ކިޔަވާ ދަރިވަރުންނަކީ އޮޔާދާ ބޮނބި ކާށްޓެއް ކަމުގައި ނުވުމަށް ދިވެހިބަހުގެ އެކެޑަމީގެ ރައީސް ޑރ އަޝްރަފު ޢަބުދުއްރަޙީމް ގޮވައިލައްވައިފިއެވެ.
އޭނާ މިގޮތަށް ގޮވައިލެއްވީ، ގއ. މާމެންދޫ އިސްކޫލުގެ، 2022 ވަނަ އަހަރާއި 2023ވަނަ އަހަރުގެ އިނާމު ދިނުމަށް ޓަކައި ހޮނިހިރު ދުވަހުގެ ރޭ، އެރަށު އިސްކޫލުގައި ބޭއްވި ޖަލްސާ ގައި ވާހަކަދައްކަވަމުންނެވެ.
އެ ޖަލްސާ ޝަރަފުވެރިކޮށްދެއްވައި އިސްކޫލުގެ ދަރިވަރުންނާ މުޚާޠަބުކުރައްވައި ދެއްކެވި ވާހަކައިގައި ކިޔަވައި ދަރިވަރުންނަށް ވަގުތަކީ ކިހައި މުހިންމު އެއްޗެއް ކަމާއި ވަގުތުގެ ބޭނުން ހެޔޮ ގޮތުގައި ހިފުމަށް ގޮވައިލެއްވިއެވެ. ގެއްލިއްޖެ ވަގުތަކީ އަނބުރާ ލިބޭނެ އެއްޗެއް ނޫންކަމާއި ޤުދުރަތީ ޤާނޫނު ރޭވިފައިވާ ގޮތުން ކޮންމެ އެއްޗަކީ ވެސް ވަކި ވަގުތެއް ކަނޑައެޅި ނިމިފައިވާ އެއްޗެއްކަމުގައި އަޝްރަފް ވިދާޅުވިއެވެ. އެ ގޮތުން ހަނދުވަރުގެ ރީތިކަމާއި ތަރިތަކުގެ ވިދުވަރާއި މާމެލާމެލީގެ މީރު ވަހާއި ރީތި ކަމަކީ ވެސް ކަނޑައެޅިފައިވާ މުއްދަތެއްގައި ނިމި ދާ އެއްޗެއް ކަން އަޝްރަފް ފާހަގަކުރެއްވިއެވެ.
އެއީ ފިޠުރަތުގެ ޤާނޫނުކަމަށާއި އެކަން އިންސާނާ ޤަބޫލުކުރާ ފަދައިން ދަރިވަރުގެ ޙަޔާތަކީ ވެސް ވަގުތީ އެއްޗެއްކަމުގައި ގަބޫލުކުރަންޖެހޭ ކަމަށް އަޝްރަފް ވިދާޅުވިއެވެ. އެހެންކަމުން ޙަޔާތުގެ މަދު ދުވަސްކޮޅު ހެޔޮ ގޮތުގައި ބޭނުން ހިފުމަށް އޭނާ ނަސޭހަތްތެރި ވިއެވެ.
އަޝްރަފް ވިދާޅުވީ، ވަގުތުގެ ބޭނުން ހެޔޮ ގޮތުގައި ނުހިފިއްޖެ ނަމަ، ތިމާގެ ހަޔާތަކީ އޮޔާދާ ބޮނބި ކާށްޓެއްކަމުގައި ވެދާނެ ކަމަށާއި އިންސާނާގެ ހަޔާތުގެ އެންމެ އަގު ބޮޑު ފައިސާ ފޮއްޗަކީ ވަގުތު ކަމަށެވެ. އަދި އެ ފައިސާ ފޮތީގެ ބޭނުން އެންމެ ފުރިހަމައަށް ހިފުމުގެ ފުރިހަމަ އިޚުތިޔާރާއި ބާރު ތިމާއަށް ލިބިފައިވާ ކަމަށާއި ހެޔޮ ގޮތުގައި ފައިސާ ފޮތި ބޭނުންނުކޮށް، އެ ފައިސާ ފޮތީން އަނެކާގެ ޚަރަދު ކުރާން ދިނުމަކީ ތިމާގެ ހަޔާތް އޮޔައިލުން ފަދަ ކަމެއްކަމުގައި ވެސް ވިދާޅުވިއެވެ.
އެހެންވީމާ، ގާތް ރަޙުމަތްތެރީން އިޚުތިޔާރު ކުރާއިރު ވިސްނުމަށާއި އަދި ތިމާގެ ހަޔާތުގެ މައްޗަށް އަނެކާއަށް ހައްގު ނޫންގޮތުގައި ވެރިވެވޭނޭ ގޮތަށް، ތިމާގެ ހަޔާތުގެ ދަތުރު ކުރިއަށް ގެންގޮސްގެން ނުވާނެކަމަށް އޭނާ ވިދާޅުވިއެވެ.
ޖަލްސާއާ ބެހޭ ގޮތުން ވާހަކަދައްކަވަމުން އިސްކޫލުގެ ޕްރިންސިޕަލް އާޒިމް ޢަބުދުﷲ ވިދާޅުވީ ސްކޫލުން ބޭނުންވަނީ މި ސްކޫލުން ކިޔަވާ ކޮންމެ ކުއްޖަކީ ވެސް ހަރުދަނާ އަޚްލާޤެއް ލިބިގެންވާ ދަރިވަރަކަށް ވުމުގެ އިތުރުން ޤާބިލް ކުދިންތަކަކަށް ވުމަށެވެ. އަދި އަމިއްލަ ރަށަށާއި މި ގައުމަށް ބޭނުންހިފޭނޭ ފައިދާހުރި އިލްމު އުނގެނުމަށެވެ. ދިވެހި ސަރުކާރުން ތަޢުލީމައްޓަކައި ކުރައްވާ ބުރަ މަސައްކަތްތައް ފާހަގަކޮށް އެކަމަށް ޓަކައި ޝުކުރު ދެންނެވިއެވެ.
އިސްކޫލުގެ ވަރަށް ގިނަ ދަރިވަރުންނާއި ބެލެނިވެރިންނާއި ރަށުގެ އެކިއެކި މުއައްސަސާތަކުގެ ވެރީންގެ އިތުރަށް ރަށުގެ ކަމުވޮށިގެންވާ އެތައް އިއްޒަތްތެރީން މި ޖަލްސާގައި ބައިވެރިވެފައިވެއެވެ. އިސްކޫލުގެ ނިމިދިޔަ ތައުލިމީ އަހަރުގައި އެ އިސްކޫލުން އެކިއެކި ވަނަތަކަށާއި ކަންކަމުގައި ހޮވައިލެވުނު ދަރިވަރުންނަށް އިނާމުތައް ބައްސަވައިދެއްވީ ރަށުގެ މުއައްސަސާތަކުގެ ވެރީންނާއި ރަށުގެ އިއްޒަތްތެރީންނެވެ.
ނިމި ދިޔަ ތައުލީމީ އަހަރުގެ އެންމެ މޮޅު ދަރިވަރަކަށް ހޮވިފައިވަނީ، ގއ. މާމެންދޫ، ދުރަށްފެންނަގޭ އަޙުމަދު އަލްސަން މުޙަންމަދު ޢަލީއެވެ.
މާމެންދޫ ސްކޫލަކީ އަތޮޅުގައި ކިޔެވުމަށް ފާހަގަކޮށްލެވޭ ރަނގަޅު އިސްކޫލެކެވެ.