ހުޅުމާލޭ ފުރަތަމަ ފިޔަވަހިން ރޭ ބަނގުރަލާއެކު ބަންގްލަދޭޝްގެ މީހަކު ހައްޔަރުކޮށްފިއެވެ.
ފުލުހުން އާންމުކުރި މައުލޫމާތުގައިވާ ގޮތުން، ރޭ އެ އިދާރާއިން ވަނީ ހުޅުމާލޭގައި އޮޕަރޭޝަނެއް ހިންގައިފައެވެ. އެގޮތުން ފުލުހުންނަށް ލިބުނު މައުލޫމާތަކާ ގުޅިގެން ހިންގި އެ އޮޕަރޭޝަނުގައި މިދިލިމަގުން ކާރެއް ހުއްޓުވައި ބަލައިފާސްކުރި ކަމަށް ފުލުހުން ބުންޏެވެ.
އެ ކާރުން 144 ދަޅު ބަނގުރަލާއި ހަތަރު ފުޅި ބަނގުރާ ފެނިފައިވާ ކަމަށް ވެސް ފުލުހުން ބުންޏެވެ.
އެ މައްސަލައާ ގުޅިގެން ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ، 26 އަހަރުގެ އެމްޑީ ކާލޫ ކިޔާ މީހެކެވެ.
އެ މައްސަލަ ހުޅުމާލޭ ފުރަތަމަ ފިޔަވަހީގެ ޕޮލިސް ސްޓޭޝަނުން އަންނަނީ ތަހުގީގުކުރަމުންނެވެ.
މިފަހުން ހުޅުމާލެއިން ގިނަ އަދަދެއްގެ ބަނގުރާ ދަޅާއި ފުޅިއާއެކު މީހުން ހައްޔަރުކޮށްފައިވެއެވެ. ފުލުހުންގެ ތަފާސްހިސާބުން ދައްކާ ގޮތުގައި މިއަހަރުގެ މިހާތަނަށް މަސްތުވާތަކެއްޗާ ގުޅުންހުރިޮ 1،152 މައްސަލަ އެ އިދާރާއަށް ހުށަހަޅައިފައިވެއެވެ.