މިމަހުގެ ނުވަވަނަ ދުވަހު ހުސްވި ބޭންކް އޮފް މޯލްޑިވްސް (ބީއެމްއެލް)ގެ ސީއީއޯގެ މަގާމަށް ކުރިމަތިލުމަށް މިއަދު ހުޅުވައިލައިފިއެވެ.
ބީއެމްއެލްގެ ސީއީއޯގެ މަސްއޫލިއްޔަތުތަކުގެ ތެރޭގައި:
- ޖުމްލަކޮށް މުޅި ބޭންކުގެ މެނޭޖްމަންޓަށް ޒިންމާވުން
- ވިޔަފާރީގެ ސިޔާސަތުތަކާއި ޕްލޭންތައް އެކުލަވައިލުން
- ބޭންކުގެ މުވައްޒަފުން ލީޑުކޮށް، މުވައްޒަފުންގެ ދައުރު އިތުރުކުރުމަށް ހިތްވަރުދިނުން
- ވިޔަފާރި ހަރަކާތްތަކާއި މުޅި ބޭންކުގެ އޮޕަރޭޝަން ބަލައި، ބޭންކުގެ ސިޔާސަތާ އެއްގޮތަށް އެ މަސައްކަތް ކުރިޔަށްދާކަން ޔަގީންކުރުން
ޝަރުތުތައް:
- ބޭންކިން ދާއިރާއިން 15 އަހަރު ދުވަހުގެ މަސައްކަތުގެ ތަޖުރިބާ ހިމެނޭ ގޮތަށް ސީނިއާ އެކްސްކިއުޓިވް މެނޭޖްމަންޓްގައި ފަސް އަހަރު ދުވަހުގެ މަސައްކަތުގެ ތަޖުރިބާ ލިބިފައިވުން
- ޕްލޭން ކުރުމުގެ ވަރުގަދަ ވިސްނުމަކާ އެކު ވަރުގަދަ ލީޑަޝިޕެއްގެ އަދި މެނޭޖްމަންޓުގެ ހުނަރުތައް ލިބިފައިވުން
- ވިޔަފާރީގެ ކުޅަދާނަކަމާއި މުއާމަލާތު ކުރުމާއި، މީހުން ބެލެހެއްޓުމާއި، ގުޅިގެން މަސައްކަތް ކުރުމުގެ ހުނަރު ލިބިފައިވުން
- ބޭންކިން، ފައިނޭންސް ނުވަތަ އެއާ ގުޅުންހުރި ދާއިރާއަކުން ގްރެޖުއޭޓް ފާހެއް ލިބިފައިވުން
- ޕްރޮފެޝަނަލް ބޭންކިން ބޮޑީއެއްގެ މެންބަރަކަށްވުން
ބީއެމްއެލުން ބުނީ ސީއީއޯގެ މުސާރަ ކަނޑައެޅޭނީ ތައުލީމާއި ތަޖުރިބާގެ މައްޗަށް ކަމަށެވެ. މުސާރައިގެ އިތުރަށް ލިބޭ އެހެނިހެން އިނާޔަތްތަކުގެ ތެރޭގައި ހިމެނެނީ ދިރިއުޅޭނެ ތަނެއް، ކާރެއް، މެޑިކަލް އެލަވަންސް، ރިޕެޓްރިއޭޝަން ގްރާންޓް، އެނުއަލް އެއާފެއާއިއެކު މުސާރަ ލިބޭ ޗުއްޓީ ހިމެނެއެވެ.
ބީއެމްއެލްގެ ސީއީއޯ ކަމަށް ކުރިމަތިލުމަށް [email protected]v އަށް ސީވީއާއި ސެޓްފިކެޓުތަކުގެ ކޮޕީއާއި، ފަހުން ނަގާފައިވާ ފޮޓޯ ފޮނުވުމަށް ބީއެމްއެލުން ވަނީ އެދިފައެވެ.
ބީއެމްއެލްގެ ސީއީއޯގެ މަގާމަށް އެދި ހުށަހެޅުމުގެ ސުން ގަޑިއަކީ ހަތެއް އޮކްޓޫބަރު 2024އެވެ.
ބީއެމްއެލްއަށް ސީއީއޯއަކު ހޯދަން އިއުލާންކުރީ އެ މަގާމުގައި ހުންނެވި ކާލް ސްޓުމްކަ އިސްތިއުފާ ދެއްވުމާއި ގުޅިގެންނެވެ. ބީއެމްއެލަށް އާ ސީއީއޯއެއް އައްޔަންކުރަންދެން ސީއީއޯގެ ޒިންމާތައް އަދާކުރައްވާނީ ޑެޕިއުޓީ ސީއީއޯ ޢާއިޝަތު ނޫރައްދީނެވެ.