މިނިސްޓްރީގެ ހުއްދަ ނުހޯދާ ޚިދުމަތް ދޭތީ، 'ފަޒީސް ހިޖާމާ ތެރަޕީ' ބަންދުކޮށްދިނުމަށް ހެލްތު މިނިސްޓްރީން ފުލުހުންނަށް ހުށަހަޅައިފިއެވެ.
ފަޒީސް ހިޖާމާ ތެރަޕީއަކީ ފަޒީލާ ޢުސްމާނު ހިންގާ ތަނެއް ކަމަށްވާއިރު، މިނިސްޓްރީގައި ރަޖިސްޓްރީކޮށްގެން ހިޖާމަ ޖެހުމުގެ ޚިދުމަތް ދިނުމަށް އެތައް ފަހަރެއްގެ މަތިން ހެލްތު މިނިސްޓްރީން ފަޒީލާއަށް ވަނީ އަންގާފައެވެ.
އަދި، ރަޖިސްޓްރީނުކޮށް ހިންގާ ނަމަ އެ މަސައްކަތް ހުއްޓާލުމަށް ވެސް އެންގިއެވެ. ނަމަވެސް، ރަޖިސްޓްރީ ނުކޮށް، ފަޒީލާ އައީ ހިޖާމާ ޖެހުމުގެ ޚިދުމަތް ދެމުން ކަމަށް ހެލްތް މިނިސްޓްރީން ބުނެއެވެ.
މިކަމާ ގުޅުވައި ފުލުހުން މިއަދު މީޑިއާތަކާއި ހިއްސާކުރި މެސެޖެއްގައި ބުނީ، ހެލްތު މިނިސްޓްރީގެ ހުއްދަ ނުހޯދާ ހިޖާމާ ޖެހުމުގެ ޚިދުމަތް ހުޅުމާލޭގައި ދެމުން އަންނަ ކްލިނިކެއްގެ މައްސަލަ ބަލައިދިނުމަށް މިނިސްޓްރީން އެދިފައިވާ ކަމަށެވެ.
އެހެންވެ، އެ މައްސަލަ ތަހުގީގު ކުރާ ކަމަށް ފުލުހުން ބުނެފައިވެއެވެ.
މިމަހުގެ 11ގައި މިނިސްޓްރީން ނެރުނު ބަޔާނެއްގައި ވަނީ "ފަޒީސް ހިޖާމާ ތެރަޕީ"ގެ ނަމުގައި ސޯޝަލް މިޑިއާގައި ޞިއްހީ ޚިދުމަތުގެ ގޮތުގައި ކޮށްފައިވާ އިޝަތިހާރުތަކަކީ ވެސް ހެލްތު މިނިސްޓްރީގެ ހުއްދަލިބިގެން މެނުވީ ނުކުރެވޭނެ ކަންކަން ކަމަށްވާތީ އެފަދަ އިޝްތިހާރުތައް ވެސް ނެގުމަށް އަންގާފައިވާ ކަމަށް ބުނެފައިވެއެވެ.
ރެޖިސްޓްރީނުކޮށް ހިޖާމާއާއި ދިވެހިބޭހުގެ ޚިދުމަތް ދެމުންދާކަން ފާހަގަކުރެވުމާއެކު، އެ ފަދަ ކަންކަން ކުރާ ފަރާތްތަކާ މެދު ފިޔަވަޅު އަޅާނެކަން ހެލްތު މިނިސްޓްރީން އޮތީ އަންގައި އިއުލާން ވެސް ކޮށްފައެވެ.
ފަޒީއަކީ ހިޖާމާ ޖަހައިގެން ވަރަށް ބޮޑު އާމްދަނީއެއް ހޯދަމުން އައި މީހެކެވެ.