މާލޭ ސިޓީގެ މަގުތަކުގެ ހާލަތު ދެނެގަނެ ކުރިމަތިވާ މައްސަލަތައް ހައްލުކުރަން ސާވޭއެއް މާލެ ސިޓީ ކައުންސިލުން ފަށައިފިއެވެ.
އެ ސާވޭ ފަށާފައިވަނީ މިދިޔަ އާދިއްތަ ދުވަހުއެވެ. އެ ކައުންސިލުން ބުނީ، ސާވޭ ކުރިއަށް ގެންދަނީ 19 ދާއިރާއަކަށް ބަހާލައިގެން ކަމަށެވެ.
އެގޮތުން، އެ ސާވޭގެ މަސައްކަތް ނިމޭއިރު މާލޭގެ މަގުތަކުގައި ހުރި މައްސަލަތައް ޑިޖިޓަލްކޮށް ފެންނާނެ ކަމަށް ސިޓީ ކައުންސިލުން ބުންޏެވެ. އޭރުން ހަލާކުވެފައި ހުރި މަގުތަކާއި، ކާނުތަކާއި، ދުވާރުތަކުގެ އިތުރުން އިމާރާތްކުރުމުގެ ގަވާއިދާ ޚިލާފަށް މަސައްކަތް ކުރަމުންދާ ތަންތަން ވެސް ޑިޖިޓަލްކޮށް ފެންނަން ހުންނާނެ ކަމަށް އެ ކައުންސިލުން ބުންޏެވެ.
މާލޭ މަގެއްމަތީ ގާތަށް ހަލާކުވެފައި: މާލޭގެ މަގުތަކުގެ ހާލަތު ދެނެގަންނަން ސާވޭއެއްކޮށް، މައްސަލަތައް ހައްލުކުރާ ކަމަށް ސިޓީ ކައުންސިލުން ބުނެފި -- ފޮޓޯ/ ސިޓީ ކައުންސިލް
ސާވޭގެ ދަށުން މިހާރު ފަށާފައިވާ މަސައްކަތުގެ ތެރޭގައި މާލޭގެ ސްކޫލުތަކުގެ ކައިރީގަ ހުރި ކާނުތައް ސާފުކުރުމާއި، ހަލާކުވެފައި ހުރި މަގުތަކާއި، ދުވާރުތަކާއި، ކާނުތައް މަރާމާތުކުރުން ވެސް ހިމެނެއެވެ. އޭގެ ސަބަބުން މަގުތަކުގައި ހިނގާ އުޅޭ މީހުންނާއި ދުއްވާ އުޅަދުތަކަށް މިހާރު ކުރިމަތިވާ މައްސަލަތަކަށް ކޮންމެ ވެސް ވަރެއްގެ ހައްލެއް ލިބޭނެ ކަމަށް އެ ކައުންސިލުން ބުންޏެވެ.
މި ސާވޭ ނިމި، ޖިޑިޓަލްކޮށް މާލޭގެ މަގުތަކުގެ ޙާލަތު ބެލޭނެ ނިޒާމު ގާއިމުވުމުން، މަގުތަކުގެ ހާލަތު ފަސޭހަކަމާ އެކު ދެނެގަނެވި، ކުރިމަތިވާ މައްސަލަތައް ޙައްލުކުރުމުގެ މަސައްކަތް ވަރަށް ބޮޑަށް އަވަސްވެގެންދާނެ، މާލެ ސިޓީ ކައުންސިލް
އެ މަސައްކަތުގައި ސިޓީ ކައުންސިލްގެ ކައުންސިލަރުން އަމަލީ ގޮތުން ކައުންސިލްގެ މުވައްޒަފުންނާ އެކު ހަރަކާތްތެރިވަމުންދާ ކަމަށް އެ ކައުންސިލުން މައުލޫމާތުދެއެވެ.
ފާހަގަކޮށްލެވޭ ގޮތުގައި މާލޭގެ މަގުތަކުގައި ކާނުގަނޑުތައް ހަލާކުވެފައާއި، ހިނގާބިނގާވެ އުޅުމަށް ބޭނުންކުރާ ޕޭމަންޓުތަކުގައި ވެސް ހިނގަން އުނދަގޫވާ ގޮތަށް ގާތައް ހަލާކުވެފައި ވެސް ހުރެއެވެ. އަދި، ހިނގާފައި ދާއިރު ގެތަކުގެ އަސްކަނި ދަށުން ފެންތިކި ޖަހާ މައްސަލަ ވެސް ބޮޑެވެ.