މ. ނާލާފުށީގައި ޕާކުކޮށްފައި ހުރި ސައިކަލެއް ރޭ ދަންވަރު ރޯ ކޮށްލި މައްސަލައެއް ފުލުހުން ބަލަން ފަށައިފިއެވެ.
މިކަމާ ގުޅިގެން، ނާލާފުށި ކައުންސިލްގެ ރައީސް އަހުމަދު ޒުބައިރު މިރޭ 'ސަން'އަށް ވިދާޅުވީ، ރޭ ދަންވަރު 3:24 ހާއިރު ސައިކަލަކާއި ބައިސްކަލެއްގައި ރޯވެފައިވާ ކަމުގެ މައުލޫމާތު ލިބުނު ކަމަށެވެ.
އެގޮތުން، މިހާދިސާގައި ބޭނުން ނުކުރެވޭ ވަރަށް ސައިކަލު އަނދާފައިވާ ކަމަށް ޒުބައިރު ވިދާޅުވިއެވެ. އެ މައްސަލަ ވަގުތުން ފުލުހުންނަށް ރިޕޯޓުކުރި ކަމަށް ވެސް އޭނާ ވިދާޅުވިއެވެ.
ނާލާފުށީގައި ޕާކުކޮށްފައި ހުރި ސައިކަލަކާ ބައިސްކަލެއްގައި ރޯވެފައި ---- ފޮޓޯ/ އަހުމަދު ޒުބައިރު
ސައިކަލަކާއި ބައިސްކަލެއްގައި ރޯކޮށްލި މައްސަލައިގައި ފުލުހުން ހިއްސާކުރި މެސެޖެއްގައި ބުނީ، ނާލާފުށީ ސޯސަން މަގުގައި ޕާކުކޮށްފައި ހުރި ސައިކަލަކާއި ބައިސްކަލެއްގައި ރޯކޮށްލާފައިވާ މައްސަލައެއް އެ ޚިދުމަތަށް ރިޕޯޓުކޮށްފައިވާ ކަމަށެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި، ރާއްޖޭގެ އެކި ރަށްރަށާއި މާލޭ ސަރަހައްދުން ވެސް ސައިކަލުތަކުގައި ރޯކުރާ މައްސަލަތައް ދޭތެރެއަކުން ފެންމަތިވެއެވެ.