ގްލޯބަލް އިސްލާމިކް ފައިނޭންސް އެވޯޑްސް (ގިފާ)ގެ ލީޑަޝިޕް އެވޯޑު ކުރީގެ ރައީސް ޑރ. މުޙައްމަދު ވަހީދު ޙަސަން މަނިކަށް ރޭ އަރުވައިފިއެވެ.
އެ ހަފުލާ ބޭއްވީ ވިލާ ނޯޓިކާ ޕެރަޑައިސް އައިލެންޑް ރިސޯޓުގައި ރެއެވެ.
ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ، ގައުމުތަކުގެ ކުރީގެ އަދި މިހާރުގެ ވެރިންނާއި ސިނާއަތްތަކުގެ ލީޑަރުންނަށްދޭ އެވޯޑެއް ލިބިވަޑައިގަތުމަކީ އެ މަނިކުފާނަށް ލިބޭ ޝަރަފެއް ކަމަށެވެ. އަދި، މި އެވޯޑު މީގެ ކުރިން ލިބިވަޑައިގަތް ބައެއް ލީޑަރުންގެ ތެރޭގައި އިންޑޮނީޝިޔާ، ސެނެގާލް، ކަޒިކިސްތާނު، އިތިއޯޕިއާ އަދި މެލޭޝިޔާގެ ލީޑަރުން ހިމެނިވަޑައިގަންނަވާކަން އެ މަނިކުފާނު ފާހަގަކުރެއްވިއެވެ.
ގިފާއަކީ އެޑްބިޒް ކޯޕަރޭޝަނުން 2011ވަނަ އަހަރު، އިސްލާމިކް ބޭންކިން އެންޑް ފައިނޭންސް ޕްރޮމޯޓްކޮށް ވަކާލާތުކުރުމުގައި ވަކިވަކި ފަރުދުންނާއި މުއައްސަސާތަކާއި ސަރުކާރުތަކުން ހޯދާފައިވާ ކާމިޔާބީތައް ފާހަގަކުރުމުގެ ގޮތުން ދޭން ފެށި އެވޯޑެކެވެ.
މި އެވޯޑު ޖުމްލަ ހަ ކެޓަގަރީއަކުން ދެއެވެ. އޭގެ ތެރޭގައި ހިމެނެނީ:
- ލީޑަޝިޕް އެވޯޑްސް
- ގިފާ މާކެޓް ލީޑަޝިޕް އެވޯޑްސް
- ގިފާ ޗެމްޕިއަންޝިޕް އެވޯޑްސް
- އެކްސެލެންސް އެވާޑްސް
- ޖެނެރަލް ކެޓަގަރީސް
- ޕްރެސްޓީޖަސް (ޝަރަފުވެރިކަމުގެ) އެވޯޑްސް
އިސްލާމިކް ފައިނޭންސްގެ އެންމެ ޝަރަފުވެރި، ނުވަތަ ޕްރެސްޓިޖަސް އެވޯޑްތަކުގެ ގޮތުގައި ގިފާއިން ހަތަރު އެވޯޑެއް ދެއެވެ. އެއީ:
- އިސްލާމިކް ފައިނޭންސް ޕާސަނާލިޓީ އޮފް ދަ އިޔާ
- ގިފާ ސީއީއޯ އޮފް ދަ އިޔާ
- އިސްލާމިކް ބޭންކާ އޮފް ދަ އިޔާ
- ގިފާ ލައިފްޓައިމް އެޗީވްމަންޓް އެވޯޑު
ކޮންމެ އަހަރަކު ވެސް ގިފާ އެވޯޑްސް ކޮމިޓީން، އިސްލާމިކް ފައިނޭންސްގެ ދާއިރާއިން ޚިދުމަތްދޭ، އަދި ޚިދުމަތްކޮށްދީފައިވާ ދުނިޔޭގެ އެކި ކަންކޮޅުތަކުގެ މުއައްސަސާތަކަށާއި ފަރުދުންނަށް އެކި ކެޓަގަރީތަކުން އެވޯޑުދެއެވެ.