ވަރަށް ގިނައިން ރާއްޖެ އެތެރެވުމަށްފަހު، ޖެހިގެން އަންނަ ދުވަހު ފުރާކަމަށް ފާހަގަވެ، މަނީލޯންޑަރިންގެ ތުހުމަތުގައި ބަންދުކޮށްފައިވާ އިންޑިއާ ރައްޔިތެއްކަމަށްވާ އަބްދުލް ރަގޫބު ނިސްތާރު ހަލީމް ރަހްމާނުގެ ބަންދަށް އިތުރު 10 ދުވަސް އިއްޔެ ޖަހައިފިއެވެ.
މުއްދަތު މަޖިލީހުގައި އޭނާގެ ވަކީލުވަނީ އޭނާ އަތުން ހިފެހެއްޓި ފައިސާއަކީ ސައްހަ ގޮތުގައި ހިފަހައްޓާފައިވާ ފައިސާ ކަމަށާއި މީނާގެ މައްޗަށް ތުހުމަތުކުރެވޭ މަނީ ލޯންޑާކުރުގެ ތުހުމަތާ ގުޅޭ އެއްވެސް ހެއްކެއް ފުލުހުން ހުށަހަޅާފައި ނުވާކަމަށް ބުނެފައެވެ.
މިއީ ތަހުގީގުކުރަމުން އަންނަ މައްސަަލައަަކަށްވާތީކަމަށް ބުނެ، އޭނާގެ އަތުން ހޯދީ ކިހާ ފައިސާއެއްކަމެއް ފުލުހުން ހާމައެއް ނުކުރެއެވެ.
ނަމަވެސް ފުލުހުން ބުނީ، މީނާގެ އަތުން ގިނަ އަދަދެއްގެ ޑޮލަރު ފެނިފައިވާ ކަމަށާއި އެއީ އެހެންމީހުން އޭނާއަށް ހަވާލުކުރި ޑޮލަރުކަން ދޭހަވާފަދަ ލިޔުންތަކެއް އޭނާގެ އަތުން ފެނިފައި ވާކަމަށެވެ. އަދި އޭނަގެ އަތުން އޭނާގެ ނަމުގައި އޮތް ދެ ޕާސްޕޯޓު ފެނިފައިވާކަމަށް ވެސް ފުލުހުން ވަނީ ބުނެފައެވެ.
އެއާއެކު ވެސް އޭނާގެ ބަންދުގެ މުއްދަތު، އިތުރު 10 ދުވަހަށް ޖެހީ އޭނާގެ ޓްރެވަލް ހިސްޓްރީގައި ޝައްކުވާ ފަދަ ކަންތައްތަކެއް ހުރިކަމަށް ފެންނާތީކަމަށް ގާޒީ ވަނީ ވިދާޅުވެފައެވެ. އެ
އާއެކު ގާޒީވަނީ އޭނާގެ އަތުން ހޯދި ފައިސާއާ ގުޅޭ ކަންކަން އިތުރަށް ސާފުކުރުމަށް ފުލުހުންނަށް އަންގައިފައެވެ. އޭނާގެ ބަންދުގެ މުއްދަތު ޖެއްސެވީ ގާޒީ އިބްރާހިމް ޒިހުނީއެވެ.