އެމެރިކާގެ ބޮޑު އެއަރލައިނެއް ކަމުގައިވާ ޔުނައިޓެޑް އެއަރލައިންސްއިން ކުންފުނީގެ ހުރިހާ މަތިންދާބޯޓުތަކެއްގައި ކުރިއަށް އޮތް އަހަރުތަކުގައި ހިލޭ ސްޓާލިންކް ވައިފައި ޚިދުމަތް ފޯރުކޮށްދޭން ނިންމާފައިވާ ކަމަށް އެ ކުންފުނިން ބުނެފިއެވެ.
މިހާތަނަށް މަތިންދާބޯޓުތަކުގައި ލިބެމުން އައި ވައިފައި ޚިދުމަތަކީ އަގުބޮޑު، ލަސް އަދި ކެނޑިކެނޑިގެންދާ ޚިދުމަތެއް ކަމަށް ވުމާއެކު، މި އައު ޚިދުމަތަކީ ފަސިންޖަރުންނަށް ލިބޭނެ ބޮޑު ލުޔެކެވެ.
ޔުނައިޓެޑް އެއަރލައިންސްގެ ސީއީއޯ ސްކޮޓް ކާބީ ވިދާޅުވި ގޮތުގައި، "ބިމުގައި ތިބެގެން ކުރެވޭ ހުރިހާ ކަމެއް، ކުރިއަށް އޮތްތަނުގައި 35،000 ފޫޓު އުސްމިނުގައި ދުނިޔޭގެ ކޮންމެ ހިސާބެއްގައި ވިޔަސް ޔުނައިޓެޑްގެ މަތިންދާބޯޓެއްގައި ކުރެވޭނެ" އެވެ.
ސްޓާލިންކްގެ ޚިދުމަތަކީ އީލޮން މަސްކްގެ ސެޓެލައައިޓް އިންޓަރނެޓް ޚިދުމަތެކެވެ. މި ޚިދުމަތް މެދުވެރިކޮށް، ދަތުރުވެރިންނަށް މަތިންދާބޯޓުގައި ތިބެގެން ވީޑިއޯ ސްޓްރީމްކުރުމާއި، ޒޫމް ކޯލްތައް ކުރުމާއި، އަދި އޮންލައިން ގޭމްތައް ކުޅުމުގެ ފުރުސަތު ލިބިގެންދާނެއެވެ.
ޔުނައިޓެޑް އެއާލައިންސްއަކީ ސްޓާލިންކްގެ ޚިދުމަތް ބޭނުންކުރަން ފަށާ ފުރަތަމަ އެއާލައިނައިނެއް ނޫނެވެ. މީގެ ކުރިން ޖޭއެސްއެކްސް އަދި ހަވައިއަން އެއަރލައިންސްއިން ވެސް މި ޚިދުމަތް ބޭނުންކުރަމުން ގެންދެއެވެ.
މި ޚިދުމަތް ބޭނުންކޮށްފައިވާ ފަރާތްތަކުން ބުނާ ގޮތުގައި، މީގެ ސަބަބުން ދަތުރުވެރިންނަށް ވަރަށް ބޮޑު ހިތްހަމަޖެހުމެއް ލިބިގެން ދާނެއެވެ.
ސްޓާލިންކްގެ ޚިދުމަތަކީ ޢާންމުކޮށް ބޭނުންކުރާ ވައާ ކުރެވިފައިވާ އިންޓަރނެޓް ޚިދުމަތްތަކުގެ ބަދަލެއް ނޫނެވެ. ނަމަވެސް މަތިންދާބޯޓުތަކުގެ ކެބިން ފަދަ ދުރު ސަރަޙައްދުތަކުގައި އިންޓަރނެޓް ޚިދުމަތް ބޭނުންކުރުމަށް ވަރަށް ރަނގަޅު އޮޕްޝަނެކެވެ.
މި ޚިދުމަތުގެ ބޭނުން ޔުކްރެއިންގެ ހަނގުރާމައިގައި ވެސް ހިފަމުންދާ ކަމަށް ވަނީ ފާހަގަކުރެވިފައެވެ.