އެމެރިކާގެ އިދިކޮޅު ރިޔާސީ ކެންޑިޑޭޓް އަދި ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލުމަށް ފްލޮރިޑާގައި ހުންނަ އޭނާގެ ގޯލްފް ކޯސް ކައިރީގައި ފިލާ އޮވެ, ހަމަލާދިން ކަމަށް ތުހުމަތުކުރާ ރަޔަން ރޫތް ވަނީ ޓްރަމްޕް އަވަހާރަކޮށްލަން ބޭނުންވާ ކަމަށް ބުނެ, ނޯޓެއް ލިޔެފައި ކަމަށް އޭނާއާ ދެކޮޅަށް ކޯޓަށް ހުށަހެޅި ލިޔުންތަކުގައި ބުނެފިއެވެ.
އެ ނޯޓު ހުށަހަޅާފައިވަނީ ހޯމަ ދުވަހު އަޑުއެހުމެއްގެ ކުރިން ހުށަހެޅި ޑިޓެންޝަން މެމޯއެއްގައެވެ. އެއީ، ކޯޓު މަރުހަލާ ފެށުމުގެ ކުރިން ރޫތް ބަންދުގައި ބަހައްޓަންޖެހޭ ސަބަބު ބަޔާންކޮށް، އެ ކަމުގެ ހެކީގެ ގޮތުގައި ހުށަހަޅާފައިވާ ނޯޓެކެވެ.
"މިއީ ޓްރަމްޕް އަވަހާރަކޮށްލުމުގެ ބޭނުމުގައި ކުރާ މަސައްކަތެއް،" ނޯޓުގައިވެއެވެ.
މީގެ މަސްތަކެއް ކުރިން އެ ނޯޓު ވަނީ ކާކުކަން ނޭނގޭ މީހެއްގެ ގޭގައި ހުރި ފޮއްޓަކަށް ވައްޓައިލާފައި ކަމަށާއި، އެ ފޮށި ހުޅުވާފައިވަނީ މި މަހުގެ 15 ވަނަ ދުވަހު ރޫތް ހައްޔަރުކުރި ފަހުން ކަމަށް އިއްޔެ ކޯޓަށް ހުށަހެޅި ލިޔުންތަކުގައި ޕްރޮސެކިއުޓަރުން ބުނެފައިވެއެވެ. އެ ފޮށީގައި ނޯޓުގެ އިތުރުން ވަޒަނާއި ދަގަނޑު ހޮޅިއަކާއި އިމާރާތް ކުރުމަށް ބޭނުންވާ ތަކެއްޗާއި ފޯނަކާއި ސިޓީތަކެއް ވެސް ހުއްޓެވެ.
"މިއީ ޑޮނަލްޑް ޓްރަމްޕް އަވަހާރަކޮށްލަން ކުރި ކަމެއް ނަމަވެސް އަހަރެން ފެއިލްވީ. އަހަރެން ކުރެވެން އޮތް ހުރިހާ މަސައްކަތެއް ކޮށްފިން. އެ މަސައްކަތް ނިންމުމަކީ މިހާރު ކަލޭގެ ކަމެއް. އަދި، އެކަން ނިންމާލެވުނު ކޮންމެ މީހަކަށް 150،000 ޑޮލަރު ހުށަހަޅާނަން،" އެ ނޯޓުގައި ބުނެފައިވާ ކަމަށް ޕީޖީން ބުނެފައިވެއެވެ.
ކުރިން ލިޔެފައިވާ އެ ނޯޓުގައި ވަނީ ޓްރަމްޕް އަވަހާރަކޮށްލަން ކުރި މަސައްކަތެއް ނާކާމިޔާބުވުމުން އެ ވާހަކަ ކަމަށް ބެލެވެއެވެ. އުމުރުން 58 އަހަރުގެ ރޫތްގެ މައްޗަށް، ޓްރަމްޕް އަވަހާރަކޮށްލަން އުޅުމުގެ އިތުރުން އެހެން ދައުވާތަކެއް ވެސް ކުރެއެވެ.
ވެސްޓް ޕާމް ބީޗުގައި ހުންނަ ޓްރަމްޕްގެ ގޮލްފް ކޯހުގައި ހުރި ގަސްތަކެއްގެ ތެރޭ ރައުތު އޮއްވައި ސީކްރެޓް ސާވިސްގެ އެޖެންޓަކަށް ފުރަތަމަ ފެނުނީ މޫނު ކަމަށާއި އޭނާ އަތުގައި އޮތް ބަޑި ފެނުނީ ފަހުން ކަމަށް ޕްރޮސިކިއުޓަރުން ވަނީ ބުނެފައެވެ.
އޭނާ ހައްޔަރުކުރީ ޓްރަމްޕްގެ ގޯލްފް ކޯސް ކައިރީގައި ސަލާމަތީ ނުރައްކާތަކެއް ކުރިމަތިވެދާނެ ކަމަށް ބަލަމުން ދިޔަ ސީކްރެޓް ސާވިސްގެ އޭޖެންޓަށް ފެނިގެންނެވެ. އޭޖެންޓަށް ފެނުނުއިރު އޭނާ އޮތީ ގަސްތަކުގައި ފިލައެވެ. އެ ތަނުގައި 12 ގަޑިއިރު ވަންދެން އޭނާ ފިލައި އޮތް ކަމަށް ވެސް މީޑިއާތަކުން މީގެ ކުރިން ރިޕޯޓުކޮށްފައިވެއެވެ.