ބޭރުން ރާއްޖެއަށް އަންނަ ޓޫރިސްޓު އުޅަނދުތަކުގެ އެޖެންޓުކަން ހަމައެކަނި ދިވެހި ކުންފުނިތަކަށް ލިބޭ ގޮތަށް ގަވާއިދަށް އިސްލާހުތަކެއް ގެނެސްފިއެވެ.
ދިވެހިރާއްޖެއަށް އަންނަ ބޭރުގެ ޓޫރިސްޓު އުޅަނދުފަހަރު ރާއްޖޭގެ ސަރަހައްދުގައި ދުއްވުމާއި ބަނދަރުކުރުމާ ބެހޭ ގަވާއިދަށް ގެނައި އެއްވަނަ އިސްލާހު އިއްޔެ ވަނީ ގެޒެޓުކޮށްފައެވެ.
އެ އިސްލާހުގައި ބުނާގޮތުން ނަމަ ބޭރުގެ ޓޫރިސްޓު އުޅަނދެއްގެ އެޖެންޓުކަމާ ހަވާލުވެވޭނީ ހިއްސާދާރުންގެ ގޮތުގައި ހަމައެކަނި ދިވެހި ރައްޔިތުން ހިމެނޭ ކުންފުންޏަކަށެވެ.
އެ ފަދަ ކުންފުންޏެއްގެ ހިއްސާދާރުންގެ ގޮތުގައި ކުންފުންޏެއް ނުވަތަ ޕާޓްނާޝިޕެއް ނުވަތަ ސޯލް-ޕްރޮޕްރިއޭޓަޝިޕެއް ހިމެނޭނަމަ އެފަދަ ކުންފުންޏެއްގައި ތިބެން ވާނީ ހަމައެކަނި ދިވެހި ރައްޔިތުން ކަމަށް އެ އިސްލާހުގައި ބުނެފައިވެއެވެ.
ހަމައެއާ އެކު ޓޫރިސްޓު އުޅަނދަކަށް ރާއްޖެ އާދެވޭނީ ވެސް އެ އުޅަނދުގެ ކަންކަމާ ހަވާލުވާނެ އެޖެންޓަކު ރާއްޖެއިން ހަމަޖެއްސުމަށް ފަހުއެވެ. އަދި, ޓޫރިސްޓު އުޅަނދުތަކުގައި ރާއްޖެ އަންނަ ފަޅުވެރިންނާއި ފަސިންޖަރުންދާ އެކްސްކާޝަންތަކުގައި ބައިވެރިވެވޭނީ ހަމައެކަނި ހުއްދަ އޮންނަ ޓުއާގައިޑުންނަށް އެކަންޏެވެ.
މީގެ އިތުރުން, އެ ގަވާއިދުގައި ޓޫރިޒަމް މިނިސްޓްރީން ވަނީ ޓޫރިސްޓު އުޅަނދުތަކަށް ދޫކުރާ ޕެސެންޖާ ލައިސަންސަށް ނަގާ ފީއަށް ވެސް ބަަދަލު ގެނެސްފައެވެ. އެގޮތުން:
- ދިގުމިނުގައި 20 މީޓަރަށް ވުރެ ކުދި އުޅަނދުތައް: ދުވާލަކަށް 100 ޑޮލަރު
- ދިގުމިނުގައި 35 މީޓަރަށް ވުރެ ކުދި އުޅަނދުތައް: ދުވާލަކަށް 250 ޑޮލަރު
- ދިގުމިނުގައި 45 މީޓަރަށް ވުރެ ކުދި އުޅަނދުތައް: ދުވާލަކަށް 400 ޑޮލަރު
- ދިގުމިނުގައި 75 މީޓަރަށް ވުރެ ކުދި އުޅަނދުތައް: ދުވާލަކަށް 550 ޑޮލަރު
- ދިގުމިނުގައި 100 މީޓަރަށް ވުރެ ކުދި އުޅަނދުތައް: ދުވާލަކަށް 650 ޑޮލަރު
- ދިގުމިނުގައި 100 މީޓަރަށް ވުރެ ބޮޑު ކްރޫޒް ލައިނާ ނޫން އުޅަނދުތައް: ދުވާލަކަށް 750 ޑޮލަރު
- ދިގުމިނުގައި 100 މީޓަރަށް ވުރެ ބޮޑު ކްރޫޒް ލައިނާތައް: ދުވާލަކަށް 850 ޑޮލަރު
ގަވާއިދަށް ގެނައި އިތުރު އިސްލާހަކީ، ކުރިން "ޗާޓާ ލައިސަންސް"ގެ ނަމުގައި ދެމުން އައި ލައިސެންސް "ޕެސެންޖާ ލައިސެންސް"ގެ ނަމަށް ބަދަލުކޮށް، އިތުރު ފީއެއް ނަގާ ގޮތަށް ބަދަލުކުރުމެވެ. އިތުރަށް ނަގާނެ ފީއަކީ އުޅަނދަށް އަރާ ކޮންމެ ފަސިންޖަރަކަށް ފަސް ޑޮލަރުގެ ރޭޓުން ނަގާނެ ފީއެކެވެ. މިއީ އެ އުޅަނދަކުން ނަގާ ދައްކަންޖެހޭނެ ފީއެކެވެ.
އެގޮތުން, ޕެސެންޖާ ލައިސެންސް ދޫކުރަނީ ހުށަހަޅަން ޖެހޭ ލިޔެކިޔުންތައް ހުށަހަޅައި އުޅަނދުގެ ކުޑަ ބޮޑު މިނަށް ބަލާފައެވެ. އަދި, ދުވާލަކަށް ކޮންމެ ފަތުރުވެރިއަކު ދައްކަން ޖެހޭ ފީ ދައްކަންޖެހޭނެއެވެ.