓެމްޕަރޭޗާ ވަރަށް ދަށްކޮށް ސެޓްކޮށް، އަބަދުވެސް ޖައްސާފައި ހުރުން
- ބައެއް ފަހަރަށް އޭސީތައް އޯވާ ސައިޒްވުން (ކޮޓަރި ނުވަތަ އެ ތަނަކަށް ފިނިކޮށްދޭ ވަރަށްވުރެ ބޮޑު އޭސީއެއް ހުރުން)
- ބައެއް ފަހަރު ބޭރަށް ނުކުންނައިރު ނުވަތަ ބޭނުންނުކުރާ ވަގުތުތަކުގައި އޭސީ ނިއްވާނުލާ ހުރުން.
- އައުޓްޑޯ ޔުނިޓް ޕްލޭސްމަންޓްގެ މައްސަލަތައް
ސްޓެލްކޯއިން ބުނި ގޮތުގައި ބޭރަށްދާ ވަގުތުތަކުގައި އާއްމުގޮތެއްގައި މީހުން އޭސީ ނުނިއްވަނީ އޭސީ އޮންކޮށް އަދި އޮފްކުރުމުން ކޫލިން ޑިމާންޑް ބޮޑުވެދާނެ ކަމަށް މީހުންނަށް ހީވެފައި އޮތުމުން ކަމަށެވެ. ނަމަވެސް އޭސީ ނިއްވައިގެން ކޫލިން ޑިމާންޑް ބޮޑު ނުވާނެ ކަމަށް އެ ކުންފުނިން ބުންޏެވެ.
ހަމައެއާއެކު އައުޓްޑޯ ޔުނިޓް ޕްލޭސްމަންޓްގެ މައްސަލަތައް ދިމާވަނީ އެކަށީގެންވާ ވެންޓިލޭޝަނެއް ނެތް ސަރަހައްދުތަކުގައި ބަހައްޓާފައި ހުރުމުގެ ސަބަބުން ކަމަށް އެ ކުންފުނިން ބުންޏެވެ.
އެ އޮޑިޓްގެ މަސައްކަތް އަދިވެސް ކުރިއަށްދާއިރު މިހާތަނަށް މާލެއިން ބަލައިދިނުމަށް އެދިފައިވާ ގެތަކަށް ގޮސް ނިމިފައިވާ ކަމަށް އެ ކުންފުނިން މައުލޫމާތު ދިނެވެ. ނަމަވެސް ހުޅުމާލެއިން ބައެއް ގެތަކަށް ނުދެވި އެބަހުރި ކަމަށާއި އެކަން އެގޮތަށް ވަނީ ކަސްޓަމަރުންނާ ނުގުޅުމުގެ ސަބަބުން ކަމަށް ބުނެފައިވެއެވެ. އަންނަ ހަފުތާގައި އިތުރު ސްޓާފުން އެކަމަށް ހަމަޖައްސާނެ ކަމަށް ވެސް އެ ކުންފުނިން ބުންޏެވެ.
މި އަހަރުގެ ރޯދަ މަހަށް ފަހު ކަރަންޓު ބިލު ބޮޑުވެ، އާންމުން ވަނީ ސޯޝަލް މީޑިއާގައި އެތައް ޝަކުވާތަކެއް ކޮށްފައެވެ. އެ ޝަކުވާތަކާ ގުޅޭ ގޮތުން މީގެ ކުރިން ސްޓެލްކޯއިން ބުނެފައިވަނީ، ބިލު ބޮޑުވަނީ ކަރަންޓު ބޭނުންކުރާ މިންވަރު އިތުރުވުމުން ކަމަށެވެ.
ހަމައެއާއެކު މި މައްސަލާގައި ރައްޔިތުން ވަނީ ސްޓެލްކޯ ކުރިމަތީގައި މީގެ ކުރިން އިހުތިޖާޖުވެސް ކޮށްފައެވެ.
ކަރަންޓު ބިލް ބޮޑުވުމުން ސްޓެލްކޯއަށް ގިނަ ބަޔަކު ފާޑުކިޔުން އަމާޒުވަމުންދިޔައިރު، މި ޚިދުމަތުގެ ކަންކަން ބަލަހައްޓައި ރެގިއުލޭޓްކުރުމުގެ ޒިންމާ އޮންނަ ޔުޓިލިޓީ ރެގިއުލޭޓަރީ އޮތޯރިޓީއިން ވަނީ ކަރަންޓު ބިލުތައް ބޮޑުވާ މައްސަލައާ ގުޅިގެން ހޯދި ހޯދުންތަކުން ބިލުތަކުގައިވާ އަދަދުތަކަކީ ރަނގަޅު އަދަދުތަކެއް ކަމަށާއި ބިލު ކުރުމުގައި މައްސަލައެއް ހުރިކަން ފާހަގަވެފައި ނެތް ކަމަށް ބުނެފައެވެ.