މަދަނީ ޖަމިއްޔާތަކަށް ޔޫތް މިނިސްޓްރީން ފޯރުކޮށްދޭ ގްރާންޓުގެ ދަށުން ތިނަދޫ ސިޓީގައި ހުވަދޫ ރެކްރިއޭޝަން ކުލަބުން ހެދި ސާފިން ހަޓް ހުޅުވައިފިއެވެ.
މި ހަޓް ހުޅުވައިދެއްވީ ޔޫތް މިނިސްޓްރީގެ ސްޓޭޓް މިނިސްޓަރު އަލީ ޝަމްއާނާއި އެ ސިޓީގެ މޭޔަރު ސައުދު އަލީއެވެ.
މި ޕްރޮޖެކްޓާ ގުޅުވައި މިނިސްޓްރީން ބުނީ، ގްރާންޓުގެ ދަށުން 245،000 ރުފިޔާގެ ފައިސާގެ އެހީ ދީފައިވާ ކަމަށާއި ޖަމިއްޔާއިން އެހެނިހެން ގޮތްތަކަށް ހޯދި 35،000 ރުފިޔާ ޚަރަދުކޮށްފައިވެއެވެ.
ތިނަދޫގައި އެޅި ސާފިން ހަޓް ހުޅުވުމުގެ ރަސްމިއްޔާތުގެ ތެރެއިން --- ފޮޓޯ/ ޔޫތް މިނިސްޓްރީ
ސާފިން ހަޓް ހުޅުވަން ބޭއްވި ރަސްމިއްޔާތުގައި ޝަމްއާން ވިދާޅުވީ، ޔޫތް މިނިސްޓްރީގެ ދަށުން ކުރަމުން އަންނަ މަސައްކަތަކީ ޒުވާނުންގެ ހުނަރާއި ޒުވާނުންގެ ބައިވެރިވުން މުޖުތަމައުގެ އެކި ކަންކަމުގައި ފުޅާކުރުން ކަމަށެވެ.
ޔޫތް މިނިސްޓަރު އިބްރާހިމް ވަހީދުގެ އިރުޝާދުގެ ދަށުން ޒުވާނުންގެ ކަންކަން ރާވަ ހިންގަމުންދާ ކަމަށާއި ތިނަދޫގައި ހަޓެއް ހުޅުވުމުން ދައްކުވައިދެނީ ޒުވާނުން މުޖުތަމައުގެ ތަރައްގީގައި ބައިވެރިވާން ބޭނުންވާ މިންވަރު ކަމަށް ޝަމްއާން ވިދާޅުވެއެވެ.
އޭގެއިތުރުން، ތިނަދޫގައި ހުޅުވި ހަޓާއެކު، އެ ސިޓީގެ ސާފިން ސަރަހައްދު އިތުރަށް ތަރައްގީކުރުމަށްޓަކައި ރަށުގެ ކައުންސިލާ ގުޅިގެން ޒުވާނުން އިތުރަށް މަސައްކަތް ކުރުމަށް އޭނާ ބާރުއެޅުއްވިއެވެ.
މިނިސްޓްރީން މިއަދު ވަނީ މަދަނީ ޖަމިއްޔާތަކުގެ ތެރެއިން ފައިސާގެ އެހީ ލިބޭ ޖަމިއްޔާތަކާއެކު ސޮއިކުރަން ފަށާފައެވެ.