ކެލިފޯނިއާގެ ސްކޫލްތަކުގައި ސްމާޓްފޯނު ބޭނުންކުރުން މަނާކުރާ ގާނޫނެއް

އެމެރިކާގެ ކެލިފޯނިއާގެ ސްކޫލްތަކުގައި ސްމާޓްފޯނު ބޭނުންކުރުން މަނާކުރާ ގާނޫނެއް ފާސްކޮށްފިއެވެ.

ކެލިފޯނިއާގެ ގަވަރުނަރު ގެވިން ނިއުސަމް އިއްޔެ އެ ގާނޫނުގައި ސޮއިކުރެއްވީ ފޯނު މާގިނައިން ބޭނުންކުރުމަކީ ނަފްސާނީ ބަލިތަކުގެ ނުރައްކާ އިތުރުވެ، އުނގެނުމަށް ދަތިވެދާނެ ކަމެއް ކަމަށް ގިނަ ބަޔަކު ބުނަމުން އަންނަ ދަނޑިވަޅެއްގައެވެ.

އެ ގާނޫނުގައި ބުނެފައި ވަނީ ސްކޫލް ބޯޑުތަކުން ނުވަތަ އެހެން ގަވާނިން ބޮޑީތަކުން، އެކެއް ޖުލައި، 2026 ގެ ކުރިން ކެމްޕަހުގައި ދަރިވަރުން ސްމާޓްފޯނު ބޭނުންކުރުން ހަނި ނުވަތަ މަނާކުރުމުގެ ސިޔާސަތެއް އެކުލަވާލައި، ކޮންމެ ފަސް އަހަރަކުން އަޕްޑޭޓް ކުރުމަށެވެ.

އެޑިއުކޭޝަން ވީކްއާ ހަވާލާދީ ރޮއިޓާސްއިން ބުނީ ސްކޫލްތަކުގައި ސްމާޓް ފޯނު ބޭނުންކުރުން އެންމެ ފުރަތަމަ މަނާކުރި އެމެރިކާ ސްޓޭޓަކީ ފްލޮރިޑާއިން ކަމަށެވެ.

އޭގެފަހުން މި އަހަރު އިތުރު 13 ސްޓޭޓަކުން ވަނީ ސްކޫލުގައި ފޯނު ބޭނުންކުރުން މަނާކޮށް ނުވަތަ ހަނިކޮށްފައި ނުވަތަ ލޯކަލް އެޑިއުކޭޓަރުންނަށް އެކަން ކުރުމަށް ލަފާދީފައެވެ.

ކެލިފޯނިއާގައި ގާތްގަނޑަކަށް 5.9 މިލިއަން ޕަބްލިކް ސްކޫލް ދަރިވަރުން އުޅެއެވެ.

ފޯނު ބޭނުންކުރުމުން ނަފްސާނީ ގޮތުން ލިބޭ ގެއްލުމުގެ ބޮޑުކަން އަންގައިދިނުމަށް ސޯޝަލް މީޑިއާ ޕްލެޓްފޯމްތަކުގައި ސިނގިރޭޓް ޕެކޭޖުތަކުގައި ހުންނަ ކަހަލަ އިންޒާރު ލޭބަލެއް ޖަހަން އެމެރިކާގެ ސާޖަން ޖެނެރަލް ވިވެކް މާތީ ވަނީ ގޮވާލާފައެވެ.

މާތީ ވަނީ މެޑިކަލް ޖާނަލް ޖާމާގައި ކުރި ދިރާސާއަކުން ހޯދި ހޯދުންތަކެއް ހާމަކޮށްފައެވެ.

އެ ދިރާސާއިން ދައްކާ ގޮތުގައި ސޯޝަލް މީޑިއާގައި ދުވާލަކު ތިން ގަޑިއިރަށް ވުރެ ގިނައިރު ހޭދަކުރާ ފުރާވަރުގެ ކުދިންނަށް ނަފްސާނީ ބަލިތަކުގެ ނުރައްކާ ބޮޑުވެދާނެއެވެ.