މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ އަސާސީ ގަވާއިދުގެ 40ވަނަ މާއްދާގެ ދަށުން، ރަށު މަޖިލިސްތަކުގެ އިންތިޚާބު ހަތަރު ރަށެއްގައި ބާއްވަން ނިންމައިފިއެވެ.
މި އިންތިޚާބު ބާއްވަން ނިންމާފައި ވަނީ، އަންނަ މަހުގެ 18ވަނަ ދުވަހުއެވެ. އިންތިޚާބު ބާއްވަނީ ދ. އަތޮޅު މީދޫ، ބަނޑިދޫ، ރިނބުދޫ އަދި ހުޅުދެލީގައެވެ.
އެމްޑީއޭގެ އަސާސީ ގަވާއިދުގެ ދަށުން އިންތިޚާބު ކުރެވޭ ރަށު މަޖިލީހުގެ ހިންގާ ކޮމިޓީ އެކުލެވިގެން ވަނީ 15 މަގާމެއްގެ މައްޗަށެވެ. އެއީ:
- ޗެއާޕާސަންގެ މަގާމު
- ވައިސް ޗެއާޕާސަންގެ މަގާމު
- ސެކްރެޓަރީގެ މަގާމު
- ޚަޒާންދާރުގެ މަގާމު
- ހިންގާ ކޮމިޓީގެ ހަ މެމްބަރުން
- ހިންގާ ކޮމިޓީގައި އަންހެނުންނަށް ޚާއްސަ ފަސް މެމްބަރުން
ރަށު މަޖިލިސް އިންތިޚާބުގައި ވޯޓު ދިނުމުގެ ހައްގު ލިބިގެންވަނީ އެމްޑީއޭގެ މެމްބަރުންގެ ދަފުތަރުގައި ރަޖިސްޓްރީވެފައިވާ އެރަށެއްގެ މެމްބަރުންނަށެވެ. އެގޮތުން އަންނަ މަހުގެ 13ވަނަ ދުވަހުގެ ނިޔަލަށް އެމްޑީއޭއަށް ވަނުމަށް އެދި އެ ރަށެއްގައި ގާއިމްކުރެވިފައިވާ އެމްޑީއޭގެ އޮފީހަށް ނުވަތަ އެމްޑީއޭގެ މައި އޮފީހަށް ފޯމު ހުށަހަޅާ މީހުންނަށް އިންތިޚާބުގައި ވޯޓު ލުމުގެ ފުރުސަތު ހުޅުވާލެވިފައި ވާކަމަށް އެ ޕާޓީން ބުންޏެވެ.
މި އިންތިޚާބުގައި ވާދަކުރުމަށް ޝައުގުވެރިވާ އެމްޑީއޭގެ މެމްބަރުން އަންނަ ހޮނިހިރު ދުވަހުން ފެށިގެން އަންނަ މަހުގެ އަށްވަނަ ދުވަހުގެ 14:00ގެ ކުރިން އިންތިޚާބުގައި ވާދަކުރުމަށް ހުށަހަޅަންޖެހޭ ފޯމު އެރަށެއްގައި ހުންނަ އެމްޑީއޭގެ އޮފީހަކަށް ހުށަހެޅުމަށް އެ ޕާޓީން ވަނީ އެދިފައެވެ.
އީމެއިލް މެދުވެރިކޮށް ފޯމު ހުށަހަޅާނަމަ، އެމްޑީއޭގެ ރަސްމީ އީމެއިލަށް ފޯމު ހުށަހެޅޭނެއެވެ.
އިންތިޚާބުގައި ވާދަކުރުމަށް އެދި ހުށަހަޅަންޖެހޭ ފޯމު އިންތިޚާބު ބާއްވާ ހަތަރު ރަށުގެ އޮފީހުންނާއި ޕާޓީގެ މައި އޮފީހުން ލިބޭނެއެވެ.
މި އިންތިޚާބާ ގުޅިގެން "ސަން"އާ ވާހަކަ ދައްކަވަމުން އެމްޑީއޭގެ ނައިބު ރައީސް އަދި ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވީ، މިއީ އެ ޕާޓީ ރީސްޓްރަކްޗާކޮށް ބޮޑު ޕާޓިއަކަށް ހެދުމަށް ކުރާ މަސައްކަތުގެ ތެރެއިން މަސައްކަތެއް ކަމަށެވެ.
އެގޮތުން ހުރިހާ އަތޮޅެއްގައި ވެސް މި އިންތިޚާބު ކުރިއަށް ގެންދާނެ ކަމަށް އައްބާސް ވިދާޅުވިއެވެ.
"އަޅުގަނޑުމެންގެ މެމްބަޝިޕް އެންމެ ބޮޑަށް އޮތް އަތޮޅުތަކުން މި ފަށަނީ،" އޭނާ ވިދާޅުވިއެވެ.
އެގޮތުން އެންމެ ފުރަތަމަ ދ. އަތޮޅުން ފެށުމަށްފަހު ދެން އިންތިޚާބު ބާއްވާނީ ނ. އަތޮޅުގައި ކަމަށާއި އެއަށްފަހު ފުވައްމުލަކު ސިޓީއާއި ކުޅުދުއްފުށީ ސިޓީގައި ވެސް މި އިންތިޚާބު ބާއްވަން ތައްޔާރުވަމުން އަންނަ ކަމަށް އައްބާސް ވިދާޅުވިއެވެ.