ކެނެޑާއިން އިސްރާއީލަށް ހަތިޔާރު ވިއްކުމުގެ 30 ވަރަކަށް ހުއްދަ ބާތިލުކޮށްފިއެވެ.
އެ ހުއްދަތަކުގެ ތެރޭގައި ޖެނުއަރީ މަހު ހަތިޔާރު ފޯރުކޮށްދިނުމަށް ދީފައިވާ ހުރިހާ ހުއްދަތަކެއް ހިމެނެއެވެ. ހުއްދަތައް ބާތިލުކުރަން ނިންމީ އެ ހަތިޔާރު ބޭނުންކޮށްގެން ޣައްޒާގެ އާންމުންނަށް ގެއްލުން ދީފާނެ ކަމަށެވެ.
ކެނެޑާގެ ޚާރިޖީ ވަޒީރު، މެލާނީ ޖޯލީ ވަނީ ކެނެޑާގެ ހަތިޔާރު ފޯރުކޮށްދޭ ހުރިހާ ކުންފުނިތަކުން އިސްރާއީލާއި އެހެން ގައުމުތަކާ އެކު ހަދާފައިވާ އެއްބަސްވުންތައް މުރާޖައާކުރަން އަންގަވައިފައެވެ.
އަހަރަކު އެތައް ބިލިއަން ޑޮލަރެއްގެ އަސްކަރީ އެހީ އިސްރާއީލަށް ފޯރުކޮށްދޭ އެމެރިކާގެ މުހިއްމު އެކުވެރިއެއް ކަމަށްވާ ކެނެޑާއިން އިސްރާއީލަށް އާ ހަތިޔާރު ފޮނުވުން ޖެނުއަރީ އަށްވަނަ ދުވަހުން ފެށިގެން ހުއްޓައިލާނެ ކަމަށް ކުރިން ވެސް ވަނީ އިއުލާނުކޮށްފައެވެ.
އެ ކަމާ ގުޅިގެން އިސްރާއީލުން ވަނީ ނުރުހުން ވެސް ފާޅުކޮށްފައެވެ.
ކެނެޑާގެ ޔުނިވާސިޓީތަކާއި، ސިޔާސީ އިވެންޓުތަކުގައާއި މިދިޔަ ހަފުތާގައި ބޭއްވި ޓްރޮންޓޯ އިންޓަނޭޝަނަލް ފިލްމު ފެސްޓިވަލްގައި ވެސް ފަލަސްތީނަށް ތާއީދުކުރާ ފަރާތްތަކުން ވަނީ އިސްރާއީލަށް ހަތިޔާރު ފޯރުކޮށްދިނުން ހުއްޓާލަން ގޮވައިލައިފައެވެ.
އިސްރާއީލަކީ ތާރީޚީ ގޮތުން އެންމެ ގިނައިން ކެނެޑާއިން ހަތިޔާރު އެކްސްޕޯޓްކުރާ ގައުމެވެ. ކުރިން 2021 ވަނަ އަހަރު 26 މިލިއަން ކެނެޑާ ޑޮލަރުގެ ޝިޕްމަންޓަށް ފަހު 2022 ވަނަ އަހަރު އިސްރާއީލަށް 21 މިލިއަން ކެނެޑާ ޑޮލަރުގެ އަސްކަރީ ތަކެތި އެކްސްޕޯޓްކޮށްފައިވެއެވެ. އެއާއެކު ކެނެޑާއިން އެންމެ ގިނައިން ހަތިޔާރު ފޯރުކޮށްދޭ 10 ގައުމުގެ ތެރޭގައި އިސްރާއީލު އޮތީ ހިމެނިފައެވެ.
ކެނެޑާގެ އިތުރުން ބައިނަލްއަގުވާމީ އިންސާނީ ގާނޫނުތަކާ ޚިލާފަށް އިސްރާއީލުން ހަތިޔާރު ބޭނުންކޮށްފާނެ ކަމަށް ބުނެ، އިސްރާއީލަށް ބައެއް ހަތިޔާރު ފޯރުކޮށްދިނުން މެދުކަނޑާލައިފައިވާ ކަމަށް މިދިޔަ ހަފުތާގައި އިނގިރޭސިވިލާތުން ވެސް ވަނީ ބުނެފައެވެ.
އިސްރާއީލަށް ހަތިޔާރު ފޯރުކޮށްދިނުމުގެ މައްސަލައާ ގުޅިގެން ބައެއް ގައުމުތަކުގައި ވަނީ ޝަރީއަތް ވެސް ފަށައިފައެވެ.